All posts by Khabrain News

شوبز

اقراء عزیز کے دبئی میں سیر سپاٹے، اسکائی ڈائیونگ کرنے کی ویڈیو وائرل

دبئی: (ویب ڈیسک) حال ہی میں دبئی کا گولڈن ویزا حاصل کرنے والی پاکستان شوبز انڈسٹری کی معروف اداکارہ اقراء عزیز ان دنوں اپنے شوہر یاسر حسین کے ہمراہ دبئی میں گرمیوں کی چھٹیاں منا رہی ہیں۔
تاہم اداکارہ نے اپنے انسٹا گرام اکاؤنٹ پر ایک ویڈیو شیئر کی ہے جس کے سوشل میڈیا پر خوب چرچے ہو رہے ہیں اس ویڈٰیو میں انہیں دبئی میں اسکائی ڈائیونگ کرتے ہوئے دیکھا جا سکتا ہے۔
اداکارہ کے کہنا ہے کہ یہ ان کی زندگی میں ان کا سب سے پہلا بےحد بہادری کا کام ہے اقراء نے کہا کہ اسکائی ڈائیونگ کر کے بہت مزہ آیا، ہر کسی کو اپنی زندگی میں یہ ضرور آزمانا چاہیے۔
یاد رہے کہ حال ہی میں اقرا اور ان کے شوہر یاسر حسین کو دبئی کا گولڈن ویزا ملا ہے جس کے بعد سے یہ جوڑی دبئی کے سیر سپاٹے کرنے میں مصروف ہے انسٹاگرام پر اداکارہ کی تصاویر اور ویڈیوز کے مداحوں کی جانب سے خوب پسند کی جا رہی ہیں۔

شوبز

سنجے دت ’شمشیرا‘ کی شوٹنگ کے دوران کینسر سے لڑتے رہے، ہدایتکار کا انکشاف

ممبئی: (ویب ڈیسک) رنبیر کپور اور سنجے دت کی آنے والی فلم ’شمشیرا‘ کے ہدایتکار کرن ملہوترا نے سنجے دت سے متعلق بڑا انکشاف کیا ہے۔
بھارتی میڈیا رپورٹ کے مطابق فلم شمشیرا کے ہدایتکار کرن ملہوترا نے انکشاف کیا ہے کہ سنجے دت شمشیرا کی شوٹنگ کے دوران خاموشی سے کینسر سے جنگ لڑ رہے تھے اور انہوں نے یہ محسوس تک نہیں ہونے دیا کہ وہ اتنی بڑی بیماری کا شکار ہیں۔
انہوں نے بتایا کہ سنجے دت شمشیرا کی شوٹنگ ہمیشہ کی طرح دبنگ انداز میں کرتے رہے اور کسی کو معلوم نہیں ہونے دیا کہ ان پر کیا گزر رہی ہے۔
کرن ملہوترا نے کہا کہ ’سنجے سر کے کینسر کی تشخیص کی خبر ہم سب کے لیے ایک بہت بڑا صدمہ تھی لیکن ہمیں اس کا بلکل اندازہ نہیں تھا کیونکہ وہ بات کر رہے تھے اور ایسے کام کر رہے تھے جیسے کچھ ہوا ہی نہیں ہے وہ بہت بہادر ہیں‘۔
ہدایتکار نے کہا کہ اسی وجہ سے سنجو بابا آج اس مقام پر ہیں اور کینسر جیسے مہلک مرض سے پر بھی فتح حاصل کر لی ہے۔
یاد رہے کہ سنجے دت کو 2020 میں پھیپھڑوں کے چوتھے درجے کے کینسر کی تشخیص ہوئی تھی تاہم وہ اسے شکست دینے میں کامیاب رہے اور شوٹنگز میں مصروف رہے۔
کرن ملہوترا کی ہدایتکار میں بننے والی فلم ’شمشیرا‘ 22 جولائی کو ریلیز کی جائے گی۔ مذکورہ فلم سن 1800 کی دہائی کی عکاسی کرتی ہے یہ ایک ایسے قبیلے کی کہانی ہے جو انگریزوں سے اپنے حق اور آزادی کے لیے جدوجہد کر رہا ہے فلم میں سنجے دن منفی کردار ادا کرتے نظر آئیں گے۔

