واشنگٹن: (ویب ڈیسک) امریکا کے صدر جو بائیڈن کورونا وائرس کا شکار ہوگئے۔
وائٹ ہاؤس کی جانب سے جاری بیان میں کہا گیا ہےکہ صدر جو بائیڈن کورونا وائرس کا شکار ہوگئے ہیں۔
ترجمان وائٹ ہاؤس کے مطابق جوبائیڈن مکمل طور پر ویکسینیٹڈ ہیں اور ان میں کورونا کی معمولی علامات ہیں، وہ وائٹ ہاؤس میں قرنطینہ ہورہے ہیں اور وہیں سے اپنے فرائض سرانجام دیں گے۔
خیال رہے کہ 79 سالہ امریکی صدر پہلی مرتبہ کورونا کا شکار ہوئے ہیں۔
بارسلونا: (ویب ڈیسک) اسپین میں بل ریس کے دوران زخمی ہو کر ہلاک ہونے والوں کی تعداد تین ہوگئی ہے۔
الجزیرہ کی روپورٹ کے مطابق مشرقی اسپین میں بیلوں کی دوڑ کا میلہ منعقد ہوا اور رواں ہفتے کے دوران بیلوں کی ٹکر سے متعدد افراد زخمی ہوئے تھے جن میں تین جان کی بازی ہار گئے۔
اس حوالے سے بتایا گیا کہ ہلاک ہونے والے دو افراد کی عمریں 46 اور 50 سال تھی جو بیل کی ٹکر سے شدید زخمی ہوگئے تھے۔
حکام نے مزید کہا کہ 60 سالہ ایک فرانسیسی سیاح ایلی کینٹ کے قریب گاؤں میں بیل کی ٹکر سے زخمی ہوگیا تھا اور جسے انتہائی نگہداشت یونٹ میں منتقل کردیا گیا جو گزشتہ روز انتقال کرگیا۔
بیل ریس میلہ دیرینہ ہسپانوی روایت ہے جس میں بہت سے قصبوں میں ہر سال اس طرح کی تقریبات منعقد ہوتی ہیں۔ ایک ہفتہ تک چلنے والے سان فرمن فیسٹیول میں ہر صبح چھ لڑنے والے بیلوں کے ساتھ سیکڑوں ڈیئر ڈیولز کی دوڑ ہوتی ہے۔
اس سال 14 جولائی کو ختم ہونے والے میلے میں پانچ افراد مارے گئے تھے۔ 1911 سے اب تک پامپلونا کے بیل دوڑ میں 16 افراد ہلاک ہو چکے ہیں۔
بنوں: (ویب ڈیسک) حکومت مخالف سیاسی جماعتوں کے اتحاد پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے مطالبہ کیا ہے کہ عمران خان کو گرفتار کرکے جیل میں ڈالا جائے۔
جمیعت علمائے اسلام کے سربراہ مولانا فضل الرحمان نے بنوں میں پریس کانفرنس کرتے ہوئے کہا کہ قبائلی علاقوں میں جے یو آئی کے علما کی ٹارگٹ کلنگ ہورہی ہے، ہمیں بتایا جائے قاتل کون ہے، ورنہ قتل کی ذمہ داری ریاستی ادارے قبول کریں، دینی مدارس پر اداروں کا قبضہ ہے، مدارس کو دہشت گردی کا مرکز کہا جارہا ہے، اور پھر مدارس کے علما سے تعاون بھی لیا جارہاہے۔
انہوں نے کہا کہ پریشان کن صورتحال ہے، ادارے ملک کو مذاق نہ بنائیں اور اس میں اپنی سیاست نہ کریں، کیا ریاست چاہتی ہے کہ ہمارے نوجوان جذبات میں آکر بندوق اٹھالیں، علما ساتھ نہ کھڑے ہوتے تو فوج ملک کو نہیں بچاسکتی تھی، اس کے باوجود ہمیں سزا دی جارہی ہے۔
