لاہور( ویب ڈیسک)پاکستان پیپلز پارٹی کے سینئر رہنما بیرسٹر اعتزاز احسن نے کہا ہے کہ منی ٹریل قطری خطوں سے نہیں بلکہ بنکوں کے کھاتوں سے بنے گی، قطری شہزادے کے خطوط منی لانڈرنگ کا اعتراف ہے ،توقع کرتے ہیں کہ عدالت ایسا فیصلہ نہیں دے گی جس سے انارکی پھیلے،کیا یہ عجیب بات نہیں کہ پورا خاندان ایک دوسرے کو اربوں روپے کے تحفے دے رہا ہے، شریف خاندان کا کونسا شخص ہے جو کاروبار کی نگرانی کرتا ہے، شریف فیملی کے تمام افراد کے بینک اکاﺅنٹس کی چھان بین تک منی ٹریل کا پتا لگانا ممکن نہیں۔لاہور ہائیکورٹ میں میڈیا سے گفتگو کرتے ہوئے انہوں نے کہا کہ شریف خاندان جائیداد کی ملکیت تسلیم کر چکا ہے، جائیداد کی ملکیت ماننے کے بعد بار ثبوت شریف خاندان پر ہے۔ عرب ممالک کیش ٹرانزیکشن قبول کرتے ہیں، منی ٹریل کے بغیر شریف خاندان بچ نہیں سکیں گے، منی ٹریل کے لیے بینک کی ٹرانزیکشن دکھانی پڑے گی۔ اعتزاز احسن نے کہا کہ پاناما لیکس کے معاملے پر حکومت خط پر خط پیش کررہی ہے لیکن ان سے کسی آمدن کا جواز پیش نہیں کیا جا سکتا، قطری شہزادے کا خط منی لانڈرنگ کا اعتراف ہے اور قطری خط ہی منی لانڈرنگ کرنے والوں کو بچانے کا راستہ ہے۔ اس طرح تو ہر کالا دھن سفید اور ہر بزنس مین کے لیے منی لانڈرنگ آسان ہو جائے گی ۔جب تک شریف فیملی کے تمام افراد کے اکاﺅنٹس کی چھان بین نہیں ہوگی، منی ٹریل نہیں ملے گی ،میاں شریف کے کاروبار کرنے کا ثبوت خطوط نہیں ہو سکتا۔ شریف خاندان کے لیے کیس سے نکلنا انتہائی مشکل ہوگیا ۔انہوں نے کہا کہ کیا یہ عجیب بات نہیں کہ پورا خاندان ایک دوسرے کو اربوں روپے کے تحفے دے رہا ہے۔انہوںنے کہا کہ ماضی میں سپریم کورٹ نے کرپشن کی بنیاد پر برطرف بینظیر کی حکومت کو بحال کرنے سے انکار کیا اور انہی الزامات پر نواز شریف کی حکومت فورا بحال کر دی گئی۔