اسلام آباد(ویب ڈیسک )وزیر خارجہ خواجہ آصف نے کہا ہے کہ ڈونلڈ ٹرمپ انتظامیہ کی جانب سے سیکیورٹی امداد کی معطلی کے بعد امریکا کے ساتھ اتحاد کو ختم سمجھتا ہوں۔امریکی جریدے وال اسٹریٹ جنرل کو انٹرویو دیتے ہوئے خواجہ آصف کا کہنا تھا کہ 2001 میں امریکا کی افغانستان میں مہم میں شامل ہو کر بہت بڑی غلطی کی، امریکی مہم میں شامل ہونے سے پاکستان میں دہشتگردی نے جنم لیا۔خواجہ آصف نے کہا کہ امریکا کے ساتھ ہمارا کوئی اتحاد نہیں ہے، کیونکہ اتحادی ایسا سلوک نہیں کرتے۔ انہوں نے کہا کہ ٹرمپ انتظامیہ کی جانب سے پاکستان کی سیکیورٹی امداد کی معطلی کے بعد امریکا سے اتحاد ختم سمجھتا ہوں۔ان کا کہنا تھا کہ ہماری فورسز اور قوم نے متفقہ کوششوں سے ملک میں بڑی حد تک امن قائم کر دیا ہے، اور اگر ہم افغان مزاحمت کاروں کیخلاف جاتے ہیں کہ تو یہ جنگ دوبارہ ہماری سرزمین پر لڑی جائیگی جس سے امریکیوں کو فائدہ ہو گا۔وزیر خارجہ نے کہا کہ پاکستان تنہا نہیں ہے اور ہمارے پاس دوسرے اتحادیوں کے آپشن موجود ہیں۔

اسلام آباد(ویب ڈیسک) وزیر خارجہ خواجہ آصف نے امریکی بیانات اور الزامات پر سخت رد عمل کا اظہار کیا ہے۔گزشتہ روز امریکی صدر ڈونلڈ ٹرمپ نے ایک بار پھر پاکستان سے دہشت گردوں کے خلاف فیصلہ کن کارروائی کا مطالبہ کیا تھا جب کہ امریکی نائب صدر نے بھی افغانستان کے دورے میں پاکستان کے خلاف ہرزہ سرائی کرتے ہوئے کہا دہشت گردوں کو پناہ دینے پر پاکستان کو بہت کچھ کھونا پڑے گا۔
امریکی بیانات پر گزشتہ روز ترجمان دفتر خارجہ نے بیان جاری کیا تھا جس میں شدید رد عمل دیتے ہوئے کہا تھا کہ اتحادی ممالک ایک دوسرے کو نوٹس پر نہیں رکھتے۔امریکی بیانات پر وزیر خارجہ خواجہ آصف نے بھی شدید رد عمل دیا ہے۔سماجی رابطے کی ویب سائٹ ٹوئٹر پر اپنی ٹوئٹ میں خواجہ آصف نے کہا کہ امریکی انتظامیہ کا بیان اقوام متحدہ میں سفارتی اور افغانستان جنگ میں ناکامی کا مظہر ہے۔وزیرخارجہ نے مزید کہا کہ ہمیں الزام یا دھمکی نہ دیں، دہشت گردی کے خلاف جنگ میں ہمارے تجربے سے سیکھیں۔

