ٹھٹھہ(نمائندہ خبریں)پیپلز پارٹی کے چیئرمین بلاول بھٹو نے کہا ہے کہ تاریخ کو دیکھ کر لگتا نہیں کہ پاناما کیس میں شریفوں کے خلاف فیصلہ آئے گا ، پارلیمنٹ میں بھی جائیں گے مگر ابھی پاناما کیس کے فیصلے کا انتظار ہے،عرفان اللہ مروت کی پی پی میں شمولیت کا فیصلہ نہیں ہوا ہے۔ جب تک ملک بھر میں نیشنل ایکشن پلان کے تمام نکات پر عمل نہیں کیا جاتا ملک سے دہشت گردی کا خاتمہ ممکن نہیں ہے۔ان خیالات کا اظہا ر انہوںنے پیرکو ٹھٹھہ کے قریب جھرک مالاکاتیار پردو کلومیٹر طویل آغا خان پل کے افتتاح کے موقع پر خطاب اور میڈیا سے بات چیت کرتے ہوئے کیا ۔بلاول بھٹو زرداری نے کہا کہ دہشت گردی کے خلاف پہلی دفاعی لائن ثقافت ہے ،نیشنل ایکشن پلان پر پر عمل نہ ہونے سے انسداد دہشت گردی میں کامیابی مشکل ہوگی۔انہوں نے کہا کہ پارلیمانی سیاست میں آمد کے لیے پاناما کیس پر فیصلے کا انتظار ہے ، پیپلز پارٹی جمہوری پارٹی ہے، اور ہمارے دروازے ہر ایک کے لیے کھلے ہیں ۔ عرفان اللہ مروت کی صرف ایک ملاقات ہوئی ، شمولیت نہیں ہوئی ۔انہوںنے کہا کہ پاناماپر فیصلے کے بعدپارلیمانی سیاست کیلئے حکمت عملی بنائیں گے ، پیپلز پارٹی آئندہ انتخابات کی تیاری کر رہی ہے۔انہوں نے کہا کہ پورے پاکستان میں عوام تکلیف میں ہیں ،ہم ان کے مسائل اور انفرااسٹرکچر پر توجہ دے رہے ہیں ،بے نظیر بھٹو انکم سپورٹ پروگرام غریبوں کی مدد کیلئے طویل المدتی ہے ۔چیئرمین پیپلزپارٹی بلاول بھٹو زرداری نے جھرک ملاکاتیارپل کا افتتاح کردیا، پل ٹھٹھہ اور ٹنڈو محمد خان کو ملاتا ہے، گذشتہ روز پیپلزپارٹی کے چیئرمین بلاول بھٹو زرداری نے جھرک ملا کا تیار پل کا افتتاح کیا، وزیر اعلیٰ سندھ مراد علی شاہ بھی بلاول کے ہمراہ تھے، سرآغا خان جھرک ملاکاتیار پل ٹھٹھہ اور ٹنڈو محمد خان کو ملاتا ہے، پل کی لمبائی 1.75کلو میٹر ہے۔