دلچسپ و عجیب

بارش کے لیے مینڈکوں کی شادی ، تیز برسات کے بعد طلاق میں تبدیل

بھوپال: (ویب ڈیسک) بھارتی مذہبی رسوم میں خشک سالی سے خاتمے کےلیے نراورمادہ مینڈک کی شادیاں کرائی جاتی ہیں۔ اسی ضمن میں ایک دلچسپ واقعہ پیش آیا کہ گزشتہ برس جب دو مینڈکوں کی شادیاں کرائی گئیں تو اس کے بعد اتفاق سے اتنی بارش ہوئی کہ لوگ تنگ آگئے اور اس کے بعد اس ٹراتے جوڑے کے درمیان طلاق کروائی گئی ہے۔
یہ شادی بھوپال میں کرائی گئی تھی اور بھارت میں خشک سالی کے بعد اکثر ایسا ہوتا ہے کہ قدیم مذہبی رسوم کے تحت مینڈکوں کی شادیاں کرائی جاتی ہیں اور یہ ایک عام چلن ہے۔
بھوپال میں جب دو مینڈکوں کی شادی کرائی گئی تو آسمان کھل گیا اور خوب برسا۔ اس کا مقصد برسات کی دیوی اندرا کو خوش رکھنا تھا۔ اس کے بعد لوگوں نے بارش کی خواہش کی تو مینڈکوں کے جوڑے میں محبت کی شدت سے غیرمعمولی تباہ کن بارش ہوئی جس کے بعد لوگوں نے ان کے درمیان طلاق کروادی۔
شادی کرانے والے ایک گروہ نے اخباری نمائیندوں کو بتایا کہ بارشوں سے دیہات اور بھوپال کے اطراف کا علاقہ شدید متاثر ہوا۔ یہ شادی اوم شیوا سیوا شکتی منڈل نامی تنظیم نے منعقد کی تھی اور طوفانی برسات کے بعد ایک اور تقریب منعقد کی گئی جس میں ان مینڈکوں کے درمیان طلاق کروادی گئی ہے۔ دونوں رسومات شیوا کے مندر میں منعقد کی گئی تھیں۔
تنظیم کے توقع ظاہر کی کہ شاید اس طرح بارشیں بند ہوجائیں گی اور ان کی تباہی سے علاقہ محفوظ رہے گا۔

سائنس و ٹیکنالوجی

265 کلومیٹر طویل ’ڈرون سُپر ہائی وے‘ کا منصوبہ

لندن: (ویب ڈیسک) برطانوی حکومت نے 265 کلومیٹر طویل ڈرون سُپر ہائی وے نیٹ ورک کی منظوری دے دی۔
پروجیکٹ اسکائی وے نامی اس منصوبے میں زمین پر سنسر لگائے جائیں گے جو ان سے جڑے ڈرونز کی رہنمائی کریں گے تاکہ ڈرونز بحفاظت ان ’گزرگاہوں‘ سے اپنی منزل تک پہنچ سکیں۔
یہ نیٹ ورک جن شہروں کی فضائی حدود کو جوڑے گا ان میں رِیڈنگ، آکسفورڈ، مِلٹن کینز، کیمبرج، کووینٹری اور رگبی شامل ہیں۔ ڈرون سُپر ہائی وے کے متعلق منصوبہ ایلٹیٹیوڈ اینجل کی رہنمائی میں کام کرنے والے ایک کنزورشیم نے پیش کیا تھا۔
گروپ پُرامید ہے کہ یہ سُپر ہائی وے بغیر انسان کے چلنےوالی فضائی سواریوں کی صلاحیتوں کےلیے بڑے پیمانے پر راہیں کھولے گا۔فی الحال یہ بات واضح نہیں کہ اس نیٹ ورک پر کتنا خرچہ آئے گا لیکن ٹیم اس منصوبے کو جون 2024 تک مکمل کرنے کا ارادہ رکھتی ہے۔
موجودہ وقت میں ڈرونز سوائے کچھ صورتوں کے انسانی پائلٹس کے بغیر نہیں اڑ سکتے۔ اسکائی وے کمپنی کا مقصد ہے کہ ڈرون سازاپنے بغیر پائلٹ والے ڈرونز کی رہنمائی اور مواصلات کے نظام کو ورچوئل سُپر ہائی وے سے جوڑ سکیں۔
ایک بار جُڑ جانےکے بعد سسٹم صرف ایک سافٹ ویئر کا استعمال کرتے ہوئے ڈرون کی رہنمائی سنبھال لے گااور اس کو راہ گزر سے بحفاظت منزل تک پہنچا دے گا۔ایسا اس لیے ممکن ہے کہ زمین پر لگے طاقتور سینسر ڈرون کو رہنمائی فراہم کرتے ہیں اور ڈرون کو چلانے کے لیے پائلٹ کی صورت میں اضافی وزن کی ضرورت نہیں ہوتی۔