فضل الرحمان کا کہنا تھا کہ عمران خان کے اردگرد پاگل اور بے وقوف جمع ہیں جو ایک احمق کے پیچھے دوڑ رہے ہیں، جس کیخلاف جہاد ہونا چاہیے وہ کہتا ہے ہم جہاد کررہے ہیں، ہم آپ کےلیے زمین اتنی گرم کردیں گے کہ یوتھیو کے گرم تلوے اس پر نہیں رکھے جاسکیں گے، تمہاری چھوٹی چھوٹی تتلیوں کے پر اس گرمی کو گرداشت نہیں کرسکیں گے، عمران خان تم حد میں رہو۔
فضل الرحمان نے کہا کہ ہمیں پتہ ہے عمران خان کے پیچھے کونسی قوتیں ہیں، یہی فوج آپکو سپورٹ کر رہی تھی اور ہمیں اعتراض تھا، تب آپ کے نزدیک فوج اچھی تھی، آج جب جنرل نیوٹرل ہوگیا تو تم اسے جانور کہہ رہے ہو، ہم تمہارے آقاؤں کو جانتے ہیں، یہ بھی تمہیں آقا نے پڑھایا ہے کہ مجھے گالی دیا کرو پاکستان میں یہی سیاست چلتی ہے۔
انہوں نے مزید کہا کہ شہباز شریف غیر ضروری شرافت دھکا رہے ہیں، میں نے حکومت کو کہا ہے کہ عمران خان کو جیل میں ڈالا جائے، رانا ثنا کو حرکت میں لاؤ، کیوں فارن فنڈنگ کیس کا فیصلہ تاخیر کا شکار ہے۔
فضل الرحمان نے کہا کہ جو معاشی بحران چار سال میں پیدا کیا گیا ، ہمیں کہا جا رہا کہ اسے چار دن میں ختم کرو، یہ قلیل مدتی حکومت ہے، اسے چاہیے طویل مدتی کی بجائے قلیل مدتی فیصلے کرے، میں نے عوامی مخالفت کے پہلو سے قیمتیں بڑھانے سے اختلاف کیا تھا، میں نے پہلی ہی میٹنگ میں کہا تھا کہ آئی ایم ایف سے بات مت کرو، نئی شرائط پر معاہدہ کرو، لیکن سب لوگوں کی دوسری رائے آگئی تو میں کیا کرسکتا ہوں، میں اور نواز شریف بھی بے بس ہوگئے۔
فضل الرحمان کا کہنا تھا کہ ایک جج ان کے حق میں فیصلہ دیتا ہے، اس جج کا داماد الیکشن لڑ رہا ہے اور اس کی حمایت بھی کررہا ہے، اس کے سارے کیس وہ اپنے پاس بھی رکھنا چاہتا ہے، ایسا نہیں چلے گا، انصاف کی کرسی پر بیٹھا شخص انصاف کے تقاضے پورے کرتا نظر آنا چاہیے، ہم عدلیہ کو شک و شبہ سے بالاتر دیکھنا چاہتے ہیں جہاں ان کے فیصلوں پر کوئی اعتراض کرسکے۔
اسلام آباد: (ویب ڈیسک) وفاقی کابینہ نے پولیس سروس آف پاکستان کے ریٹائرڈ آفیسر آفتاب سلطان کی بطور چیئرمین قومی احتساب بیورو(نیب) تعیناتی کی منظوری دے دی جبکہ وزیر خزانہ مفتاح اسماعیل نے بریفنگ دی کہ آئندہ ماہ پاکستانی روپیہ امریکی ڈالر کے مقابلے میں مستحکم ہوجائے گا۔
وزیراعظم محمد کے زیر صدارت وفاقی کابینہ کا اجلاس منعقد ہوا، شہباز شریف نے لاہور سے ویڈیو لنک کے ذریعے کابینہ اجلاس کی صدارت کی، وزیراعظم نے تمام کابینہ ممبران کو خوش آمدید کہا۔