 اسلام آباد: وزیر خارجہ خواجہ آصف کا کہنا ہے کہ پاکستان نے امریکا کو کہہ دیا ہے کہ ہم قربانی کا بکرا بننے کے لیے تیار نہیں ہیں۔قومی اسمبلی کی خارجہ امور کمیٹی کے اجلاس میں وزیر خارجہ خواجہ آصف کا کہنا تھا کہ امریکی پالیسی کے اعلان پر 4 ممالک سے مشاورت کی، چاروں کو اس پر تحفظات تھے اور سب نے پاکستان کے موقف کی حمایت کی، تمام دوست ممالک نے امریکا سے بات چیت کرنے کا مشورہ دیا، پاکستان نے کہہ دیا ہے کہ ہم قربانی کا بکرا بننے کے لیے تیار نہیں ہیں، ہم نے اس پالیسی کے بعد امریکا سے کئی روابط منقطع کیے۔ امریکی وزیر خارجہ کو دورہ پاکستان سے روکا گیا، پارلیمانی قراردادوں سے بھی امریکا کو سخت پیغام گیا، اقوام متحدہ اجلاس کے موقع پر امریکی نائب صدر نے ملاقات کا پیغام بھیجا اور کچھ وضاحتیں بھی کیں، ملاقات کئی لحاظ سے مثبت رہی اور ہم نے بھارتی کردار کا معاملہ اٹھایا۔

خواجہ آصف نے کہا کہ امریکی نائب صدر نے واضح کیا کہ افغانستان میں بھارتی کردار معاشی ہوگا، امریکی صدر نے محفوظ پناہ گاہوں کی بات دہرائی تاہم وزیر اعظم نے امریکا کے اس موقف کو مسترد کیا، انہوں نے کہا کہ موثر بارڈر مینجمنٹ کے بغیر امریکا کو شکایت رہیں گی، ہم نے زور دیا کہ افغانستان میں دہشت گرد گروہوں کے خلاف کارروائی کی جائے، افغان مہاجرین کی واپسی پر زور دیا گیا اور کہا کہ مہاجرین کے بھیس میں طالبان پاکستان آ سکتے ہیں، ایسی صورت میں محفوظ پناہ گاہوں کا الزام لگانا مناسب نہ ہوگا۔ انہوں نے کہا کہ امریکی وزیر دفاع جیمز میٹس اور سینیٹر مکین نے سینیٹ کمیٹی میں دھمکی آمیز لہجہ اپنایا، جان مکین نے ویتنام کی مثال دی جس پر میں نے ان کو جواب دیا کہ ویتنام میں امریکا کو بھاگنا پڑا تھا۔

اسلام آباد(وقائع نگار خصوصی ) وزیر خارجہ خواجہ محمد آصف نے واضح کیا ہے کہ ان کی حکومت دوسروں کے مشوروں کو قبول نہیں کرے گی اگر اس سے ملک کی سلامتی کو خطرہ ہوگا ۔ غیر ملکی میڈیا کے مطابق خواجہ محمد آصف نے گفتگو کرتے ہوئے کہا کہ ایسا لگتا ہے کہ امریکی انتظامیہ پاکستان کو نشانہ بنانے کے لئے حقانی نیٹ ورک کا استعمال کررہا ہے ۔ اپنی دلیل کو آگے بڑھاتے ہوئے انہوں نے کہا کہ کئی بار ہم نے امریکہ کے اعلی فوجی افسروں کو کہا کہ وہ ہمیں حقانی نیٹ ورک کے ٹھکانوں کے بارے میں معلومات فراہم کرے تاکہ ہم ان کے خلاف کاروائی کی جاسکے لیکن انہوں نے کبھی بھی اس سلسلے میں کوئی اطلاع فراہم نہیں کی اسی طرح ہم نے افغانستان کے صدر اشرف غنی کو بھی بار بار کہا کہ وہ حقانی نیٹ ورک کے خلاف اپنا تعاون پیش کرے لیکن اس سے بھی کوئی مثبت جواب نہیں ملا ۔وزیر خارجہ نے کہا کہ یہ حیرانگی کی بات ہے کہ امریکی کی فوج کی موجودگی کے باوجود داعش افغانستان میں اپنے قدم جما رہی ہے امریکی انتظامیہ کو ہمیں بتانا چاہئے کی یہ کیسے ہوا ،حیرانگی کی بات یہ کہ داعش کے دہشت گردوں کے پاس وہ جدید ترین ہتھیار ہے جو صرف امریکی فوجی استعمال کرتے ہیں ۔خواجہ آصف نے کہا کہ ہم نے ہمیشہ امریکہ کی مدد کی جب انہیں اسکی ضرورت پڑی اور آج بھی ہم امریکی انتظامیہ کے ساتھ تعلقات کو بڑھاوا دینا چاہتے ہیں لیکن وہ برابری کی بنیاد پرہو نا چاہئے حال میں وزیر خارجہ نے امریکہ کا دورہ کیا وہاں اپنے ہم منصب کے علاوہ قومی سلامتی کے مشیر سے ملاقات کی جہاں پر دو طرفہ تعلاقات کے بارے تبادلہ خیال ہوا پچھلے کئی مہینوں سے پاکستان اور امریکہ کے تعلاقات بگڑگئے یہاں تک امریکی صدر نے پاکستان کو نہ صرف فوجی اور اقتصادی کم کردی اور یہ بھی الزام لگا یا کہ افغانستان میں صورت حال کی خرابی کے لئے پاکستان ذمہ وار ہے لیکن ان الزامات کی اسلام آباد نے تردید کی اور کہا کہ دہشت گردی کے خلاف جنگ میں پچھلے کئی سالوںمیں ان کے 60ہزار لوگ مارے گئے پاکستانی فوج نے قبائلی علاقوں میں بڑے پیمانے پر دہشت گردوں کے خلاف مہم چھیڑ دی ۔

