اسلام آباد (نیوز ڈیسک)پاکستان مسلم لیگ (ن) کے رہنماﺅں دانیال عزیز اور طلال چوہدری نے کہا ہے کہ پاکستان تحریک انصاف کے چئیرمین عمران خان خود قومی سلامتی کے لیے خطرہ ہیں ،20سال سے بیروزگار انسان جہاز میں گھومتا ہے اور 300کنال کا گھر کالے دھن سے خریدا، ہم لوگ عمران خان کی طرح الف لیلی کی کہانیاں نہیں ثبوت لیکر آئے ہیں۔اسلام آباد میں الیکشن کمیشن کے باہر مسلم لیگ(ن) کے رہنما طلال چوہدری کے ہمراہ میڈیا سے گفتگو کرتے ہوئے لیگی رہنما دانیال عزیز نے کہا کہ عمران خان الیکشن کمیشن میں جواب کیوں نہیں دے رہے؟ گزشتہ 7 ماہ سے کہہ رہے ہیں کہ ہم احتساب کے لیے ہر فورم پر پیش ہونے کو تیار ہیں لیکن عمران خان بتائیں کہ وہ 2 سال سے غیر ملکی فنڈنگ کیس میں الیکشن کمیشن میں کیوں تلاشی نہیں دیتے، آج بھی الیکشن کمیشن نے عمران خان سے جواب مانگا جب کہ وہ سپریم کورٹ سے بھی بھاگ گئے ہیں لہذا عمران خان اداروں کی پاسداری کریں اور جواب دیں۔ان کا کہنا تھا کہ وزیر اعظم نواز شریف نہیں بلکہ عمران خان قومی سلامتی کے لیے خطرہ ہیں ۔ ان کا کہنا تھا کہ عمران خان پارٹی فنڈنگ کیس میں تلاشی کیوں نہیں دیتے، کرپشن کی نشاندہی کرنے پر انہوں نے اپنا احتساب کمیشن خود ختم کر دیا اور آج ایک بار پھر عدالتوں سے بھاگ رہے ہیں جب کہ افضل خان نے عدالت سے معافی مانگی تھی اور عمران خان نے بھی معافی مانگنی ہے، عمران خان کہاں ہے تمہاری تلاشی اور آج تک کیوں غیر ملکی فنڈنگ کا جواب نہیں دیا۔انہوں نے عمران خان کو مخاطب کرتے ہوئے کہا کہ یہ ادارے کام کررہے ہیں آپ اداروں کی بڑی بات کرتے ہیں جواب نہیں دیتے، آپ اداروں کو مفلوج کرنا چاہتے ہیں۔ان کا مزید کہنا تھا کہ پینتیس پنکچر پرتم نے کہا سیاسی بیان تھا، آپ کی قلابازی کھانے کے دن اب ختم ہوگئے ہیں، عمران خان یکسوئی سے بھگوڑے ہیں۔ اس موقع پر رہنما مسلم لیگ(ن)طلال چوہدری کا کہنا تھا کہ عمران خان (ن)لیگ کی دشمنی میں پاکستان سے دشمنی کیوں کررہے ہیں، ہم لوگ عمران خان کی طرح الف لیلی کی کہانیاں نہیں ثبوت لیکر آئے ہیں، 20سال سے بیروزگار انسان جہاز میں گھومتا ہے اور 300کنال کا گھر کالے دھن سے خریدا۔ ان کا کہنا تھا کہ آف شور کمپنیوں سے لیکر بچوں اور جائیدادوں تک عمران خان نے غلط بیانی کی ہے، عمران خان دوسروں کی تلاشی کی بات کرتے ہیں لیکن چور تو آپ ثابت ہوگئے لہذا اب تلاشی ہوکر رہے گی۔