اس موقع پر وفاقی وزیر خزانہ مفتاح اسماعیل نے کابینہ کو امریکی ڈالرز کے ریٹ میں حالیہ اضافے کے بارے میں بریفنگ دی اور کہا کہ امریکی ڈالر کی قیمت کو کم کرنے اور پاکستانی روپے کی قدر میں استحکام کے لیے تمام ضروری اقدامات کئے جارہے ہیں اور آئندہ مہینے پاکستانی روپیہ امریکی ڈالر کے مقابلے میں مستحکم ہوجائے گا، رواں مالی سال گزشتہ سال کی نسبت ملک میں اقتصادی ترقی کی شرح بہتر رہے گی کیونکہ موجودہ حکومت نے پیداواری شعبے بشمول زراعت کے شعبے کو تاریخی ٹیکس مراعات دی ہیں جن کے نتیجے میں صنعتی پیداوار میں خاطر خواہ اضافہ اور زراعت کے شعبے کی ترقی یقینی بنائی جا رہی ہے، ان اقدامات سے مقامی پیداوار کی بدولت در آمدات میں کمی، روزگار میں اضافہ اور بر آمدات میں بھی خاطر خواہ اضافہ متوقع ہے۔
وفاقی کابینہ نے پولیس سروس آف پاکستان کے ریٹائرڈ آفیسر آفتاب سلطان کی چیئرمین قومی احتساب بیورو کے چیئرمین کے طور پر تعیناتی کی منظوری دی، کابینہ کو بتایا گیا کہ چیئرمین نیب کی تقرری کی مدت 3 سال کردی گئی ہے جس کی معیاد بڑھائی نہیں جاسکتی، چیئرمین نیب کی تعیناتی قومی اسمبلی میں قائد ایوان اور قائد حزب اختلاف کی مشاورت سے کی جاتی ہے۔
اجلاس میں وفاقی کابینہ نے وزارتِ تجارت کی سفارش پر افغان ٹرانزٹ ٹریڈ کے لیے ملٹی ماڈل ایئر روڈ کوریڈور، وزراتِ تجارت کی سفار ش پر پاکستان اور ترکی کے مابین ٹریڈ اِن گڈز معاہدے پر دستخط کرنے کی منظوری دے دی۔
خیال رہے کہ پاکستان اور ترکیہ نے وزیراعظم کے حالیہ دورہء کے دوران اس معاہدہ پر دستخط کرنے کا اعلان کیا تھا، اس معاہدے کے ذریعے پاکستان اور ترکیہ کو ایک دوسرے کی سروسز اور سرمایہ کاری کے شعبوں میں بہتر رسائی ملے گی، ترکیہ کی طرف سے پاکستان کو 261 ٹیرف لائنز پر رعایت فراہم کی جائے گی جس میں 123 اشیاء پر فوری طور پر زیرو ریٹنگ بھی شامل ہے جبکہ پاکستان کی طرف سے ترکیہ کو 130 ٹیرف لائنز پر رعایت کی پیش کش کی گئی ہے۔
ان اشیاء میں 8 بڑے شعبوں کی مصنوعات جن میں زراعت، کیمیکل، چمڑے، پلاسٹک، ربڑ، انجینئرنگ اور دھاتی صنعتوں کی مصنوعات شامل ہیں، معاہدے سے پاکستان اور ترکیہ کے مابین کے دو طرفہ تجارت کا حجم بڑھ کر 5 ارب ڈالر تک پہنچ جائے گا، وزیراعظم نے اس معاہدے کے حوالے سے وزراتِ تجارت کی کوششوں کو سراہا۔
وفاقی کابینہ نے افغانستان میں پاکستانی ہسپتالوں کے آپریشنز، دیکھ بھال، سامان کی فراہمی اور سٹاف کی تنخواہوں کے حوالے سے افغانستان کی حکومت کو فنڈز کی منتقلی، وزارتِ بین الصوبائی رابطہ کی سفارش پر چیئرمین فیڈرل لینڈز کمیشن بابر یعقوب فتح محمد کا استعفیٰ منظور کرنے کی منظوری دے دی، نئے چیئرمین فیڈرل لینڈز کمیشن کی تعیناتی کا فیصلہ کابینہ کمیٹی کرے گی۔
