گورداسپور(این این آئی) پاکستان کو جنگ کی دھمکیا ں دینے والا بھارت غباروں سے لکھی تحریر سے ڈر گیا، گورداسپور میں پولیس نے مودی کووارننگ کی تحریر والے کئی غباروں کو”گرفتار“ کرلیا۔بھارتی میڈیاکے مطابق پاکستان کو جنگ کی دھمکیاں دے کر بڑی بڑی چھوڑنے والا بھارت چھوٹے چھوٹے غباروں سے ہی ڈر گیا۔ بھارتی پنجاب کے ضلع گورداس پور میں پولیس نے نریندر مودی کو وارننگ کی تحریر والے کئی غبارے پکڑے ہیں۔ غباروں پر اردو میں درج ہے کہ پاکستان کے ساتھ جنگ کی تو بھارت برباد ہوجائے گا، اس تحریر میں بھارت کو بزدل بھی قرار دیا گیا ہے۔ یاد رہے کہ اس سے پہلے بھارت کئی بار کبوتروں کو پاکستانی جاسوس قرار دے چکا ہے، ایک اونٹ کو بھی ”جاسوسی“ کے الزام میں پکڑ لیا گیا تھا۔ ایسے اقدامات سے پاکستان کا تو کچھ نہیں بگڑتا، بھارت اپنی بیوقوفی سے خود ہی جگ ہنسائی کا نشانہ بن جاتا ہے۔
