سڈنی(ویب ڈیسک)آسٹریلوی ٹیم کے سابق بلے باز اور آئی پی ایل میں گجرات لائنز کے کوچ بریڈ ہو ج کا کہنا ہے کہ اگر کوہلی دھرم شالہ میں بھارت کی طرف سے نہ کھیل کر آئی پی ایل میں کھیلتے ہیں تو یہ حیرت کی بات ہوگی۔ بریڈ ہوج کا کہنا تھا کہ اگر آپ وہ ٹیسٹ نہیں کھیلتے جس سے آپ کو آسٹریلیا کیخلاف ٹیسٹ سیریز جیتنے کا موقع ملتا ہے تو یہ کافی خراب بات ہوگی۔کوہلی کے خود کو آئی پی ایل کے لیے بچانے کے سوال پرہوج نے کہا کہ ہم نے ایسا پہلے بھی ہوتا دیکھا ہے ، کئی کھلاڑی آئی پی ایل کے وقت آ جاتے ہیں، ہم جانتے ہیں کہ یہ خوب پیسے والا ٹورنامنٹ ہے، اس میں کھیلنے کا کافی پیسہ ملتا ہے۔ہوج کا مزید کہنا تھاکہ کوہلی کو آئی پی ایل میں کھیلنے کا کافی پیسہ ملتا ہے، حالانکہ انہیں تو پیسہ ویسے بھی خوب ملتا ہے، لہٰذا زیادہ فرق نہیں پڑتا لیکن کچھ کھلاڑی ہیں جو آئی پی ایل کے وقت ایسا کرتے ہیں تاکہ ٹورنامنٹ میں شامل ہوکر اچھی کارکردگی کا مظاہرہ کر سکیں۔

رانچی (ویب ڈیسک) جعلی ڈاکٹر نے ویرات کوہلی کے آسٹریلیا کیخلاف سیریز سے باہر ہونے کا اعلان کردیا جس سے بھارت میں کھلبلی مچ گئی۔مینجمنٹ کا خیال ہے کہ انجری سنگین نوعیت کی نہیں اور وہ جلد میدان میں اترنے کے قابل ہوجائیں گے۔ دوسری جانب رانچی اسپتال میں جعلی ڈاکٹر نے ڈرامہ کرتے ہوئے پورے بھارت کے شائقین کرکٹ کو پریشان کردیا، ایم آر آئی مشین کا بٹن دبانے والے ٹیکنیشن نے میڈیا کے نمائندوں کو مخاطب کرتے ہوئے کہا کہ کوہلی کی ہڈیاں اپنی جگہ پر ہیں تاہم ان کا پٹھہ پھٹ گیا ہے، انھیں ہاتھ کو حرکت دینے میں دشواری ہورہی ہے، ہم نے انھیں 15سے 20روز تک آرام کا مشورہ دیا ہے۔واضح رہے کہ ٹیکنیشن کا لباس اور لہجے میں اعتماد ایسا تھا کہ کسی کو شک تک نہ ہوا کہ وہ ڈاکٹر نہیں ہے، اس شخص نے 15منٹ کیلیے شہرت تو خوب حاصل کرلی لیکن غلط بیانی پر اسکے ساتھ بعد ازاں کیا سلوک ہوا اس بارے میں کچھ معلوم نہیں ہوسکا۔