لاہور: (ویب ڈیسک) پنجاب کے ضمنی انتخاب کے دوران پی پی 158 کی نشست پر ہنگامہ آرائی میں مختلف سیاسی کارکنان زخمی ہو گئے۔ وزیر داخلہ نے جمشید اقبال چیمہ اور سعید مہیس کی گرفتاری کا حکم دے دیا۔
پنجاب اسمبلی کی نشست پی پی 158 کے پولنگ اسٹیشن نمبر 35 کے باہر پاکستان تحریک انصاف (پی ٹی آئی) اور مسلم لیگ ن کے کارکنوں میں جھگڑا ہوا۔ اس دوران دونوں جماعتوں کے متعدد کارکن زخمی ہو گئے۔
رینجرز اور پولیس اہلکاروں نے پولنگ اسٹیشن پر پہنچ کر حالات کو قابو میں کیا۔
الیکشن کمیشن نے پی پی 158 میں کارکنوں کے جھگڑے کا نوٹس لے لیا جبکہ وزیر داخلہ پنجاب نے جمشید اقبال چیمہ اور سعید مہیس کی گرفتاری کا حکم جاری کر دیا۔
وزیر داخلہ پنجاب عطا تارڑ نے کہا کہ پی پی 158 میں جھگڑے کا فوری نوٹس لے لیا گیا ہے اور کسی کو امن و امان خراب کرنے کی اجازت نہیں دی جاسکتی۔
عطا تارڑ نے الزام عائد کیا کہ جمشید چیمہ اور سعید مہیس نے تشدد کر کے لیگی کارکن کا سر پھاڑ دیا جبکہ مسلم لیگ ن کے امیدوار احسن شرافت پر امن رہے۔

لاہور: (ویب ڈیسک) پنجاب میں ضمنی الیکشن کے دوران اسلحہ کی نمائش اور فائرنگ پر پابندی عائد کر دی گئی۔
پنجاب میں ضمنی انتخاب کےدوران اسلحہ کی نمائش پرچھ ماہ قید بھگتنا ہو گی۔ محکمہ داخلہ نے خبردار کرتے ہوئے حکم نامہ جاری کردیا۔
محکمہ داخلہ پنجاب کے مطابق اسلحہ کی نمائش پراٹھارہ جولائی تک پابندی عائد ہے۔فائرنگ کرنے پر 4 اگست تک پابندی عائد کی گئی ہے۔
محکمہ داخلہ نے عوام سے اپیل کی ہے کہ اسلحہ کی نمائش یا ہوائی فائرنگ کی اطلاع فوری ہیلپ لائن پر دیں۔

لاہور: (ویب ڈیسک) الیکشن کمیشن پنجاب کے ترجمان نے کہا ہے کہ الیکشن کنٹرول روم میں 6 شکایات موصول ہوئیں جن میں سے 3 شکایات کو فوری حل کر لیا گیا۔
ترجمان نے مزید کہا کہ دیگر شکایات پولنگ سٹیشنز پر ووٹرز اور کارکنان کے درمیان لڑائی جھگڑے سے متعلق ہیں، حکام معاملات کو کنٹرول کرنے کے لیے اقدامات کر رہے ہیں۔ دوسری جانب ضمنی الیکشن کے دوران امن و امان کا جائزہ لینے کیلئے چیف الیکشن کمشنر نے مرکزی کنٹرول روم اسلام آباد کا دورہ کیا۔
چیف الیکشن کمشنر نے اس موقع پر کہا کہ پولنگ میں مداخلت کوبرداشت نہیں کیا جائے گا۔ خلاف ورزی کرنیوالوں کیخلاف فوری ایکشن لیا جائے، ووٹ کاسٹ کرنے سے جمہوریت مضبوط، ملک مزید مستحکم ہو گا۔

