دبئی ائیر شو 2021 میں پاکستانی کمپنی نے 14 کروڑ 40 لاکھ اماراتی درہم (تقریباً 7 ارب روپے سے زائد) کا دفاعی معاہدہ حاصل کرلیا۔

خلیجی اخبارکے مطابق اماراتی وزارت دفاع نے نمائش کے چوتھے روز 7 بڑے دفاعی معاہدے کیے ہیں جن کی مالیت ساڑھے 22 ارب اماراتی درہم ہے۔

وزارت دفاع کے ترجمان لیفٹیننٹ کرنل سارہ حمد الحجری نے بتایا کے پاکستانی کمپنی  ‘گلوبل انڈسٹریل اینڈ ڈیفنس سلیوشن’ (جی آئی ڈی ایس) کے ساتھ مختلف ہتھیاروں کی فراہمی کے لیے14کروڑ 40 لاکھ درہم کا معاہدہ ہوا ہے۔

لیفٹیننٹ کرنل سارہ حمد الحجری نے بتایا کہ اس کے علاوہ  امریکی کمپنی ‘لاک ہیڈ مارٹن گلوبل انک ‘کے ساتھ ائیر فورس اور ائیر ڈیفنس کمانڈ سسٹمز کے لیے تکنیکی معاونت اور اسپیئر پارٹس کی خریداری کا بھی معاہدہ کیا گیا ہے۔

انہوں نے مزید بتایا کہ اس کے علاوہ  فرانسیسی کمپنی THALES کے ساتھ کمیونیکیشن سسٹم کے لیے تکنیکی معاونت اور مرمت کی خدمات کی فراہمی کے لیے بھی معاہدہ ہوا ہے، یہی کمپنی اماراتی  فضائیہ کو تکنیکی مدد بھی فراہم کرے گی۔

چین اور اسرائیل کے صدور کے درمیان پہلی مرتبہ فون پر رابطہ ہوا ہے۔
خبرایجنسی کے مطابق اسرائیل کےصدر اسحاق ہرزوگ اور چینی صدر شی جن پنگ کے دوران ٹیلی فونک رابطہ ہوا، دونوں ممالک کے صدور کے درمیان یہ پہلا ٹیلی فونک رابطہ ہے۔
چینی میڈیا کے مطابق صدر شی جن پنگ کا کہنا تھا کہ چین اسرائیل کے ساتھ جامع شراکت داری اور صحت مند و مستحکم ترقی کے فروغ کےلیے تیار ہے۔
چینی صدرکا کہنا تھا کہ چین اسرائیل کے ساتھ سائنس و ٹیکنالوجی، زراعت اور صحت کے شعبے میں تعاون بڑھانا چاہتا ہے۔
خبر ایجنسی کے مطابق اسرائیلی صدر نے ایران کے جوہری پروگرام کامعاملہ بھی اٹھایا۔
اس کے علاوہ اسرائیلی صدر کا کہنا تھا کہ اسرائیل چین کے ساتھ سائنس و ٹیکنالوجی، معاشی ترقی، زراعت اور کھیلوں سمیت دیگر شعبوں میں تعاون کا خواہاں ہے۔
خیال رہے کہ چین اور اسرائیل نے 1992 میں سفارتی تعلقات قائم کیےتھے اور دونوں ممالک کے صدور کے درمیان یہ رابطہ ایسے وقت ہوا ہے جب 2 ماہ بعد دونوں کے سفارتی تعلقات کے قیام کو 30 سال ہونے جارہے ہیں۔

امریکا محکمہ خارجہ نے کہا ہے کہ ایران دہشت گردوں اور ان کی معاونت کرنے والا دنیا کا سب سے بڑا ملک ہے، جب کہ دولت اسلامہ ابھی تک امریکا کے لیے خطرہ ہے۔
العربیہ نیوز کے مطابق امریکی اسٹیٹ ڈیپارٹمنٹ نے اپنے بیان میں کہا ہے کہ دہشت گردوں کی سرپرستی اور ان کی مالی امداد کرنے والے ممالک میں ایران سر فہرست ہے اور واشنگٹن حزب اللہ کو دہشت گرد تنظیم قراردینے کے لیے مزید حکومتوں سے درخواست کر رہا ہے۔
امریکی انسدادِ دہشت گردی بیورو کے قائم مقام ڈپٹی کرس لینڈ برگ کا کہنا ہے کہ ہمارا ادارہ حزب اللہ کے خلاف سفارتی مہم چلا رہا ہے اور ہم نے متعدد ملکوں سے درخواست کی ہے کہ وہ اس آرگنائزیشن کو مکمل طور پر دہشت گرد تنظیم قرار دیتے ہوئے اپنے ملکوں میں اس کی سرگرمیوں پر پابندیاں عائد کریں۔
کرس کا مزید کہنا تھا کہ دولت اسلامیہ اپنے زیر اثرعراق اور شام کی مکمل آزادی کے باوجود دنیا بھر میں اپنی سرگرمیوں کو بڑھا رہی ہے اور یہ امریکا اس کے اتحادیوں اور بیرون ملک ان کے مفادات کے لیے ابھی تک بڑا خطرہ ہے۔ ان کا کہنا تھا کہ اگر چہ ہم دولت اسلامیہ، القائدہ اور ان کی اتحادی تنظیمیں سے امریکا کو لاحق براہ راست حملے کی صلاحیتوں کو کم کرچکے ہیں لیکن یہ ابھی بھی ہمارے لیے خطرہ ہیں۔
ان کا کہنا تھا کہ ایران ان تنظیموں کو ٹیکنالوجی کے ساتھ ساتھ اسلحہ اور مالی معاونت فراہم کرر ہا ہے جس سے ان کی خطے کے پار حملہ کرنے کی صلاحیت بڑھ رہی ہے۔ انہوں نے مزید کہا کہ ایران کے حامی گروپس شام، عراق اور یمن میں مشرق وسطی اور دنیا کو غیر مستحکم کرنے کی خطرناک سرگرمیوں کو جاری رکھے ہوئے ہیں۔

ترکی میں 5.6 شدت کے زلزلے کے جھٹکوں سے عمارتیں لرز گئیں اور خوف زدہ شہری گھروں سے نکل کر کھلے مقام پر جمع ہوگئے۔
عالمی خبر رساں ادارے کے مطابق ترکی کے شہر استنبول کے مختلف علاقوں میں زلزلے کے جھٹکے محسوس کیے گئے، زلزلے کی شدت ریکٹر اسکیل پر 5.3 ریکارڈ کی گئی جب کہ اس کا مرکز استنبول سے 133 میل کی دوری پر مشرقی علاقے میں تھا اور گہرائی 10 کلومیٹر تھی۔
خوش قسمتی سے زلزلے کے جھٹکوں میں کوئی جانی یا مالی نقصان نہیں ہوا تاہم چند عمارتوں کو معمولی نقصان پہنچا ہے۔ ریسکیو اداروں کے لیے الرٹ جاری کردیا گیا ہے۔
ترکی کے ڈیزازٹر منیجمنٹ کے ادارے نے خبردار کیا ہے کہ زلزلے سے جھٹکوں کے بعد آفٹر شاکٹس کا امکان ہے اس لیے شہری احتیاط برتیں۔
واضح رہے کہ گزشتہ برس اکتوبر میں ترکی میں آنے والے زلزلے میں درجنوں عمارتیں زمین بوس ہوگئی تھیں اور 25 سے زائد افراد لقمہ اجل بن گئے تھے۔