کیلیفورنیا کے یوسمائیٹ نیشنل پارک میں واقع ایک آبشار فروری کے مہینے میں دیکھنے والوں کو دنگ یا مسحور کر دیتی ہے۔
جی ہاں واقعی ہارس ٹیل فال نامی آبشار فروری میں ایسا قدرتی بصری دھوکا پیدا کرتی ہے جو دنگ کر دینے والا ہوتا ہے۔
قدرت کا یہ انوکھا مظہر دیکھنے میں اس وقت آتا ہے جب سورج کی روشنی کا رنگ پانی میں سرخ اور نارنجی ہوجاتا ہے اور ایسا لگتا ہے کہ پانی کی جگہ آگ یا لاوا بہہ رہا ہے۔
یہ آبشار 650 میٹر بلندی سے نیچے کی جانب بہتی ہے۔
یو ایس نیشنل پارک کے مطابق لاوا بہنے کا منظر ہر سال صرف فروری کے وسط سے اختتام تک نظر آتا ہے۔
یہ منظر اسی وقت نظر آتا ہے جب شام کو آسمان صاف ہوتا ہے اور آبشار میں پانی بہہ رہا ہوتا ہے۔
عام طور پر اس آبشار میں پانی سردیوں میں ہی بہتا ہے اور اگر شام میں ہلکی دھند یا بادل موجود ہوں تو لاوا بہنے کا نظارہ غائب ہو جاتا ہے۔
سورج غروب ہونے کے وقت نارنجی روشنی جب پانی پر پڑتی ہے تو ایسا لگتا ہے کہ پانی کی جگہ لاوا بہہ رہا ہے۔