کابینہ نے اقتصادی رابطہ کمیٹی کے 20 جولائی 2022 کو منعقد ہونے والے اجلاس میں کئے گئے فیصلوں کی توثیق کردی جن میں گورنمنٹ ٹو گورنمنٹ بنیادوں پر 2 لاکھ میٹرک ٹن یوریا کی درآمد کیلئے چینی فرمز کے ساتھ معاہدہ پر ٹریڈنگ کارپوریشن آف پاکستان کی جانب سے دستخط کی منظوری اور ایک لاکھ 20 ہزار میٹرک ٹن گندم کی 404.86 ڈالر فی میٹرک ٹن کی 90 کی دن مؤخر ادائیگی کی بنیاد پر خریداری شامل ہے۔
وفاقی کابینہ کو اس حوالے سے مزید بتایا گیا کہ یوریا اور گندم کی شفاف طریقے سے خریداری کو یقینی بناتے ہوئے اس بات کا خاص خیال رکھا گیا کہ بہترین معیار کو کم ترین قیمت پر خریدا جا سکے، اس حوالے سے متعلقہ حکام نے مہنگے ٹینڈرز کو بروقت مسترد کرکے کم قیمت ٹینڈرز کو بروقت یقینی بنائی۔
کابینہ نے چائینز فرم سے یوریا کی 100 امریکی ڈالرز فی ٹن کم قیمت پر درآمد کے حوالے سے وفاقی وزیر برائے تجارت، وفاقی وزیر برائے نیشنل فوڈ سیکورٹی، وفاقی سیکرٹری تجارت اور وفاقی سیکرٹری برائے نیشنل فوڈ سکیورٹی کی کوششوں کو سراہا۔
اجلاس میں وفاقی کابینہ نے گندم کی خریداری کے حوالے سے طلب کی گئی قیمت سے 36 امریکی ڈالرز فی ٹن کم قیمت پر ٹینڈر کے عمل کو جلد از جلد نمٹانے پر وزارتِ نیشنل فوڈ سکیورٹی کی ٹیم کی تعریف کی، کابینہ نے کابینہ کمیٹی برائے نمٹائے جانے قانون ساز کیس کے 20 جولائی 2022کے ہونے والے اجلاس میں کئے گئے مختلف فیصلوں کی توثیق کردی، جن میں گورنمنٹ ٹو گورنمنٹ کمرشل ٹرانزیکشن آرڈنینس 2022 کی منظوری شامل ہے۔
وزیراعظم نے اسٹیٹ بینک آف پاکستان کے بورڈ آف ڈائریکٹرز کے لیے تجویز کیے گئے ناموں پر کابینہ کمیٹی بنانے کی ہدایت کردی جو کہ ان ناموں پر غور کرنے کے بعد اپنی رپورٹ وفاقی کابینہ کو پیش کرے گی۔
لاہور: (ویب ڈیسک) پاکستان تحریک انصاف (پی ٹی آئی) کے مرکزی جنرل سیکریٹری اسد عمر نے کہا ہے کہ ایک ایک ووٹ پر پہرہ دیں گے اور کامیابی حاصل کریں گے۔
انہوں نے یہ بات وزیراعلیٰ پنجاب کے انتخاب کے حوالے سے پی ٹی آئی اور ق لیگ کی قیادت کے منعقدہ مشترکہ اجلاس سے خطاب کرتے ہوئے کہی۔ اجلاس میں دونوں جماعتوں کے تمام اہم قائدین نے شرکت کی۔
منعقدہ اجلاس میں چودھری پرویز الہٰی، اسد عمر، شاہ محمود قریشی، شفقت محمود، فرخ حبیب، راجہ بشارت، میاں محمود الرشید اور اسلم اقبال سمیت دیگر نے شرکت کی۔ اجلاس میں دونوں جماعتوں کے اراکین کی حاضری پر اطمینان کا اظہار کیا گیا۔
