لاہور(خصوصی رپورٹ)) پیپلز پارٹی پارلیمنٹرین کے صدر آصف زرداری نے کہا ہے کہ آئندہ الیکشن سے پہلے پنجاب میں بڑے بڑے برج الٹا دیں گے،سندھ کی جانب دیکھنے والے آئندہ الیکشن کے بعد پنجاب میں حکومت بنانے کی غلط فہمی بھی دماغ سے نکال لیں اس بار دھاندلی نہیں کرنے دیں گے۔ بلاول ہاﺅس لاہور سے جاری بیان میں آصف علی زرداری نے کہا کہ سندھ کی جانب دیکھنے والے پنجاب میں آئندہ الیکشن میں اپنی حکومت بنانے کی غلط فہمی اپنے دماغ سے نکال دیں پاکستان پیپلز پارٹی پنجاب میں واضح اکثریت حاصل کریں گی۔انہوں نے کہاکہ اس بار حکمرانوں کو دھاندلی نہیں کرنے دیں گے، آئندہ الیکشن میں پنجاب میں بھی حکومت ہم بنائیں گے ساتھ ہی انہوں نے مزدور، وکیل، اور خواتین تنظیموں کو دوہزار اٹھارہ کے انتخابات کی تیاری شروع کرنے کی ہدایات بھی جاری کیا۔ ترجمان بلاول ہاﺅس کے مطابق آصف علی زرداری نے عوامی تحریک کے سربراہ ڈاکٹر طاہر القادری کو بھی فون کرکے خیریت دریافت کی اور ان سے سے کہا کہ آپ ٹھیک ہوجائیں پھر پنجاب میں ہلچل مچانی ہے۔ اس موقع پر انہوں نے ڈاکٹر طاہر القادری کی جلد صحت یابی کی دعا کی ٹیلی فونک رابطے پر دونوں رہنماوں نے ملک کی سیاسی صورت حال پر بھی تبادلہ خیال کیا گیا۔دوسری جانب عوامی تحریک کے ترجمان کے مطابق ڈاکٹر طاہرالقادری سے گفتگو کرتے ہوئے آصف علی زرداری نے کہا کہ سانحہ ماڈل ٹاﺅن انسانی حقوق کی سنگین خلاف ورزی کا معاملہ ہے جسے نظر انداز نہیں کیا جا سکتا۔ ماڈل ٹاﺅن میں قتل کیے جانے والے کارکن ریاست پاکستان کے شہری تھے انہیں انصاف ملنا چاہیے اور جسٹس باقر نجفی کمیشن کی رپورٹ پبلک ہونی چاہیے۔ انہوں نے کہا کہ پیپلز پارٹی نے بہت لاشیں اٹھائیں، ظلم سہے اس لیے ہمارے نزدیک ہر سیاسی جماعت کا کارکن قابل احترام ہے اور اسے حکومت پر تنقید کرنے اور اپنی رائے دینے کا حق ہے ۔ ہم نے ہمیشہ حزب مخالف کی رائے کا احترام کیا مگر پنجاب میںآزادی اظہار رائے کے حق کو استعمال کرنے والے سیاسی کارکنوں کو حکومتی جبر کا نشانہ بنایاجاتا ہے ۔انہوں نے کہا کہ پیپلز پارٹی نے ہمیشہ سیاسی و جمہوری حقوق کے تحفظ کی جنگ لڑی اور ہر قسم کے ظلم کے خلاف صدائے احتجاج بلند کی اور اس کی قیمت بھی ادا کی۔ انہوں نے کہا کہ قتل کیے جانے والے بے گناہ کارکنوں کے انصاف کے حصول کی جدوجہد میں ہم ڈاکٹر طاہر القادری اور ان کے کارکنوں کے ساتھ ہیں۔ ڈاکٹر طاہر القادری کا کہنا تھا کہ 17 جون 2014 ءکے دن پنجاب پولیس نے شریف برادران کی پرائیویٹ ملیشیا کا کردار ادا کیا‘ انہوں نے کہا کہ عوامی تحریک سانحہ ماڈل ٹاﺅن کے انصاف بشکل قصاص کے لیے قانونی جدوجہد کررہی ہے‘ ہمارے بے گناہ کارکنوں کے قاتل حکمران ہیں‘ جو اس وقت ریاستی طاقت اور عہدوں کے پیچھے چھپے ہوئے ہیں‘ ملک میں انصاف اور قانون کی حکمرانی کیلئے سانحہ ماڈل ٹاﺅن کا انصاف ناگزیر ہے‘ انہوں نے کہا کہ 17 جون 2014 ءکے دن ریاستی ادارے پولیس نے شریف برادران کی ہدایت پر انسانوں کا شکار کھیلا۔ 100 سے زائد افراد کو گولیوںسے چھلنی کیا جن میں 14شہید ہو گئے اور بیشتر معذورہیں‘ بربریت اور سفاکیت کے یہ تمام مناظر کیمرے کی آنکھ میں محفوظ ہیں اس کے باوجود ہم سے ثبوت مانگے جارہے ہیں اور اڑھائی سال گزر جانے کے بعد بھی ماسٹر مائنڈز سے کوئی سوال تک نہیں کیا گیا۔ انہوں نے کہا کہ ہم ہر فورم پر مطالبہ کر چکے ہیں کہ جسٹس باقر نجفی کمیشن کی رپورٹ منظر عام پر لائی جائے ۔ آصف زرداری نے کہا ہے کہ عمران خان کو صرف ہمارے کیسز میں مک مکا نظر آتا ہے۔ جب ان کے اپنے کیسز الیکشن کمیشن سے کلیئر ہوئے تب تو انہیں مک مکا نظر نہ آیا۔ نجی ٹی وی کے مطابق آصف زرداری نے کہا کہ عمران خان کو اپنے کیسز میں نہیں لیکن ہمارے کیسز میں مک مکا نظر آتا ہے۔ پیپلزپارٹی نے کوئی ڈیل نہیں کی، عدالتوں میں مقدمات کا سامنا کیا اور کیسز کلیئر کرائے۔
