لاہور (کرائم رپورٹر) آج صبح ٹبی سٹی کے علاقہ میں نامعلوم افراد پولیس اہلکاروں پر اندھا دھند فائرنگ کے نتیجہ میں 2اہلکاروں سمیت 3افراد زخمی ہوگئے جنہیں طبی امداد کیلئے ہسپتال پہنچا دیا گیا جہاں پر تینوں زخمیوں کی حالت نازک بیان کی جاتی ہے۔ بتایا گیا ہے کہ سی آئی اے غازی آباد میں تعینات رضوان، ظفر اور سویلین افضل آج صبح ڈیوٹی ختم کرکے گھر واپس جا رہے تھے کہ کار سوار تین افراد نے لیڈی ولنگڈن ہسپتال کے قریب اندھا دھند فائرنگ کردی جس کے نتیجہ میں تینوں جوان لہولہان ہوگئے جنہیں فوری طبی امداد کیلئے میو ہسپتال پہنچا دیا گیا جہاں پر ڈاکٹروں کے مطابق دو زخمیوں رضوان اور ظفر کی حالت نازک بیان کی جاتی ہے۔ واقعہ کی اطلاع ملتے ہی پولیس کی بھاری نفری بھی جائے وقوعہ پر پہنچ گئی ۔ واقعہ کے بعد پولیس نے علاقے کی ناکہ بندی کردی ہے اور قریبی عمارتوں پر نصب سی سی ٹی وی کیمروں سے فوٹیج حاصل کرلی ہے۔ پولیس کے مطابق حملہ آوروں بارے سراغ لگایا جا رہا ہے کہ ملزمان کون تھے، کہاں سے آئے اور ان کی اہلکاروں سے کیا دشمنی تھی۔