اجلاس سے خطاب کرتے ہوئے چودھری پرویز الٰہی نے کہا کہ چھانگا مانگا کی سیاست کرنے والوں کو ناکامی ہوگی۔
پی ٹی آئی کے مرکزی جنرل سیکریٹری اسد عمر نے شرکا سے خطاب کرتے ہوئے کہا کہ ایک ایک ووٹ پر پہرہ دیں گے اور کامیابی حاصل کریں گے۔
انہوں نے کہا کہ عمران خان کا کوئی ساتھی بکاؤ مال نہیں ہے، پنجاب میں جمعہ کو انشااللہ پرویز الٰہی وزیر اعلی پنجاب منتخب ہوں گے، مصنوعی نظام ختم ہورہا ہے اور نئے الیکشن کی طرف جا رہے ہیں، جو الیکشن کروا رہا ہے اس پر عوام کو اعتماد ہونا چاہیے، الیکشن کمیشن اب فریق بن چکا ہے۔
پی ٹی آئی اسد عمر نے کہا کہ کراچی اور حیدر آباد میں بارش کی وجہ الیکشن ملتوی کردیا، پاکستان اور جمہوریت کو آگے لے جانے کے لیے آزاد الیکشن کمیشن ضروری ہے، پاکستان میں ان کے لیے چھپنے کی جگہ نہیں بچ رہی ہے۔
اجلاس سے خطاب کرتے ہوئے اسد عمر نے کہا کہ سپریم کورٹ کا حکم ہے کہ آسان اور محفوظ طریقے سے ایم پی ایز کو لے کر آنا ہے۔
اسلام آباد: (ویب ڈیسک) چیئرمین پاکستان تحریک انصاف (پی ٹی آئی) عمران خان کہتے ہیں کہ جرائم کے بادشاہ زرداری اور شہباز شریف اپنا این آر او ٹو حاصل کر کے اپنی لوٹی ہوئی دولت پنجاب کے ایم پی ایز کو خریدنے کیلئے استعمال کر رہے ہیں۔
عمران خان نے کہا کہ ان بدمعاشوں کیلئے سری لنکا واضح مثال ہے، عوام آپ کو پنجاب میں اپنا مینڈیٹ چرانے کی اجازت نہیں دیں گے۔
اپنی ٹوئٹ میں عمران خان نے لکھا کہ ’تبدیلی سرکار کی امریکی سازش سے لائی گئی امپورٹڈ حکومت نے پہلے ساکھ سےمحرومECP کی سربراہی پر فائز بد دیانت اور متعصب چیف الیکشن کمشنر سکندر سلطان راجہ کی معاونت سےسرکاری+ حکومتی مشینری کے ذریعے پنجاب کے ضمنی انتخابات میں دھاندلی کی کوشش کی لیکن نہایت باشعور اور پرعزم عوام نےاپنی ثابت قدمی سے ان کے مذموم عزائم ناکام بنائے۔ُ
سابق وزیر اعظم نے مزید لکھا کہ ’اب جرم کی دنیا کے بادشاہ زرداری اور شہباز NRO2 لینے کے بعد MPAs کو خریدنے کیلئے نہایت بے رحمی سے لوٹی گئی دولت استعمال کرتے ہوئے قانون کا مذاق اڑانے اور آئین پامال کرنے میں مصروف ہیں۔‘
انہوں نے لکھا کہ ’میں پاکستانی عوام سے کہتاہوں کہ جیسےانہوں نے17جولائی کو گھروں سے نکل کرپنجاب کےضمنی انتخاب پر ڈاکے کا منصوبہ ناکام بنایا، وہ آج پھر ملک بھر میں احتجاج کے ذریعے اپنے مینڈیٹ کے تحفظ کیلئے نکلیں۔’
عمران خان نے کہا کہ ’میں رات 9 بجےخطاب کروں گا، سری لنکا کو ایک مثال بننے دیجئے کہ اس میں بدمعاشوں، ان کےسرپرستوں اور ECP کیلئے واضح پیغام ہےکہ عوام آپ کو پنجاب میں عوامی مینڈیٹ پر ہاتھ صاف کرنےکی قطعاً اجازت نہیں دینگے۔‘
