ناروے کے بادشاہ ہیرالڈ پنجم 89 برس کی عمر میں انتقال کرگئے۔ شاہی محل کے مطابق وہ 28 اگست 2026 کو صبح 6 بج کر 35 منٹ پر اوسلو یونیورسٹی اسپتال میں پُرامن طور پر انتقال کر گئے۔
بادشاہ ہیرالڈ پنجم یورپ کے سب سے معمر حکمران تھے اور انہوں نے 1991 میں اپنے والد بادشاہ اولاف پنجم کے انتقال کے بعد ناروے کی بادشاہت سنبھالی تھی۔ وہ تین دہائیوں سے زائد عرصے تک ناروے کے سربراہِ مملکت رہے۔
ہیرالڈ پنجم گزشتہ کئی برسوں سے صحت کے مسائل کا سامنا کر رہے تھے۔ انہیں 17 اگست کو اسپتال میں داخل کیا گیا تھا، جہاں ان کا علاج خون کی ایک بیماری ہیمولائٹک انیمیا اور بعد ازاں خون میں بیکٹیریا کے انفیکشن کے لیے کیا جا رہا تھا۔ ان کی حالت گزشتہ روز انتہائی تشویشناک قرار دی گئی تھی۔
ہیرالڈ پنجم کی شخصیت ناروے میں خاصی مقبول تھی۔ ان کے دورِ حکومت میں شاہی خاندان کو جدید تقاضوں سے ہم آہنگ کرنے اور عوام کے ساتھ مضبوط تعلق قائم رکھنے پر توجہ دی گئی۔ وہ کشتی رانی کے شوقین تھے اور 1964، 1968 اور 1972 کے اولمپکس میں ناروے کی نمائندگی بھی کرچکے تھے۔
بادشاہ ہیرالڈ پنجم کے انتقال کے بعد ان کے 53 سالہ صاحبزادے ولی عہد ہاکون تخت سنبھالیں گے اور ناروے کے نئے بادشاہ بن جائیں گے۔
ہیرالڈ پنجم کے انتقال سے ناروے میں ایک طویل شاہی دور اختتام پذیر ہوگیا ہے، جبکہ ملک میں ان کی وفات پر سوگ کی فضا ہے۔
