لاہور (خصوصی رپورٹ) نیوز لیکس کی رپورٹ سامنے آنے اور آئی ایس پی آر کی جانب سے اس پر بیان جاری کرنے کے بعد سوشل میڈیا پر فوج کے خلاف مہم کے حوالے سے تحقیقاتی اداروں نے کام شروع کر دیا ہے۔ مہم چلانے میں کون کون متحرک ہے‘ کہاں کہاں سے فیس بک پر پوسٹ کی گئیں اور جعلی ویڈیو اور دیگر تصاویر کس طرح سوشل میڈیا پر لائی گئیں‘ اس حوالے سے تحقیقات شروع کر دی گئی ہیں۔ مصدقہ ذرائع کے مطابق اس حوالے سے جعلی اکاﺅنٹس بھی سامنے آئے ہیں۔ ابتدائی رپورٹ میں انکشاف ہوا ہے کہ مختلف اکاﺅنٹس سے حساس اداروں کے خلاف سوشل میڈیا پر پراپیگنڈا کیا جا رہا ہے‘ دو ایسے فیس بک اکاﺅنٹس بھی سامنے آئے جن میں سے ایک چنائی اور دوسرا دہلی سے آپریٹ ہو رہا ہے۔ حساس اداروں نے اس حوالے سے کئی اہم ثبوت اکٹھے کر لئے ہیں کہ ایک منصوبہ بندی کے تحت پاک فوج کے خلاف سازش کی جا رہی ہے۔ مکمل تفصیلات اکٹھی ہونے کے بعد فوری کارروائی کی بجائے حکمت عملی کے تحت ایسے تمام افراد کو نہ صرف بے نقاب کیا جائے گا بلکہ ان کے خلاف باقاعدہ کارروائی بھی ہو گی۔ ایسے فیس بک اکاﺅنٹس کی بھی معلومات لی گئیں جن پر ڈی جی آئی ایس پی آر کی پریس بریفنگ کے بعد فوری طور پر پاک فوج کے خلاف پراپیگنڈا شروع کیا گیا۔ کئی سیاستدانوں‘ میڈیا پر چلنے والے بیانات اور کئی ایسی چیزیں جن کا حقیقت سے تعلق نہیں ان کو سوشل میڈیا پر چلایا گیا جس سے یہ واضح پتہ چل رہا تھا کہ باقاعدہ پلاننگ کے تحت یہ کیا جا رہا ہے۔ ایک میڈیا ہاﺅس کے حوالے سے بھی کچھ چیزیں حاصل کی گئی ہیں جنہوں نے اس مہم پر کام کیا۔
فوج کے خلاف مہم