لاہور: (ویب ڈیسک) سابق وزیر خارجہ اور پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ ضمنی الیکشن میں پیسہ چلانے والوں کو لوگوں نے مسترد کر دیا۔
پی ٹی آئی کے وائس چیئرمین شاہ محمود قریشی نے میڈیا سے گفتگو میں کہا کہ الیکشن میں عوام نے اپنا فیصلہ دے دیا ہے اور پنجاب کی عوام نے عمران خان کے مؤقف کی تائید کی ہے۔
انہوں نے کہا کہ مسلم لیگ ن نے ضمنی الیکشن میں پیسہ چلایا لیکن لوگوں نے اسے مسترد کیا جبکہ ہماری حکومت کو سازش اور مداخلت کے ساتھ ختم کر دیا گیا۔ عمران خان کے کہنے پر ووٹر گھروں سے نکلا اسی لیے 50 فیصد ٹرن آؤٹ رہا۔
شاہ محمود قریشی نے کہا کہ مسلم لیگ ن کے بہت سے لوگوں نے پیسہ چلایا لیکن کام نہیں آیا اور سندھ میں الیکشن سے پہلے واضح ہو گیا تھا کہ پی ٹی آئی جیت رہی ہے تو الیکشن ملتوی کر دیا۔
انہوں نے کہا کہ ان کا خیال ہے کسی طرح اجلاس کو ملتوی کرا دیں گے تو یہ نہیں ہو سکتا۔
لاہور: (ویب ڈیسک) ہانگ کانگ میں دنیا کا سب سے زیادہ عمر پانے والا پانڈا انتقال کر گیا۔
غیر ملکی خبر رساں ایجنسی کے مطابق ہانگ کانگ کے اوشین تھیم پارک میں پرورش پانے والے این این نامی نر پانڈے کی عمر 35 سال تھی۔ پانڈے کی گزشتہ کچھ روز سے طبیعت خراب تھی جس کی وجہ سے اس نے کھانا پینا چھوڑ دیا تھا۔
پانڈے کی کچھ روز سے صحت بگڑتی ہی جا رہی تھی اور باوجود علاج کے اس کی صحت سنبھل نہیں رہی تھی۔
این این پانڈے کی ساتھی مادہ پانڈا جیا جیا کو بھی سب سے زیادہ عمر پانے والی پانڈا کا اعزاز حاصل ہے جو 6 سال قبل 38 سال کی عمر میں انتقال کر گئی تھی۔
پارک کی انتظامیہ نے نر پانڈا کے مرنے پر دکھ کا اظہار کرتے ہوئے کہا کہ یہ ہماری فیملی کا حصہ تھا اور اس کا سیاحوں سے اچھا میل جول تھا۔ اس پانڈے کی جوڑی کا تحفہ ہانگ کانگ کو چینی حکومت کی جانب سے دیا گیا تھا۔
ڈوسیٹ: (ویب ڈیسک) برطانیہ کے ڈوسیٹ کے ساحل میں قرونِ وسطی کے ایک بحری جہاز کا ملبہ دریافت ہوا ہے جس کو برطانیہ کا سب سے پُرانا ملبہ قرار دینے کے ساتھ اعلیٰ سطحی حفاظتی اسٹیٹس دے دیا گیا ہے۔
’مارٹر ریک‘ نامی یہ باقیات 2020 میں خلیجِ پُول میں پہلی بار دریافت ہوا۔ اس کا نام مارٹر ریک اس میں ملنے والے پیالوں کی وجہ سے رکھا گیا جس میں آٹے کے لیے اناج کو پِیسا جاتا تھا۔
جہاز میں لگی لکڑیوں کے چھلوں کے مطالعے سے معلوم ہوتا ہے کہ یہ کم از کم 750 سال پُرانی ہیں۔ برطانیہ کے سمندروں سے 11ویں سے 14ویں صدی کے درمیانی عرصے سے تعلق رکھنے والے کسی بھی جہاز کا کوئی ملبہ اب تک نہیں ملا ہے۔