لاہور: (ویب ڈیسک) پنجاب کے وزیر داخلہ عطا تارڑ نے کہا ہے کہ کسی نے غنڈہ گردی یا بدمعاشی کرنے کی حماقت کی تو سختی سے نمٹیں گے۔
پنجاب کے وزیر داخلہ عطا تارڑ نے میڈیا سے گفتگو میں کہا کہ عمران اینڈ کمپنی عوام کے فیصلے کو تسلیم کرے اور عوام کے فیصلے کو بدلنے کے لیے غیر قانونی ہتھکنڈوں سے باز رہے۔
انہوں نے کہا کہ عوام کے ووٹ کی عزت کو یقینی بنائیں گے جبکہ سیاسی مخالفین بھی ووٹ کو عزت دیں اور دھاندلی سے دور رہیں۔
عطا تارڑ نے کہا کہ شفاف، آزادانہ اور غیرجانبدارانہ الیکشن کا انعقاد یقینی بنائیں گے او کسی نے غنڈہ گردی یا بدمعاشی کرنے کی حماقت کی تو سختی سے نمٹیں گے۔
انہوں نے کہا کہ شرانگیزی، فساد اور غنڈہ گردی نہیں ہونے دیں گے اور کے علاوہ انتخابات کے انعقاد کی آئینی ذمہ داری پوری کرنے میں الیکشن کمیشن کا بھرپور ساتھ دیں گے۔

کراچی: (ویب ڈیسک) بھارتی ایئر لائن کے ایک اور طیارے نے فنی خرابی کے باعث پاکستان میں ہنگامی لینڈنگ کی۔
پاکستان سول ایوی ایشن (سی اے اے) ذرائع کے مطابق بھارت کی نجی ایئر لائن کا طیارہ بھارتی شہر حیدر آباد سے شارجہ کے لیے روانہ ہوا تھا کہ فنی خرابی کے باعث اسے کراچی ایئرپورٹ پر ہنگامی لینڈنگ کرنا پڑی۔
ایئر انڈیگو کے جہاز اے ٹی سی سے اجازت کے بعد جناح انٹرنیشنل ائرپورٹ پر صبح 7:30 پر اترا، جہاز کے انجن میں خرابی ہو گئی تھی۔ طیارے کے کپتان نے کراچی میں ہنگامی لینڈنگ کی اجازت مانگی اور اجازت ملنے پر بھارتی نجی ایئر لائن کے طیارے کے کپتان نے طیارے کو بحفاظت کراچی ایئرپورٹ پر اتار لیا۔
مذکورہ بھارتی طیارے میں 186 مسافر سوار تھے جنہیں ٹرانزٹ لاؤنج میں رکنے کی اجازت دی گئی۔ اب متبادل جہاز مسافروں کو لینے کے لیے احمد آباد سے کراچی کے لیے روانہ ہو گا۔
واضح رہے کہ اس سے قبل انڈین ایئرلائن اسپائس جیٹ کی پرواز ایس جی 9911 کی دہلی سے دبئی کی پرواز نے 5 جولائی کی صبح کراچی میں ہنگامی لینڈنگ کی تھی ایئرلائن اسپائس جیٹ کی دہلی سے دبئی کی پرواز نے فنی خرابی کے باعث منگل کی صبح سوا 9 بجے کراچی ایئرپورٹ پر ہنگامی لینڈنگ کی تھی۔ پی آئی اے انجینئرز نے بوئنگ 737 طیارے کا معائنہ کیا، طیارہ کو اگلی پرواز کے لیے کلیئر قرار نہیں دیا گیا۔

ملتان: (ویب ڈیسک) سابق وزیر خارجہ اور پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ پولیس کا رویہ غیر جانبدار اور بالکل مناسب ہے۔
پی ٹی آئی کے رہنما شاہ محمود قریشی نے میڈیا سے گفتگو کرتے ہوئے کہا کہ 2 پولنگ اسٹیشنز سے شکایات آ رہی ہیں۔ ملت کالج ممتاز آباد سے شکایت آئی ہے اور پولنگ اسٹیشنز کے اندر وہی ایجنٹ ہو جن کے پاس مجاز اتھارٹی ہو۔
انہوں نے کہا کہ یونین کونسل 62 کے خواتین پولنگ اسٹیشن پر ابھی تک عملہ نہیں پہنچا تاہم پولیس الرٹ دکھائی دے رہی ہے اور پولیس کا رویہ غیر جانبدار اور بالکل مناسب ہے۔ بارش نہ ہو تو اچھا ٹرن آوٹ رہے گا۔
شاہ محمود قریشی نے کہا کہ ووٹرز جلد از جلد پولنگ اسٹیشنز پر پہنچ کر ووٹ کاسٹ کریں۔ چیئرمین پی ٹی آئی عمران خان نے فرنٹ فٹ پر پارٹی کی کمپین کی اور تحریک انصاف کو اس الیکشن میں مطمئن ہونا چاہیے۔ میں وہی بات کروں گا جو میں نے دیکھا ہو۔ اس وقت پولنگ پرامن طور پر ہو رہی ہے۔
انہوں نے کہا کہ مجھے پی ٹی آئی اس وقت ڈٹی ہوئی نظر آئی اور میں نے ہمیشہ کوشش کہ دروغ گوئی سے کام نہ لیا جائے۔