اسلام آباد: امریکہ کے دورے کے متعلق بات کرتے ہوئے وزیر خارجہ خواجہ آصف کا کہنا تھا کہ امریکی حکام نے پاکستانی مؤقف کو تسلیم کیا، افغان مسئلے کا سیاسی حل نکالنے کی پاکستانی تجویز سے اتفاق کیا اور بھارت کے افغانستان میں کردار پر پاکستان کے تحفظات کو بھی تسلیم کیا۔ان کا کہنا تھا کہ میں اپنے گھر کو درست کرنے کے مؤقف پر قائم ہوں، اگر اپنے گھر میں مسئلہ نہیں تھا تو نیشنل ایکشن پلان کیوں بنایا گیا؟ وزیر خارجہ نے اپنے اوپر ہونے والی تنقید کا بھی بالآخر جواب دے ڈالا، کہتے ہیں کہ میں نے جو درست سمجھا وہ کہا، کسی کی طبع نازک پر گراں گزرا تو کیا کروں؟ مجھے حب الوطنی کا سرٹیفکیٹ کسی اور سے نہیں، عوام سے لینا ہے۔وزیر خارجہ کا یہ بھی کہنا تھا کہ امریکی حکام سے کہا ہے کہ محفوظ پناہ گاہوں کی نشاندہی کریں۔

 اسلام آباد: وزیرخارجہ خواجہ آصف کا کہنا ہے کہ پاکستان امن پسند ملک ہے ہم ہمسایہ ممالک کے ساتھ برابری کی بنیاد پر بہتر تعلقات چاہتے ہیں۔اسلام آباد میں جاری پاکستانی سفیروں کی تین روزہ کانفرنس کی افتتاحی تقریب سے خطاب کرتے ہوئے وزیرخارجہ خواجہ آصف کا کہنا تھا کہ پاکستان امن پسند ملک ہے اور ہمسایہ ممالک کے ساتھ برابری کی بنیاد پر بہتر تعلقات چاہتے ہیں۔خواجہ آصف کا کہنا تھا کہ افغانستان میں امن پاکستان کے مفاد میں ہے ہم مسلسل کہہ رہے ہیں کہ افغان مسئلے کا حل فوجی طاقت سے نہیں بلکہ مزاکرات کے ذریعے حل کیا جائے اور اب افغان صدر اشرف غنی کی جانب سے مذاکرات کی بات پاکستان کےمؤقف کی حمایت ہے۔ ان کا کہنا تھا کہ مقبوضہ کشمیرمیں انسانی حقوق کی خلاف ورزیوں کامعاملہ ہرسطح پراٹھانا ہوگا اور پاکستان کشمیریوں کی اخلاقی سیاسی اور سفارتی حمایت جاری رکھے گا۔