بزنس

ڈالر بے لگام، روپے کے مقابلے امریکی کرنسی نے تمام ریکارڈ توڑ دیئے

کراچی: (ویب ڈیسک) ڈالر بے لگام ہوگیا، روپے کے مقابلے امریکی کرنسی نے تمام ریکارڈ توڑ دئیے۔
ملک بھر میں امریکی ڈالر کے مقابلے میں روپے کی بدترین گراوٹ کا تسلسل جاری ہے، ایک مرتبہ پھر امریکی کرنسی کی قیمت 228 روپے تک جاپہنچی تھی۔
کاروبار کے آغاز پر ہی ٹریڈنگ کے دوران انٹر بینک میں ڈالر 3 روپے 8 پیسے مہنگا ہونے سے امریکی کرنسی 227 روپے پر فروخت ہوئی تھی۔
انٹربینک میں ڈالر ایک روپیہ نواسی پیسے مہنگا ہوا اور 226 روپے 81 پیسے پر بند ہوا۔
اوپن مارکیٹ میں ڈالر 2 روپے مہنگا ہونے کے بعد 228 روپے 50 پیسے میں فروخت ہوا۔

اہم خبریں, پاکستان

سندھ ہائیکورٹ کا دعا زہرا کو کراچی منتقل کرنے کا حکم

کراچی: (ویب ڈیسک) سندھ ہائیکورٹ نے دعا زہرا کو کراچی منتقل کرنے کا حکم دے دیا۔
سندھ پولیس نے دعا زہرا کے شوہر ظہیر احمد کو عدالت میں پیش کیا جہاں جسٹس اقبال کلہوڑو کی سربراہی میں دو رکنی بینچ نے درخواست پر سماعت کی۔
دورانِ سماعت جسٹس اقبال کلہوڑو نے کہا کہ لڑکی کو تو ہر صورت کراچی لانا ہے، جرم کراچی میں ہوا ہے توکیس کی سماعت بھی کراچی میں ہوگی، کیس اسی شہر میں زیر التوا ہے، کراچی میں بھی شیلٹر ہوم ہیں، کراچی میں بھی لڑکی کو کوئی خطرہ نہیں ہوگا، کراچی کے شیلٹرہوم میں بھی حفاظتی انتظامات ہوں گے، اس لیے کیس کراچی میں ہے تو لڑکی کو بھی کراچی لانا ہوگا جب کہ لڑکی کے والدین بھی کراچی میں رہتے ہیں۔
عدالت نے ملزم ظہیر کے وکیل سے مکالمہ کیا کہ آپ چاہتے ہیں لڑکی کو کراچی منتقل نہ کیا جائے؟ اس پر ملزم کے وکیل نے کہا کہ لڑکی کوکراچی منتقل نہیں کیا جاسکتا، لڑکی اگرکسی سے نہ ملنا چاہے توبھی کوئی اس سے نہیں مل سکتا، عدالت بھی چاہے تو لڑکی سے ملنے کا نہیں کہہ سکتی۔
وکیل کے دلائل پر عدالت نے کہا کہ لڑکی کم عمر ثابت ہوچکی ہے، اس کے بیان کی کوئی اہمیت نہیں، ہم لڑکی کی کسٹڈی والدین کے حوالے کرنے کا حکم نہیں دے رہے۔
دورانِ سماعت سندھ اور وفاقی حکومت کے وکلا نے بھی دعا زہرا کو کراچی منتقل کرنے کی حمایت کردی جس پر عدالت نے لڑکی کی بازیابی کی درخواست پر فیصلہ محفوظ کرلیا۔
عدالت نے کہا کہ درخواست پر فیصلہ آج ہی سنایا جائے گا۔
بعد ازاں عدالت نے فیصلہ سناتے ہوئے دعا زہرا کی کراچی منتقل کا حکم دے دیا۔
واضح رہےکہ دعا زہرا کی بازیابی کے لیے والد مہدی کاظمی نے درخواست دائر کی تھی جس پر عدالت نے ملزم ظہیر احمد کو نوٹس جاری کیا تھا۔

