گوجرانوالہ (بیورو رپورٹ) وفاقی وزیر ریلوے خواجہ سعد رفیق نے کہا ہے کہ عمران خان ملک کا سب سے بڑا جھوٹا ہے، مشرف نے 8سال ملک کا ستیا ناس اور پیپلز پارٹی نے پانچ سال سوا ستیاناس کیا‘ زرداری حکومت لانگ مارچ سے گرانے کا مشورہ ہمیں بھی دیا گیا لیکن ہم نے ووٹ کے ذریعے تبدیلی کو ترجیح دی ‘کراچی آپریشن میںبہت رکاوٹیں ڈالی گئیں ‘ سندھ حکومت کو یہ آپریشن ایک آنکھ نہیں بھایا ‘وہ ساتھ چلتے بھی رہے اور سپیڈ بریکر بھی لگاتے رہے ‘1999میں نواز شریف کا جرم یہ تھا کہ عالمی قوتوں کو نہ کر کے پاکستان کو ایٹمی قوت بنایا ‘اب نواز شریف کا جرم یہ ہے کہ وہ پاکستان کے اندر معاشی دھماکہ کرنا چاہتے ہیں۔ پانامہ پیپرز میں کوئی صداقت نہیں ‘ صرف سیاست کی جارہی ہے ‘ انشاءاللہ جلد دودھ کا دودھ اور پانی کا پانی ہوگا،2018دور نہیں ‘یہ چاہتے ہیں کہ ہماری قیادت کو داغ دار کر کے الیکشن میں جائیں ‘ایسا نہیں ہوگا ‘وہ پیر کی سہ پہر گوجرنوالہ میں ورکرز کنونشن سے خطاب کر ر ہے تھے انھوں نے کہا کہ جو لوگ اپنے صوبوں میں کچھ نہیں کرسکے جب وہ 2018 کے الیکشن میں جائیں گے تولوگ ووٹوں کے نہیں کسی اور چیز کے ہار پہنائیں گے۔الزام کی سیاست کرنے والے پارلیمنٹ میں آتے بھی نہیں اور تنخواہیں بھی بٹورتے ہیں پھر بھی کہتے ہیں کہ آئین کے آرٹیکل 62,63 پر پورا اترتے ہیں۔ انہوں نے کہا کہ دھرنے کے دوران وزیراعلی کے پی کے اور کابینہ کو 126دن اسلام آباد نظر بند کیا ۔سابق ایم این اے محمد حنیف عباسی نے کہا کہ وزیراعظم محمد نواز شریف خود بھی شیر ہیں ‘انکا دل بھی شیر ہے ‘وہ بڑے سے بڑے آمر کے سامنے نہ جھکے اور نہ بکے ۔ ۔انہوں نے کہا کہ اگر آئین کی آرٹیکل 62,63 لگ گئی تو عمران خان اور شیخ رشید احمد نہیں بچے گا۔ وزیر مملکت برائے اطلاعات و نشریات مریم اورنگزیب نے کہا ہے کہ جھوٹے الزامات لگانے والوں کو عدالتیں انصاف نہیں دیتی۔وزیر اعظم نوازشریف پاکستان کی ضرورت ہیں۔گوجرانوالہ میں ن لیگ کے ورکرز کنونشن سے خطاب کرتے ہوئے انکا کہنا تھا کہ نوازشریف کے ایک اشعارے سے عوام کا سمندر آمد آتا ہے۔ عمران خان کا کام الزام لگانا اور ہمار ا کام عوام کی خدمت کر نا ہے۔نوازشریف کو تین بار ملک کا وزیر اعظم بننے کا اعزاز حاصل ہے۔”عمران خان وزیر اعظم کو کس طرح نااہل کرا سکتے ہیں “۔مریم اورنگزیب کا مزید کہنا تھاکہ اقتصادی راہداری منصوبہ بھی وزیر اعظم نوازشریف کا ویڑن ہے ، پاکستان کے عوام ہی نوازشریف کی طاقت ہیں۔ نوازشریف نے ملک کو موٹر ویز اور ایٹم بم کا تحفہ دیا۔ گوجرانوالہ کے عوام نوازشریف سے محبت کرتے ہیں۔ جھوٹ الزامات لگانے سے کوئی نااہل نہیں ہو جاتا۔
