اسلام آباد:پی ایس ایل میں اسپاٹ فکسنگ میں نیا پنڈورا بکس کھل گیا۔شرجیل خان نے دو ڈاٹ بالز جواریوں کے کہنے پر کھیلیں ۔ شاہ زیب کے بکیز کے ساتھ رابطوں کی بھی تصدیق ہوگئی ۔ محمد عرفان اور خالد لطیف نے بھی بکیز سے رابطے کئے ۔جس تھالی میں کھایا اسی میں کس کس نے اور کیسے کیسے چھید کیے؟ سما پاکستان سپر لیگ میں اسپاٹ فکسنگ سے متعلق اینٹی کرپشن یونٹ کی ابتدائی تحقیقات سامنے لے آیا۔پی ایس ایل فکسنگ اسکینڈل میں کھلاڑیوں نے کیا کیا گل کھلائے۔ سماء کی رپورٹ میں سنسنی خیز انکشافات سامنے آگئے۔ اینٹی کرپشن یونٹ کی ابتدائی تحقیقات میں چشم کشا انکشافات ہوئے۔ اسلام آباد یونائیٹڈ کے شرجیل خان نے پی ایس ایل میں 2 ڈاٹ بالز جواریوں کے کہنے پر کھیلیں ۔پاکستان سپر لیگ کے دوران بکیز کے ساتھ شاہ زیب حسن کے رابطوں کی بھی تصدیق ہوئی ہے۔ ذرائع کے مطابق شاہ زیب حسن دیگر کھلاڑیوٕں کو بھی اسپاٹ فکسنگ پر اکسانے کا الزام بھی ہے۔ محمد عرفان اور خالد لطیف کا جرم بظاہر چھوٹا ہے مگر دونوں نے بکیز کے رابطوں سے متعلق کرکٹ بورڈ کو نہیں بتایا ۔شرجیل خان بھی خود پرعائد الزامات کو ابھی تک بے بنیاد قرار دے رہے ہیں ۔ابتدائی تحقیقات کے بعد تمام ریکارڈ اور شواہد ٹریبونل کو فراہم کیے جائیں گے جو شواہد کی روشنی میں ایک ماہ میں فیصلہ کرے گا۔