اہم خبریں, پاکستان

محکمہ موسمیات نے کراچی میں بارشوں کا ایک اور الرٹ جاری کر دیا

کراچی : (ویب ڈیسک) محکمہ موسمیات نے 22 جولائی کی رات یا 23 جولائی کی صبح تک طاقتور ہواؤں کا سلسلہ سندھ میں داخل ہونےکا امکان ظاہر کیا ہے جو 26 جولائی تک اثرانداز رہےگا۔
محکمہ موسمیات نے کراچی کے حوالے سے پیشگوئی کی ہے کہ شہر میں 24 سے 26 جولائی کے دوران اکثر مقامات پرگرج چمک کے ساتھ بارش ہو سکتی ہے جبکہ کراچی سمیت سندھ کے شہری علاقوں میں اربن فلڈنگ کا خدشہ بھی ہے۔
محکمہ موسمیات کے مطابق 23 سے 26 جولائی کےدوران تھرپارکر اور عمرکوٹ میں اکثر مقامات پرگرج چمک کے ساتھ بارش متوقع ہے جب کہ میرپورخاص، بدین، ٹھٹھہ اور دیگر علاقوں میں بھی تیز ہواؤں اور گرج چمک کے ساتھ بارش کا امکان ہے۔
محکمہ موسمیات کی جانب سے مزید بتایاگیا ہے کہ بلوچستان میں بھی خضدار، لسبیلہ،حب اور کیرتھر رینج میں بارشوں سے حب ڈیم پر دباؤ پڑ سکتا ہے جبکہ دادو،جامشورو اور نشیبی علاقوں میں سیلابی ریلہ آنےکا بھی امکان ہے۔

اہم خبریں, شوبز

کیا ریتھک روشن اور صبا آزاد جلد شادی کرنیوالے ہیں؟

لاہور: (ویب ڈیسک) بالی وڈ کے خوبرو اداکار ریتھک روشن اور اداکارہ صبا آزاد کے حوالے سے بھارتی میڈیا پر خبریں سامنے آرہی ہیں کہ دونوں جلد رشتہ ازدواج میں منسلک ہونے کا ارادہ رکھتے ہیں۔
ریتھک اور صبا کے معاشقے کی خبریں اس وقت سامنے آئیں جب دونوں کو بالی وڈ کی متعدد پارٹیز میں ہاتھوں میں ہاتھ ڈالے ایک ساتھ دیکھا گیا، دونوں کی جانب سے اب تک اپنے رشتے کی تصدیق تو نہیں کی گئی البتہ بھارتی میڈیا کچھ دعوے کررہا ہے۔جہاں خبریں ہیں کہ دونوں شادی کا سوچ رہے ہیں وہیں دونوں کے ایک قریبی دوست نے بتایا ہے کہ فی الحال ایسی کوئی بات نہیں ہے، دونوں ابھی ایک دوسرے کو وقت دے رہے ہیں، یہ سچ ہے کہ صبا اور ریتھک ایک ساتھ ہیں لیکن شادی میں ابھی وقت ہے۔
اس دوست نے یہ بھی بتایا ہے کہ صبا اور ریتھک کی فیملی ایک دوسرے سے مل چکی ہے اور اداکار کی والدہ اور بہن صبا آزاد کو کافی پسند کرتی ہیں۔
48 سالہ اداکار کی دوسری شادی کی پیشگوئی:
بالی وڈ اداکاروں کی زندگی سے متعلق پیشگوئی کرنے والے معروف بھارتی ماہرِ علم نجوم بیجن درووالا نے ہریتھک کی دوسری شادی کی پیشگوئی کی ہے۔
ان کا کہنا ہے کہ اداکار کے ستاروں میں دوسری شادی ہوتی نظر آرہی ہے۔
واضح رہے کہ اس سے قبل انہوں نے ہریتھک کی پہلی اہلیہ سوزین سے طلاق کی پیشگوئی بھی کی تھی، ہریتھک اور سوزین کی 2014 میں طلاق ہوئی تھی اور ان کے دو بیٹے بھی ہیں۔