شعبہ برائے ڈیجیٹل، کلچر، میڈیا اور اسپورٹ کی جانب سے مارٹر ریک کو اعلیٰ سطحی قانونی تحفظ دے دیا گیا ہے۔
مارٹر ریک کی پہلی بار نشاندہی ٹریور اسمال نامی غوطہ خور نے کی جو گزشتہ 30 برس سے پُول میں ڈائیونگ چارٹر چلا رہے ہیں۔
انہوں نے کہا کہ وہ ایک ملاح خاندان میں پیدا ہوئے۔ انہوں نے جہازوں کے ملبے کی تلاش میں بطور کپتان سمندروں میں ہزاروں میل کا سفر کیا۔2020 کے موسمِ گرما میں انہوں نے ایک غیردریافت شدہ حادثے کی جگہ دریافت کی۔ انہیں اس جگہ پر غوطے کی اجازت دی گئی اور پھر جو ہوا وہ تاریخ ہے۔ وہاں انگلینڈ کا قدیم ترین جہاز کا ملبہ دریافت کیا گیا۔
یہ جہاز اپنےجہاز کے ڈیزائن سے کِلنکر جہاز معلوم ہوتا ہے جس کو لکڑی کے پھٹوں کی تہہ پر تہہ لگا کر بنایا جاتا ہے۔جہاز میں استعمال کی جانے والی لکڑی آئرش اوک سے لی گئیں جن کو 1242 سے 1265 کے درمیان کاٹا گیا۔ یہ بادشاہ ہینری سوم کا دور تھا۔
بیجنگ: (ویب ڈیسک) ایک چینی یونیورسٹی 20 ریڈار اینٹیناؤں کا ایک مجموعہ بنارہی ہے جس سے زمین سےممکنہ طور پر ٹکرانے والے سیارچوں کی نشاندہی کی جاسکے گی۔
بیجنگ انسٹیٹیوٹ آف ٹیکنالوجی کی فیسلیٹی کے ہر اینٹینا کا قطر25 سے 30 میٹر ہے جو زمین سے 15 کروڑ کلومیٹر کے فاصلے تک سیارچوں کا مشاہدہ کریں گے۔ یہ فاصلہ زمین اور سورج کے درمیان فاصلے کے برابر ہے۔
یونیو رسٹی کی جانب سے فی الحال دو اینٹینا بنائے جا چکے ہیں جن کی آزمائش ستمبر میں کی جائے گی۔
بیجنگ انسٹیٹیوٹ آف ٹیکنالوجی کے صدر لونگ ٹینگ کے مطابق یہ منصوبہ چین کے اجرامِ فلکیات سے زمین کے دفاع کی ضروریات کی ابتداء ہے جس کے ساتھ اس نظام کی مدد سے سیارچوں کے متعلق مطالعہ بھی ہوگا۔
یہ اینٹینا زمین کے مدار میں بِکھرے خلائی ملبے کو ٹریک کرنے میں استعمال کیا جاسکے گا۔ یہ ملبہ وقت کے ساتھ بڑھتا جارہا ہے اور یہ ہمارے سیارے کے لیے خطرناک صورتحال پیدا کر سکتاہے۔
سائنس دانوں نے خبردار کیا ہے کہ آئندہ دہائی میں قوی امکانات ہیں کہ خلاء سے زمین میں گِرنے سے اموات ہوں گی۔
زمین کےگرد مدار میں اندازاً 21 ہزار اشیاء موجود ہیں اور 2021 میں ان میں 5000 کے قریب فعال سیٹلائیٹس ہیں۔تاہم، تازہ ترین اندازے کے مطابق زمین کے گرد 12 کروڑ 80 چھوٹی اشیاء گردش کر رہی ہیں جو ایک سینٹی میٹر سے چھوٹی ہیں۔
چین سیارچوں کی نگرانی کے دفاعی نظام پر کافی عرصے سے کام کر رہا ہے جس کی آزمائش 2025 میں متوقع ہے۔ یہ نظام ان سیارچوں کی درجہ بندی کرے گا جو زمین کے لیے ممکنہ طور پر خطرہ ہوسکتے ہیں۔