اسلام آباد: (ویب ڈیسک) وزیر داخلہ رانا ثنا اللہ نے کہا ہے کہ سیکیورٹی فورسز شرپسند عناصر پر بھی کڑی نظر رکھے ہوئے ہیں۔
وزیر داخلہ رانا ثنا اللہ نے میڈیا سے گفتگو کرتے ہوئے کہا کہ ضمنی انتخابات کے تمام حلقوں میں سیکیورٹی ہائی الرٹ ہے اور الیکشن کمیشن کی درخواست پر سول آرمڈ فورسز تمام حلقوں میں تعینات کیا گیا ہے۔
انہوں نے کہا کہ انتہائی حساس انتخابی حلقوں میں سیکیورٹی فورسز کی اضافی نفری تعینات کی گئی ہے جبکہ رینجرز اور ایف سی کے علاوہ فوج بھی بطور کوئیک ریسپانس فورس فرائض سرانجام دے رہی ہے۔ وزارت داخلہ میں مانیٹرنگ سیل بھی قائم کر دیا گیا ہے۔
رانا ثنا اللہ نے کہا کہ مانیٹرنگ سیل انتخابی حلقوں میں سیکیورٹی صورت حال کی مسلسل نگرانی کر رہا ہے اور مانیٹرنگ سیل پنجاب، سندھ کی صوبائی حکومتوں اور سول آرمڈ فورسز ہیڈ کوارٹر کے ساتھ منسلک ہے۔
انہوں نے کہا کہ قانون نافذ کرنے والے ادارے پوری طرح چوکس ہیں اور کسی بھی ایمرجنسی صورت حال میں بلا تاخیر ریسپانس کریں گے۔ تمام حلقوں میں آتشی اسلحہ کی نمائش اور ساتھ رکھنے پر مکمل پابندی ہے۔ سیکیورٹی فورسز شرپسند عناصر پر بھی کڑی نظر رکھے ہوئے ہیں۔
وزیر داخلہ نے کہا کہ شرپسند عناصر کے خلاف زیرو ٹالرینس ہے اور عوام بلا خوف انتخابات میں اپنا حق رائے دہی استعمال کریں۔ کسی بھی شکایت کی صورت میں قانون نافذ کرنے والے اداروں سے رابطہ کریں۔

لاہور: (ویب ڈیسک) پی ٹی آئی رہنما شہباز گل نے کہا ہے کہ دھاندلی کا آغاز کر دیا گیا۔تمام جماعتیں، حکومتی مشینری ایک طرف دوسری طرف عوام ،عمران خان اور پی ٹی آئی، جیت حق کی ہوگی۔
رہنما پی ٹی آئی شہباز گل نے الزام عائد کیا ہے کہ ڈی سی او مظفر گڑھ شریف خاندان کا غلام ہے۔ شہباز گل نے دھمکی دی ہے کہ ڈی سی او کو قانون کے اندر رہ کر نشان عبرت بنائیں گے۔
شہباز گل نے کہا ہے کہ پی پی272پولنگ اسٹیشن44اور46سے ہمارے پولنگ ایجنٹس کو نکالا گیا،ہمارے ایجنٹ کے خلاف ایف آئی آر کاٹی گئی ،دونوں حلقوں میں 10سے15ہزار جعلی ووٹ ڈالے جائیں گے،تحریک کا انتخابی کیمپ متحرک ہے۔
شہباز گل کے مطابق انہیں خالی ڈبے اور بیلٹ پیپر چیک نہیں کرنے دئیے گئے۔ فارم 46 شفافیت ختم کر دی گئی۔ اب پتہ نہیں اس پولنگ سٹیشن پر کتنے جعلی ووٹ ڈالے جائیں گے۔دھاندلی کا آغاز کر دیا گیا۔
رہنما پی ٹی آئی کے مطابق تمام جماعتیں، حکومتی مشینری ایک طرف دوسری طرف عوام ،عمران خان اور پی ٹی آئی، جیت حق کی ہوگی۔
انہوں نے شہریوں سے درخواست کی کہ جن حلقوں میں الیکشن ہیں وہاں سب لوگ اپنا ووٹ کاسٹ کریں اور فراڈیوں پر نظر رکھیں۔