اہم خبریں, کھیل

شاہین آفریدی انجرڈ، دوسرے ٹیسٹ میں آرام دیے جانے کا امکان

لاہور: (ویب ڈیسک) قومی ٹیم کے فاسٹ بولر شاہین آفریدی کو انجری کے باعث دوسرے ٹیسٹ میں آرام دیے جانے کا امکان ہے۔
ذرائع کے مطابق شاہین آفریدی گھٹنے سے نیچے کھنچاؤ محسوس کر رہے ہیں تاہم ان کی انجری سنجیدہ نوعیت کی نہیں ہے۔
ذرائع کا بتانا ہے کہ شاہین شاہ آفریدی کی ایم آر آئی رپورٹس پر مشاورت جاری ہے، ٹیم مینجمنٹ آج پی سی بی میڈیکل شعبے کے سربراہ سے مشاورت کرے گی۔
ذرائع کا کہنا ہے کہ میڈیکل بورڈ کی مشاورت کے بعد شاہین آفریدی کو دوسرے ٹیسٹ میں کھلانےکا فیصلہ ہو گا۔
یاد رہے کہ پاکستان اور سری لنکا کے درمیان دوسرا ٹیسٹ 24 جولائی سے شروع ہو گا، دو ٹیسٹ میچوں کی سیریز میں پاکستان کو ایک صفر کی برتری حاصل ہے۔

اہم خبریں

بھارتی کپتان یا کوچ ہوتا تو کوہلی کی زندگی آسان بنادیتا: رکی پونٹنگ

آسٹریلیا : (ویب ڈیسک) آسٹریلیا کے سابق کپتان رکی پونٹنگ بھی بھارتی کرکٹ ٹیم کے آؤٹ آف فارم رہنے والے کھلاڑی ویرات کوہلی کی حمایت میں سامنے آگئے۔
انٹرنیشنل کرکٹ کونسل (آئی سی سی) کو دیے گئے انٹرویو میں رکی پونٹنگ نے کہا کہ ‘کوہلی کو نمبر تین پر ہی کھلانا چاہیے، بار بار اس کے نمبر میں تبدیلی کرکٹر کے لیے مزید پریشانی کا باعث بن سکتی ہے’۔سابق آسٹریلوی کپتان نے کہا کہ ‘ مجھے اس بھارتی کرکٹ ٹیم کے ساتھ کھیلنے میں انتہائی خوف آئے گا جس میں ویرات کوہلی ہوگا، اگر ہندوستان کی ٹیم کوہلی کو میچز سے ڈراپ کرنے کا سوچ رہی ہے تو یہ مخالف ٹیم کے لیے فائدہ مند ثابت ہوگا’۔
رکی پونٹنگ نے مزید کہا ‘ہر ٹیم یہ ہی چاہے گی کہ بھارتی ٹیم بغیر کوہلی کے میدان میں اترے کیونکہ کوہلی ایک زبردست کھلاڑی ہے، مجھے معلوم ہے کہ موجودہ وقت اس کے لیے اچھا ثابت نہیں ہورہا لیکن میں نے اپنی زندگی میں کئی بیٹرز اور بولرز کو اس وقت سے گزرتے دیکھا ہے اور پھر کم بیک کرتے بھی دیکھا ہے’۔
ان کا کہنا تھا کہ ‘اگر آپ ورلڈکپ کے موقع پر ویرات جیسے کھلاڑی کو ٹیم سے آؤٹ کردیں گے تو پھر اس کے لیے واپس اپنی فارم میں آنا مشکل ہوجائے گا’۔
رکی پونٹنگ نے کہا کہ ‘میں بھارتی ٹیم کا کپتان یا کوچ ہوتا تو ویرات کوہلی کی زندگی آسان کردیتا، اس کا اعتماد بحال کرتا، اس کے لیے اچھی چیزیں کرنے کی کوشش کرتا’۔
خیال رہے کہ بھارت کے سابق کپتان اور ورلڈ کلاس بیٹر ویرات کوہلی نے نومبر 2019 کے بعد سے اب تک کوئی بین الاقوامی سنچری نہیں بنائی ہے۔