اسلام آباد: (ویب ڈیسک) پی ٹی آئی رہنما شہباز گل کا کہنا ہے کہ پہلی حکومت ہے جس نے دشمن کی سازش کو ناکام بنانے کے لئے خوداپنے ہاتھ سے اپناخاتمہ کر دیا۔
شہباز گل نے ٹوئٹ کرتے ہوئے لکھا کہ وفاداری کا اصول راشد منہاس شہید طے کر گئے تھے۔ اگر زندگی دشمن کی قید و غلامی میں ہو گی تو اپنے ہاتھوں آپ زندگی ختم کر کے غلامی سے انکار کر دو۔
گزشتہ روز کی صورتحال پر شہباز گل نے مزید لکھا کہ پہلی حکومت ہے جس نے دشمن کی سازش کو ناکام بنانے کے لئے خوداپنے ہاتھ سے اپنا خاتما کر دیا، غلامی کسی صورت قبول نہیں۔
یاد رہے گزشتہ روز ڈپٹی اسپیکر قومی اسمبلی نے تحریک عدم اعتماد کی قرارداد کو مسترد کرتے ہوئے رولنگ روک دی تھی۔ انہوں نے کہا کہ عدم اعتماد کی تحریک آئین کی رو کے منافی ہے۔
ڈپٹی اسپیکر کا کہنا تھا کہ تحریک اعتماد عالمی سازش کے تحت لائی جا رہی ہے اسے مسترد کرتے ہیں، وفاقی وزیر کی جانب سے اٹھائے گئے نکات بالکل درست ہیں۔

اسلام آباد: (ویب ڈیسک) وزیراعظم عمران خان آج سہ پہر عوام سے براہ راست ٹیلی فون پر بات چیت کریں گے.
جس میں وہ عوام کی جانب سے پوچھے گئے سوالات کا جواب دیں گے۔
یہ بھی پڑھیں: عمران خان کی جانب سے کل نگران وزیراعظم کیلئے نام شہباز شریف کو بھجوانے کا امکان
ذرائع کا کہنا تھا کہ عوام کے لیے ٹیلی فون لائنز بھی اسی وقت کھولی جائیں گی اور یہ سلسلہ ٹیلی ویژن، ریڈیو اور ڈیجیٹل میڈیا پر ایک ساتھ نشر ہوگا۔

اسلام آباد: (ویب ڈیسک) فواد چودھری نے کہا ہے کہ اپوزیشن الیکشن سے کیوں بھاگ رہی ہے ؟ آخری فیصلہ عوام کا ہوگا، الیکشن کیلئے تیار ہیں۔
پاکستان تحریک انصاف کے رہنما فواد چودھری نے سپریم کورٹ کے باہر میڈیا سے گفتگو کرتے ہوئے کہا کہ متحدہ اپوزیشن چوں چوں کا مربہ ہے، شہزاد اکبر بھاگے نہیں یہاں ہی موجود ہیں، شہزاد اکبر باہر نہیں جائیں گے آپ لوگ اندر جائیں گے، اپوزیشن سپریم کورٹ کے بنچ پر تنقید کر رہی ہے، اپوزیشن کو بھاگنے کا راستہ نہیں ملے گا۔
فواد چودھری کا کہنا تھا کہ آئین کی دھجیاں بکھیرنے والے آئین کی باتیں کر رہے ہیں، اسپیکر کی رولنگ کو آئین سے بغاوت قرار دیا جا رہا ہے، عمران خان نے احتجاج کی کال دی تو آپ کو بھاگنے کا راستہ نہیں ملے گا، شہباز شریف نے کہا وہ نگران وزیراعظم کیلئے مشاورت کا حصہ نہیں بنیں گے، مشاورت کا حصہ نہ بننا ان کی مرضی ہے۔

