اسلام آباد: (ویب ڈیسک) محکمہ موسمیات کی سانحہ مری سے متعلق رپورٹ سامنے آگئی، رپورٹ میں کہا گیا ہے کہ مری کی خراب صورتحال سے متعلق وزیراعظم آفس سمیت متعلقہ اداروں کو 2 روزقبل ہی الرٹ کیا گیا تھا۔
رپورٹ میں کہا گیا ہے کہ مری میں شدید برفباری اورسڑکوں کی بندش سے متعلق وزیراعظم آفس اوراین ڈی ایم اے کو پیشگی اطلاع دی گئی۔ 5 جنوری کو ایڈوائزری جاری کی، واضح طور پر بتایا گیا تھا کہ شدید برفباری کے باعث سڑکیں بند ہو سکتی ہیں۔
رپورٹ کے مطابق بروقت اطلاع دیکر بتایا گیا تھا کہ مری، نتھیا گلی، کاغان، گلیات سمیت مختلف علاقوں میں شدید برفباری ہوگی، موسم سے متعلق ایوی ایشن ڈویژن، پی ڈی ایم اے، ایس ڈی ایم اے، وزارت موسمیاتی تبدیلی کو آگاہ کیا گیا تھا۔
وزارت آبی وسائل، وزارت فوڈ سکیورٹی، ارسا، چیئرمین ایف ایف سی اور محکمہ موسمیات کے ریجنل دفاتر کو بھی اطلاع دی گئی، مری میں 7 اور 8 جنوری کے درمیان 16.5 انچز برفباری ریکارڈ کی گئی۔

اسلام آباد: (ویب ڈیسک) اسلام آباد کے ننھے طلباء کے لیے بڑی خوشخبری، وفاقی وزارت تعلیم نے وفاقی سرکاری تعلیمی اداروں میں بکس فری پروگرام متعارف کروا دیا۔ پرائمری تک ننھے طلباء کو بھاری بھرکم اسکول بیگز سے نجات ملے گی۔
اسلام آباد میں وفاقی وزارت تعلیم کے زیر اہتمام بکس فری پروگرام کی افتتاحی تقریب کا انعقاد کیا گیا۔ پارلیمانی سیکریڑی تعلیم وجہیہ قمر نے کہا ہے کہ بکس فری بیگز پروگرام کا مقصد بچوں کی ذہنی اور جسمانی مسائل کو ختم کرنا ہے، اس سسٹم کے ذریعے کتابوں کا ایک سیٹ گھر اور ایک سکول میں رکھا جائیگا۔یہ پروگرام صرف اسلام آباد تک محدود نہیں رہے گا بلکہ کوشش کی جائے گی کہ اسے دیہی علاقوں تک پھیلایا جائے۔ تعلیمی اداروں میں نئے تعلیمی سال کے آغاز پر یہ سسٹم لاگو کیا جائے گا۔

لاہور: (ویب ڈیسک) لاہور ہائیکورٹ نے پنجاب میں میڈیکولیگل سرٹیفکیٹ جاری کرنیوالے 90 فیصد ڈاکٹرز کو ناتجربہ کار قرار دیتے ہوئے کہا کہ نوے فیصد طبی عملہ جانتا ہی نہیں کہ زخمی کا طبی معائنہ کیسے کرنا ہے ۔ لاہور ہائیکورٹ کے جسٹس علی ضیا باجوہ نے محمد ناصر کی اندراج مقدمہ کیلئے دائر درخواست پر 13 صفحات پر مشتمل فیصلہ جاری کیا۔ محمد ناصر نے زخمی ہونے پر اندراج مقدمہ کیلئے عدالت سے رجوع کیا تھا.عدالت نے محمد ناصر کی اندراج مقدمہ کی درخواست واپس لینے کی بنیاد پر نمٹا دی۔ عدالتی فیصلے میں کہا گیا ہے کہ پنجاب میں میڈیکولیگل سرٹیفکیٹ جاری کرنیوالے 90 فیصد ڈاکٹرز ناتجربہ کارہیں ، نوے فیصد طبی عملہ جانتا ہی نہیں کہ زخمی کا طبی معائنہ کیسے کرنا ہے۔ چئیرمین ڈسٹرکٹ اسٹینڈنگ میڈیکل بورڈ بہرہ بنا ہوا ہے۔ عدالتی فیصلے میں حکم دیا گیا ہے کم از کم اہلیت پر پورا نہ اترنے والے ماہرین نہیں کہلائے جاسکتے.میڈیکولیگل فوجداری کیسز کے فیصلے میں اہم کردار ادا کرتا ہے۔ ڈاکٹر میڈیکولیگل سرٹیفیکیٹ رائے کی وجوہات بتانے کا پابند ہوگا۔ طبی معائنہ کار کی رائے کی وجوہات پر علیحدہ خانہ بنایا جائے. عدالتی فیصلہ میں حکم دیا گیا ہے محکمہ صحت ناتجربہ کارڈاکٹر کو سرٹیفکیٹ کی ذمہ داری نہ دے.طبی معائنہ کار کی کم از کم اہلیت کو پیمانہ بنایا جائے. ڈاکٹرز کی محض ایک ماہ تربیت انتہائی کم ہے. میڈیکولیگل کیلئے تربیت کے دورانیہ کو ایک ماہ سے بڑھایا جائے۔ عدالت نے ریمارکس دیے کہ ڈاکٹر اور اسکے نگران ادارے فوجداری انصاف کو بھول چکے ہیں۔

