لاہور (این این آئی)پنجاب بھر میں ماحولیاتی آلودگی اور سموگ کے خاتمے کے لیے محکمہ تحفظ ماحولیات نے غیر قانونی بھٹہ خشت کے خلاف کارروائیاں تیز کر دی ہیں۔ رواں سال صوبے بھر میں غیر قانونی طور پر چلنے والے 1,429بھٹے مسمار جبکہ 968بھٹوں کو سیل کیا گیا۔ خلاف ورزی کرنے والے بھٹہ مالکان کے خلاف 1,248 مقدمات درج کیے گئے اور مجموعی طور پر 17کروڑ 80لاکھ روپے جرمانے عائد کیے گئے۔ محکمہ ماحولیات کے مطابق پنجاب بھر میں بھٹوں کے 84ہزار 370وزٹس کیے گئے جبکہ خلاف ورزیوں کی نشاندہی پر قانونی کارروائیاں عمل میں لائی گئیں۔ بھٹوں کی بار بار انسپکشن اور مسلسل نگرانی کا نظام بھی وضع کیا گیا ہے تاکہ ایک مرتبہ کارروائی کے بعد کسی بھٹے کو دوبارہ ماحولیاتی قوانین کی خلاف ورزی کی اجازت نہ مل سکے۔ سموگ سیزن کے دوران ستمبر سے 18نومبر تک 519بھٹے مسمار، 494 سیل اور 408مقدمات درج کیے گئے جبکہ بھٹہ مالکان کو 10کروڑ 14لاکھ 50ہزار روپے جرمانے کیے گئے۔ صرف 18نومبر کو 22بھٹے مسمار، 19سیل اور 14 مقدمات درج کیے گئے۔ ڈی جی ادارہ تحفظ ماحول پنجاب عبداللہ نیئر شیخ نے کہا کہ غیر قانونی بھٹوں کے خلاف زیرو ٹالرنس پالیسی پر عملدرآمد جاری ہے اور خلاف ورزی کرنے والے مالکان کے خلاف بلاامتیاز قانونی کارروائی کی جائے گی۔