لاہور: (ویب ڈیسک) منی لانڈرنگ کیس میں عدالت نے شہباز شریف کی ضمانت منسوخی کی درخواست مسترد کر دی۔
منی لانڈرنگ کیس میں شہباز شریف کی ضمانت منسوخ کرانے کی ایف آئی اے کی درخواست پر سماعت ہوئی۔ وکیل ایف آئی اے نے موقف اپنایا کہ شہباز شریف عبوری ضمانت پر ہیں، شہباز شریف کا ہر صورت عدالت میں پیش ہونا ضروری ہے۔
جج سپیشل کورٹ نے استفسار کیا کہ عدالت اپنے حکم پر کیسے نظر ثانی کر سکتی ہے۔ جس پر وکیل ایف آئی اے نے کہا کہ اعلی عدالتوں کی دو نظیریں پیش کی ہیں جس کے مطابق عدالت کے پاس اختیار ہے۔

اسلام آباد: (ویب ڈیسک) بلاول بھٹو نے کہا ہے کہ سپریم کورٹ عمران خان کو آئین شکنی سے روکے، کل جمہوری عمل سبوتاژ کیا گیا، عدالت عظمیٰ غیر آئینی اقدام کے خلاف فل کورٹ بنچ تشکیل دے، خان صاحب نے اپوزیشن کے پریشر میں آکر خودکشی کرلی، سلیکٹڈ حکومت جانے کی خوشی سے زیادہ آئین شکنی پرتشویش ہے، آئین کا تحفظ تمام سیاسی جماعتوں کی ذمہ داری ہے۔
بلاول بھٹو نے متحدہ اپوزیشن رہنماؤں کے ہمراہ پریس کانفرنس کرتے ہوئے کہا کہ کل قومی اسمبلی میں آئین کو توڑا گیا، تحریک عدم اعتماد وزیراعظم کو ہٹانے کا جمہوری طریقہ تھا، وزیراعظم کو اندازہ نہیں کہ ہوا کیا ہے، جمہوری عمل کو سبوتاژ کیا گیا، آئین کا دفاع ہر پاکستانی کی ذمہ داری ہے، کارکن جشن منا رہے ہیں کہ عمران خان کی حکومت ختم ہوگئی، ہمیں آئین کو توڑے جانے پر زیادہ تشویش ہے۔
چیئرمین پیپلزپارٹی نے کہا کہ ہم نے عدم اعتماد کے ذریعے حکومت کا جینا حرام کیا، یہ اپنی حکومت ختم ہونے پر جشن منا رہے ہیں، ہم جمہوریت اور آئین کا تحفظ کرنیوالے ہیں، اپنی انا کی وجہ سے عمران نیازی نے یہ سب کیا، عدم اعتماد سے پہلے مستعفی ہو کر جمہوری عمل مکمل کیا جاسکتا تھا، عوام فیصلہ کریں عمران خان کی انا اہم یا آئین۔ بلاول بھٹو نے معاملے پر فل کورٹ بنچ تشکیل دینے کا مطالبہ کر دیا۔
قبل ازیں شہباز شریف نے کہا کہ عمران نیازی نے کل سویلین مارشل لا نافذ کیا، 3 نومبر 2007 کو مشرف نے بھی یہی غیر آئینی حرکت کی تھی، عمران خان اور ان کے حواریوں نے آئین کی واضح خلاف ورزی کی، گزشتہ دن ملکی سیاست میں سیاہ دن کے طور پر یاد رکھا جائے گا، تحریک کو ہر صورت کل ووٹنگ کیلئے پیش کیا جانا تھا، عمران نیازی نے ڈپٹی اسپیکر کو اپنا آلہ کار بنایا، انہوں نے جمہوریت کو مسخ کیا، آئین شکنی کی۔
لیگی رہنما کا کہنا تھا کہ سپریم کورٹ نے کہا کوئی ماورائے آئین اقدام نہ کیا جائے، ماورائے آئین اقدام تو عمران نیازی اٹھا چکا ہے، اٹارنی جنرل نے کہا تھا ووٹنگ ہر صورت ہوگی، اگر مراسلہ آچکا تھا تو 24 مارچ کو اعتراض کیوں نہیں اٹھایا گیا، عمران نیازی اپنی سیاسی شکست کا سامنا نہیں کر سکتے تھے۔