لاہور (خصوصی رپورٹ) اداکارہ وینا ملک کی زندگی میں نیا موڑ آگیا۔ سکینڈل کوئین کے پھر چرچے ہونے لگے۔ ان کی اسد سے شادی ختم ہوگئی۔ بتایا گیا ہے وینا ملک نے اپنے شوہر اسد سے خلع لے لیا ہے۔ محبتاں سچیاں کی ہیروئن شوہر کے ساتھ تین سال ہی گزار سکی۔ وینا ملک کی مصروفیت اسد سے علیحدگی کا باعث بنی۔ دونوں کے درمیان اختلافات کافی بڑھ گئے تھے جس پر وینا نے لاہور کی عدالت میں خاموشی سے کیس دائر کیا اور عدالت نے خلع کا فیصلہ دے دیا۔ شادی 25 دسمبر 2013ءمیں دبئی میں پاکستانی کاروباری شخصیت اسد سے ہوئی تھی۔ 6 جنوری 2017ءکو وینا ملک نے فیملی کورٹ لاہور میں خلع کا کیس دائر کیا تھا جس کا فیصلہ 31 جنوری کو آگیا۔ عدالتی فیصلے کے مطابق وینا ملک 25 فیصد جہیز اپنے شوہر کو دیں گی جس کی مالیت اڑھائی ہزار درہم بنتی ہے۔ اسد ملک وینا ملک کو پانچ لاکھ درہم ادا کریں گے۔ فیملی کورٹ کے جج محمد جمیل گجر نے وینا ملک کے حق میں خلع کا فیصلہ دیا۔ وینا ملک جن کا اصل نام زاہدہ ملک ہے کی مصروفیت پر اسد کو اعتراض تھا اور انہوں نے علیحدگی کا فیصلہ کیا۔ وینا نے تین سال میںکبھی اس بارے میں میڈیا کے سامنے بات نہیں کی۔ ان کی فیملی کی جانب سے کوئی روعمل سامنے نہیں آیا۔ وینا ملک کے وکیل علی احمد ایڈووکیٹ نے بتایا ان کی اپنی موکلہ سے ابھی بات نہیں ہوئی عدالت نے ڈگری دے دی ہے وینا ملک سے بات کرنے کے بعد ہی کچھ کہہ سکوں گا ۔ وکیل نے بتایا کہ دونوں بچے ماں کے پاس ہیں۔ وینا ملک اپنے کیرئیر میں اکثر سکینڈلز کی زد میں رہیں، بھارت میں ڈرتی پکچر بنوائی ، وینا نے فلم ، دال میں کچ کالا زندگی 50-50 اور سپر ماڈل ، وغیرہ میں کام کیا۔ اس کے علاوہ وینا نے انڈین ریئلٹی ٹی وی شو بگ بس میں بھی شرکت کی ۔ بے باک اداکاری کے لئے شہرت رکھنے والی پاکستانی اداکاری وینا ملک کا نام ماضی میں پاکستانی کرکٹر محمد اصف اور بھارتی اداکارا شمت پٹیل کے ساتھ بھی لیا جاتا رہاہے لیکن وہ کہتی رہی تھیں کہ فی الحال ان کا شادی کا کوئی ارادہ نہیں۔ وینا ملک اپنے مبینہ افیئرز کے علاوہ بھارتی فلموں اور ٹی وی پروگرام میں اپنی بے باک اداکاری اور ایک میگزین کے لئے عریاں فوٹو شوٹ کی وجہ سے بھی خبروں میں رہی ہیں۔ جب دسمبر 2011ء میں یہ تصویر پہلی بار شائع ہوئی تھی تو وینا ملک نے ایک بیان میں کہا تھا اس کی تصویر کے ساتھ چھیڑ چھاڑ کر کے اسے شائع کیا گیا ہے اور انہوں نے خود ایسی تصویر نہیں بنوائی۔ اس سے قبل انہوں نے 2010ء میں بگ باس میں شرکت کر کے پاکستان کے روایت پسند حلقوں کو برہم کر دیا تھا۔ پاکستانی فلم محبتاں سچیاں میں مرکزی کردار ادا کرنے والی وینا ملک کا تعلق کسی فنکار گھرانے سے نہیں لیکن ان کے بارے میں یہ کہنا بے جا نہ ہو گا کہ یہ پیدائشی فنکارہ ہیں۔
