سینٹرل جیل اڈیالہ میں پی ٹی آئی رہنماؤں، فیملی اور وکلاء کو بانی  سے ملاقات کی اجازت نہ مل سکی۔

پی ٹی آئی خیبر پختونخوا کے صدر جنید اکبر خان ،علامہ حامد رضا، شاندانہ گلزار ، احمد بچھر ،عامر ڈوگر ، نثار جٹ، ثناء اللہ مستی خیل ، ڈاکٹر امجد ، عاطف خان ، علی خان جدون ،صوبائی وزیرسہیل آفریدی ، مصدق عباسی ، مشعال یوسفزئی اور سیمابیہ طاہر ملاقات کے لیے دن ایک بجے جیل پہنچ گئے تاہم  حکام نے  بار بار انتظار  کا کہا۔

چار بجے اسسٹنٹ سپرنٹنڈنٹ  جیل نے سب کوگیٹ پر بلا کر بتایا کہ ملاقات کی اجازت نہیں ہے۔

سیہون شریف میں سوشل میڈیا پر بم کی موجودگی کی جھوٹی افواہ نے علاقے میں سنسنی پھیلادی۔

اطلاعات کے مطابق سوشل میڈیا پر ایک غیر مصدقہ خبر گردش کرنے لگی کہ سیہون شریف میں بم رکھا گیا ہے، جس کے بعد مقامی عوام میں شدید خوف و ہراس کی لہر دوڑ گئی۔

جس پر پولیس اور دیگر ادارے فوراً حرکت میں آ گئے، پولیس نے فوری طور پر کارروائی شروع کی اور علاقے کی مکمل تلاشی لی، تاہم، بم کی کوئی بھی نشاندہی نہ ہو سکی۔

ایس ایس پی جامشورو ظفر صدیق جھانگا نے واقعے کی فوری تحقیقات کا حکم دے دیا۔ انہوں نے کہا کہ جھوٹی افواہیں پھیلانے والے عناصر کے خلاف سخت کارروائی کی جائے گی تاکہ آئندہ ایسی غلط اطلاعات سے عوام میں خوف و ہراس نہ پھیلے۔

تیموریہ پولیس نے بفرزون میں 10 سالہ صائم کو کچلنے والے واٹر ٹینکر کے گرفتار ڈرائیور سراج ولد جمعہ کے خلاف مقدمہ درج کر لیا۔

مقدمہ الزام نمبر 153/2025 بجرم دفعہ 320 کے تحت جاں بحق ہونے والے بچے کے والد شیخ عبدالرحمان ولد شیخ محمد عباس کی مدعیت میں درج کیا گیا۔

مدعی مقدمہ نے پولیس کو اپنے بیان میں بتایا کہ وہ مکان نمبر R-406/A سیکٹر 16/A شاہ خالد بن عبدالعزیز کالونی سوسائٹی بفرزون کا رہائشی اور پرائیوٹ ملازمت کرتا ہے۔

شیخ عبدالرحمان نے پولیس کو بتایا کہ وہ جمعرات کو اپنے گھر پر موجود تھا کہ رات تقریباً 7 بجکر 50 منٹ پر محلے والوں نے اطلاع دی کہ آپ کے بیٹے صائم کو پانی کے ٹینکر نے ٹکر مار دی ہے جو گھر کے قریب گارمنٹ فیکٹری والے کو پانی دیتا ہے۔

اس اطلاع پر میں فورا گھر سے باہر نکلا اور میں نے دیکھا کہ میرا بیٹا ٹرک کے پیچھے زمین پر پڑا ہوا ہے اور اس کے سر سے خون نکل رہا ہے اور سرکچلا ہوا ہے جبکہ ٹینکر کا ڈرائیور ٹینکر چھوڑ کر فیکٹری میں جا کر چھپ گیا۔

