"میں پاکستان سے محبت کرتا ہوں” لکھنے پر بھارتی شہری پر مقدمہ

کراچی; اتر پردیش کے تبریز عالم نے سوشل میڈیا پر "آئی لو یو پاکستان” لکھا۔ پولیس نے اسے ملک کے خلاف سمجھ کر مقدمہ بنا دیا۔ بھارتی میڈیا کے مطابق ہندوستان کی ریاست اتر پردیش کے شہر بریلی میں ایک شخص تبریز عالم کے سوشل میڈیا پر "آئی لو یو پاکستان” کے پیغام نے ہنگامہ برپا کر دیا۔ خبر رساں ادارے کے مطابق، پولیس نے اسے قومی یکجہتی کے خلاف اقدام قرار دیتے ہوئے بھارتیہ نیایا سنہتا کی دفعہ 152 کے تحت مقدمہ درج کر لیا۔ ایزت نگر کے ایس ایچ او ویجندر سنگھ نے بتایا کہ ملزم تبریز عالم شکارپور چوہدری گوٹیا کا رہائشی ہے۔ یہ واقعہ اس وقت منظر عام پر آیا جب ایک ایکس گروپ "اکھنڈ بھارت سنکلپ ناتھ نگری 25” نے تبریز کی فیس بک پوسٹ کو اجاگر کیا۔ گروپ نے الزام لگایا کہ اس پوسٹ سے ہندوستان کی وحدت و سالمیت کو نقصان پہنچا اور ملزم کے خلاف سخت کارروائی کا مطالبہ کیا۔ پولیس نے کہا،یہ پیغام ملکی سالمیت کے منافی ہے۔ اس کے خلاف ایف آئی آردرج کر لی گئی ہے اور تفتیش شروع ہو چکی ہے۔ پولیس کے مطابق، تبریز پر ماضی میں ایک ہندو لڑکی کو اغوا کرنے کا الزام بھی عائد کیا گیا تھا۔ لڑکی کے والد کی شکایت کے مطابق، تبریز نے لڑکی کو زیورات اور نقدی کے ساتھ گھر سے بھاگنے پر مجبور کیا اور اسے غازی آباد لے جا کر مذہب تبدیل کرنے کی کوشش کی۔