ماسکو(این این آئی)روس میں ایک ترک سفارت کار کو اس کی رہائش گاہ پر مردہ حالت میں پایا گیا ،عرب ٹی وی کے مطابق انقرہ میں روسی سفیر انڈریے کارلوف کے قتل کے بعد ماسکو میں ایک 56 سالہ سفارت کار لاش اس کی رہائش گاہ سے ملی ۔روسی اور برطانوی ذرائع ابلاغ کی رپورٹس میں بتایا گیا ہے کہ پولیس کو ترکی کے سفارت کار بولشیکوف کی لاش اس کے گھر سے ملی۔ خون میں لت پت لاش کے قریب سے ایک پستول بھی ملا۔ یہ پستول بھی خون میں لتھڑی ہواتھا، اس کے علاوہ لاش کے قریب سے گولیوں کے دو خالی خول بھی ملے ۔روسی ٹی وی کی رپورٹ میں حکام کے حوالے سے سفارت کار کے قتل کی تصدیق کی گئی ہے تاہم مقتول کے عہدے کی شناخت ظاہر نہیں کی گئی۔میڈیا رپورٹس کے مطابق مقتول سفارت کار ماضی میں بولیویا میں سفیر بھی رہ چکے ہیں۔ اس کے علاوہ لاطینی امریکا میں روس کے اہم سفارتی عملے کا حصہ رہنے کے ساتھ وزارت خارجہ میں بھی اہم عہدوں پر فائز رہے ہیں۔ تفتیشی اداروں نے بولشیکوف کے قتل کےاسباب ومحرکات جاننے کے لیے تحقیقات شروع کردی ہیں۔