اس اثنا میں پولیس بھی وہاں آگئی ، میں اپنے بیٹے کو ایدھی ایمبولینس کے ذریعے عباسی شہید اسپتال لے کر گیا ، ڈاکٹروں نے میرے بیٹے کی موت کی تصدیق کے بعد اس کا پوسٹ مارٹم کیا۔

پولیس افسر نے ضروری قانونی کارروائی کے بعد لاش تدفین کے لیے سپرد کی ، اب میں تھانے آکر اپنا بیان دے رہا ہوں ، میرا دعویٰ ہے کہ پانی کے ٹینکر نمبر TKD-840 کے ڈرائیور جس کا نام سراج ولد جمعہ معلوم ہوا پر میرے بیٹے صائم ولد شیخ عبد الرحمان کو ٹینکر کی ٹکر مار کر ہلاک کرنے کرنے پر کارروائی کی جائے ۔

قصور کے علاقے کھارا چوک کے قریب ایک افسوسناک حادثہ پیش آیا، جس میں کیری ڈبہ ڈرائیور سے بے قابو ہو کر نالے میں جا گری۔

حادثے کے نتیجے میں کیری ڈبہ میں سوار 8 افراد جاں بحق ہو گئے، ابتدائی اطلاعات کے مطابق حادثہ ڈرائیور کی غفلت کے باعث پیش آیا جسے دوران ڈرائیونگ نیند آ گئی تھی۔

ریسکیو ذرائع کے مطابق اس حادثے میں آٹھ افراد جاں بحق ہوگئے، جبکہ دو افراد شدید زخمی ہو گئے ہیں۔

جاں بحق ہونے والوں میں 30 سالہ لائیبہ، 35 سالہ عمران، 38 سالہ سلیمان، 25 سالہ سنی، 35 سالہ مقصود اور دو نامعلوم افراد شامل ہیں۔

ریسکیو ٹیم نے فوری طور پر جائے حادثہ پر پہنچ کر زخمیوں کو قریبی اسپتال منتقل کیا۔

پولیس ذرائع نے بتایا کہ تمام افراد شادی کی تقریب سے واپس آ رہے تھے، اور کھارا چوک کے قریب گاڑی حادثے کا شکار ہوئی۔

شہر قائد کے علاقے سعدی ٹاؤن میں ماڈل کالونی پولیس نے ایک گھر پر چھاپہ مارا، جس کے نتیجے میں چند گھنٹے قبل چھینی گئی کار برآمد کر لی گئی۔

پولیس کے مطابق، ملزمان چھینی گئی کار کے ساتھ فائرنگ کے تبادلے کے دوران فرار ہو گئے تھے، لیکن پولیس نے کامیابی سے ان کا پیچھا کیا اور کار قبضے میں لے لی۔

ماڈل کالونی کے ایس ایچ او، عرفان سہتو نے موقع پر گفتگو کرتے ہوئے کہا کہ وہ ماڈل کالونی سے چھینی گئی کار کا پیچھا کرتے ہوئے سعدی ٹاؤن پہنچے۔ یہاں ایک خالی گھر کے باہر ٹریکر بند ہو چکا تھا۔

گھر کی تلاشی لی تو اندر سے نہ صرف چھینی گئی کار برآمد ہوئی بلکہ دیگر سامان بھی ملا، جن میں ٹریکر بند کرنے والا کیمرہ، لیپ ٹاپ، جعلی نمبر پلیٹیں اور دیگر مشتبہ مواد شامل ہیں۔

ایس ایچ او نے مزید بتایا کہ یہ گھر ایک ماہ قبل کرائے پر لیا گیا تھا اور ملزمان یہاں چھپ کر رہ رہے تھے۔ پولیس کو گھر سے بلیک ماسک بھی ملا ہے، جس سے ظاہر ہوتا ہے کہ ملزمان کا یہ گروہ منظم نوعیت کی وارداتوں میں ملوث ہے۔

پولیس نے کار قبضے میں لے کر مزید تحقیقات کا آغاز کر دیا ہے۔