لاہور: (ویب ڈیسک) پنجاب میں اگلا تعلیمی سال 8 ماہ کا ہو گا اور نصاب میں 20 فیصد کمی کا فیصلہ کیا گیا ہے۔
محکمہ اسکول ایجوکیشن کے جاری کردہ نوٹیفکیشن کے مطابق اگلے تعلیمی سال میں نصاب کو مختصر کیا جائے گا اور اسکولوں کے نصاب کو 20 فیصد تک کم کرنے کا فیصلہ کر لیا گیا۔
نصاب مختصر کرنے کے لیے محکمہ اسکول ایجوکیشن ٹیکسٹ بک بورڈ کو ہدایات دے گا۔
محکمہ اسکول ایجوکیشن کے مطابق 2023 میں میٹرک اور انٹر امتحانات اسمارٹ نظام کے تحت ہوں گے اور نصاب میں کمی اگلا تعلیم سال مختصر ہونے کی وجہ سے کی جائے گی۔
اگلا تعلیمی سال ستمبر 2022 سے شروع ہو کر 2023 مارچ میں ختم ہو گا۔
دوسری جانب محکمہ تعلیم سندھ نے تمام سرکاری و نجی اسکولوں کے لیے نوٹیفکیشن جاری کر دیا جس کے مطابق 12 برس سے کم عمر 50 فیصد بچے ایک روز اسکول آئیں گے تاہم 12 برس سے زائد عمر کے بچوں کی کلاسز ہوں گی۔
محکمہ تعلیم سندھ کے نوٹیفکیشن کے مطابق 12 برس سے زائد عمر کے بچوں کے لیے یکم فروری تک ایک ویکسین لگوانا لازمی ہو گا اور بیماری کے علاوہ ویکسی نیشن نہ لگوانے کا کوئی بھی عذر قابل قبول نہ ہو گا۔
نوٹیفکیشن کے مطابق اسکولوں میں بچوں کے ٹیسٹنگ کی مہم جاری رکھی جائے گی۔

اسلام آباد: (ویب ڈیسک) وزیر اعظم عمران خان کے معاون خصوصی شہباز گل نے کہا ہے کہ جب دنیا کورونا سے لڑی تب ہم کرپشن سے نبرد آزما رہے۔
وزیر اعظم عمران خان کے معاون خصوصی شہباز گل نے اپنے ایک بیان میں کہا کہ کورونا وائرس کے بعد معمولات زندگی کی بحالی کی درجہ بندی معیشت دانوں نے کی ہے اور ان کے مطابق دنیا میں پاکستان اس وقت دوسرے نمبر پر ہے۔
انہوں نے کہا کہ اقوام متحدہ اور عالمی ادارہ صحت (ڈبلیو ایچ او) پہلے ہی پاکستان کی کورونا سے متعلق پالیسی کو سراہ چکے ہیں۔ کورونا وائرس کے دوران دنیا صرف کورونا سے لڑ رہی تھی لیکن ہم بد حال ادارے اور کرپشن سے نبرد آزما رہے۔
شہباز گل نے کہا کہ وزیر اعظم کی بہترین حکمت عملی کی بدولت پاکستان نے کورونا کا مقابلہ کیا اور ہم نے تباہ حال معیشت کو بھی پاؤں پر کھڑا کیا۔