اسلام آباد: (ویب ڈیسک) قائم مقام اسپیکر قاسم خان سوری کی زیرصدارت قومی اسمبلی کا اجلاس جاری ہے۔
ڈپٹی اسپیکر قاسم سوری نے کہا کہ میری رولنگ کو غیر آئینی قراردیا گیا، غیر ملکی مراسلہ زیر بحث لایا گیا اور اس کو سازش قرار دیا گیا، ڈپٹی اسپیکر نے مراسلے کوایوان میں لہرایا، انہوں نے کہا کہ عمران خان کا یہ قصور تھا کہ انہوں نے آزاد خارجہ پالیسی کی بات کی، کیا یہ ملک غلامی کرنے کے لیے بنایا گیا تھا؟ قومی اسمبلی کی طرف سے مراسلہ سپریم کورٹ کو بھیج رہے ہیں۔
ڈپٹی اسپیکر کے اظہار خیال کے دوران خواجہ آصف بات کرنے کے لیے کھڑے ہوئے لیکن شہباز شریف نے خواجہ آصف کو بات کرنے روک دیا۔
مراسلہ ڈی کلاسیفائڈ کرنے کی اجازت وفاقی کابینہ نے دی، میری طرف سے کسی کی دل آزاری ہوئی ہو تو معذرت چاہتاہوں۔ جس کے بعد انہوں نے سابق وزیرخارجہ شاہ محمود قریشی کو اجلاس میں اظہار خیال کی اجازت دی۔
شاہ محمود قریشی نے کہا کہ ہم مستعفی ہونے کا اعلان کر رہے ہیں، جس کے بعد ڈپٹی اسپیکر قومی اسمبلی قاسم سوری نے بھی استعفیٰ دینے کا اعلان کرتے ہوئے کہا کہ میرا ضمیر گوارا نہیں کرتا کہ وزیراعظم کے انتخاب کا حصہ بنوں، اور اٹھ کر چلے گئے۔
جس کے بعد ایاز صادق نے قومی اسمبلی اجلاس کی صدارت سنبھال لی۔

اسلام آباد: (ویب ڈیسک) مسلم لیگ ن کی نائب صدر مریم نواز کا کہنا ہے کہ پرانی مسلم لیگ ن نہ سمجھا جائے ۔ہم انتقام نہیں لیں گے حساب ضرور لیں گے۔
مسلم لیگ ن کی نا ئب صدر مریم نواز وزیر اعظم کے انتخاب کے لیے ہونے والے اجلاس میں شرکت کے لیے پارلیمنٹ ہاوس پہنچ گئیں۔ میڈیا سے گفتگو میں ان کا کہنا تھا کہ ہم انتقام نہیں لیں گے حساب ضرور لیں گے۔لاہور سے بنی گالا تک مال گاڑی جو چلتی تھی اس کا حساب ضرور ہوگا۔
ان کا کہنا ہے کہ اگر فتنہ پھیلانے اور امن و سکون میں خلل ڈالنے کی کوشش کی گئی تو آہنی ہاتھوں سے نمٹا جائے گا۔ان کو حکومت جانے کا بڑا دکھ ہے ،تھوڑا حوصلہ کریں ۔ فوٹو شاپ تصاویر اور ویڈیوز نہ لگائیں
انہوں نے کہا ہے کہ ابھی شہباز شریف کی حکومت قائم بھی نہیں ہوئی اسٹاک ایکسچینج اوپر چلی گئی ہے۔ عوام نے سکھ کا سانس لیا ہے۔ہم نے 22کروڑ عوام کی جان اس نالائق اور نااہل حکومت سے چھڑائی۔

اسلام آباد: (ویب ڈیسک) پاکستان تحریک انصاف نے قومی اسمبلی سے استعفے دینے کا فیصلہ کرلیا۔
پاکستان تحریک انصاف کی پارلیمانی پارٹی کے اجلاس سے سابق وزیراعظم عمران خان نے خطاب کرتے ہوئے کہا کہ چوروں کیساتھ اسمبلی میں نہیں بیٹھوں گا، اکیلے کو بھی استعفی دینا پڑا تو میں استعفی دوں گا، شہباز شریف پر 16 ارب اور 8 ارب روپے کے کرپشن کیسز ہیں، اسے جو بھی وزیراعظم سلیکٹ اور الیکٹ کرتا ہے اس سے بڑی ملک کی توہین نہیں ہو سکتی، قومی اسمبلی سے استعفے دے رہے ہیں۔
ڈپٹی اسپیکر قاسم سوری سے عمران خان نے ملاقات کی، جس میں انہوں نے قومی اسمبلی اجلاس کے حوالے سے ہدایات دیں۔ ذرائع کے مطابق ڈپٹی اسپیکر کو عمران خان نے پارٹی استعفوں سے متعلق بھی آگاہ کر دیا۔
ادھر پاکستان تحریک انصاف کے ایم این اے مراد سعید، فرخ حبیب، عالیہ حمزہ قومی اسمبلی کی رکنیت سے مستعفی ہوگئے۔ انہوں نے سماجی رابطے کی ویب سائٹ پر ٹویٹ کرتے ہوئے مستعفی ہونے کا اعلان کیا۔

شیخوپورہ : (ویب ڈیسک) شیخوپورہ میں پی ٹی آئی کے منخرف سابق صوبائی وزیر میاں خالد محمود کے گھر کے باہر فائرنگ واقعے پر پولیس نے 150 پی ٹی آئی کارکنوں کے خلاف سنگین نوعیت کی دفعات کے تحت مقدمہ درج کر لیا، 8 ملزمان کو گرفتار کر لیا گیا ہے۔
عمران خان کی کال پر پی ٹی آئی کے کارکنوں کی احتجاجی ریلی منحرف سابق صوبائی وزیر میاں خالد محمود کے گھر کے باہر سے گزر رہی تھی کہ ریلی میں سے پی ٹی آئی کارکنوں نے ہوائی فائرنگ کردی جس پر میاں خالد محمود کے گھر کے اندر سے ملازمین نے بھی فائرنگ کی۔
واقعہ کی اطلاع ملتے ہی ڈی پی او شیخوپورہ، ایس پی انویسٹی گیشن اور پولیس کی بھاری نفری موقع پر پہنچ گئی، میاں خالد محمود کے بیٹے میاں تیمور خالد نے ڈی پی او کی اپنے ڈرائیور غلام عباس کی مدعیت میں تحریری درخواست دی جس پر تھانہ بی ڈویژن میں مقدمہ درج کرلیا گیا۔
ایف آئی آر میں الزام لگایا گیا کہ پی ٹی آئی کے 20 کے قریب نامزد اور 150 نامعلوم کارکنان میاں خالد محمود کی رہائش گاہ پر حملہ آور ہوئے اور فائرنگ کرتے ہوئے گھر توڑ پھوڑ کی، ملازمین کو تشدد کرکے نقدی و موبائل فون چھین لیے، بی ڈویژن پولیس نے 8 ملزمان کو گرفتار کر لیا ہے۔