کراچی (خصوصی رپورٹ) جس وقت ہالی وڈ میں برنارڈ برٹولوچی کی فلم لاسٹ ٹینکو ان پیرس میں ماریا شینائڈر کے ساتھ بے باک سین ، ریپ اور خواتین کے حقوق اور ان کے تحفظ کے حوالے سے بحث جاری ہے اس وقت خواتین کے مسائل کو اجاگر کرنے کیلئے بھارتی مصنفہ اور فلم ساز نکیتادیشپانڈے کا کہنا ہے کہ لوگوں کو بالی وڈ پر تنقید کرتے وقت اپنی تاریخ نہیں بھولنا چاہیے۔ خواتین کے حقوق کیلئے چلائی جانے والی اپنی مہم میں انہوں نے ماضی کی کامیاب فلم سٹار ریکھا کی زندگی میں پیش آنے والے ایک واقعہ کا ذکر کیا ہے جس کا اظہار یاسر عثمان نے اداکارہ کی سوانح عمری میں بھی کیا ہے۔ اس واقعہ کا ذکر کرتے ہوئے انہوں نے فلم انجانا سفر کا حوالہ ہے جب اداکار بسواجیت نے شوٹنگ کے دوران ریکھا کا زبردستی بوسہ لیا، پانچ منٹ تک جاری رہنے والی اس کارروائی کے دوران ڈائریکٹر راج نوا تھے نے وہ سین کٹ کرنے کا اشارہ دیا اور نہ ہی ٹیم کے لوگوں نے کوئی احتجاج کیا۔ وہاں موجود تماشائی اس واقعہ سے محظوظ ہوتے رہے۔ سین کے دوران ریکھا کی آنکھوں سے آنسو گر رہے تھے اور وہ احتجاج کرنے کے باوجود بھی احتجاج نہ کر پائیں۔ اس وقت ان کی عمر پندرہ سال کے قریب تھی۔ اداکاراﺅں کے ساتھ ایسے واقعات ہوتے رہتے ہیں مگروہ کیریئر بچانے کیلئے اپنا منہ بند رکھتی ہیں۔
