پاکستان اور روس میں تعلیمی تعاون کے وسیع امکانات : روسی تعلیمی اتاشی گلیب شوبن

اسلام آباد (نامہ نگار خصوصی )علامہ اقبال اوپن یونیورسٹی نے پاکستان اور روس کے درمیان تعلیمی و ثقافتی روابط کے فروغ اور بین الاقوامی تعلیمی تعاون کو وسعت دینے کے لیے ابتدائی سطح کے ایک ماہ کے روسی زبان کورس کی تکمیل پر اسناد تقسیم کرنے کی تقریب منعقد کی۔ تقریب میں روسی سفارت خانے کے ثقافتی و تعلیمی اتاشی گلیب شوبن نے بطور مہمانِ خصوصی شرکت کی اور کورس کامیابی سے مکمل کرنے والے طلبہ میں اسناد تقسیم کیں۔تقریب سے خطاب کرتے ہوئے گلیب شوبن نے کہا کہ پاکستان اور روس کے درمیان تعلیمی تعاون اور ثقافتی تبادلوں کے وسیع امکانات موجود ہیں۔ تعلیمی شراکت داری دونوں ممالک کے عوام کو ایک دوسرے کی زبان، ثقافت، علمی روایات اور معاشرتی اقدار کو سمجھنے کے بہتر مواقع فراہم کرتی ہے۔ انہوں نے کورس مکمل کرنے والے شرکا کو مبارک باد دیتے ہوئے امید ظاہر کی کہ زبان سیکھنے کے ایسے اقدامات دونوں ممالک کے درمیان باہمی افہام و تفہیم اور دوستانہ تعلقات کو مزید مضبوط بنانے میں معاون ثابت ہوں گے۔وائس چانسلر پروفیسر ڈاکٹر ناصر محمود کی قیادت میں علامہ اقبال اوپن یونیورسٹی بین الاقوامی تعلیمی روابط کے فروغ، غیر ملکی زبانوں کی تدریس اور طلبہ کو عالمی سطح پر دستیاب تعلیمی مواقع سے مستفید کرنے کے لیے مختلف اقدامات کر رہی ہے۔ یونیورسٹی کا مقصد طلبہ کو معیاری تعلیم کے ساتھ مختلف زبانوں اور ثقافتوں سے روشناس کرانا اور بین الاقوامی تعاون کے نئے راستے کھولنا ہے۔ڈائریکٹر انٹرنیشنل کولیبریشن اینڈ ایکسچینج ڈاکٹر زاہد مجید نے اپنے خطاب میں کہا کہ علامہ اقبال اوپن یونیورسٹی پاکستانی طلبہ کو مختلف ممالک کی زبانیں سیکھنے اور ان کی ثقافت، تعلیمی روایات اور معاشرتی اقدار سے آگاہی حاصل کرنے کے مواقع فراہم کر رہی ہے۔ انہوں نے بتایا کہ روسی زبان کے کورس کا یہ گیارہواں بیچ ہے جبکہ اگلے بیچ کی تربیت نومبر میں شروع ہوگی اور یہ سلسلہ آئندہ بھی جاری رہے گا۔انہوں نے مزید بتایا کہ یونیورسٹی میں ترکیہ کا یونس ایمرے انسٹی ٹیوٹ اور جاپان پاکستان ایڈوانسمنٹ سینٹر بھی قائم ہیں جہاں طلبہ کو ترکی اور جاپانی زبانوں اور متعلقہ ممالک کی ثقافت سے واقفیت حاصل کرنے کے مواقع میسر ہیں۔ یونیورسٹی میں چینی اور جرمن زبانوں کے مراکز قائم کرنے کا منصوبہ بھی زیرِ غور ہے جو زبانوں کی تعلیم کو وسعت دینے اور بین الاقوامی تعلیمی روابط مضبوط بنانے کی کوششوں کا حصہ ہے۔روس کی اورال اسٹیٹ پیڈاگو جیکل یونیورسٹی کے پروفیسر ڈاکٹر انتون دولگوف اور ڈاکٹر رومن پوروزوف نے پاکستان میں روسی زبان کی تدریس کے اپنے تجربات شرکا کے ساتھ شیئر کرتے ہوئے کہا کہ غیر ملکی زبانیں سیکھنے سے مختلف ممالک کے عوام کے درمیان براہِ راست رابطوں، ثقافتی آگاہی اور باہمی اعتماد کو فروغ ملتا ہے۔تقریب کے اختتام پر مہمانِ خصوصی گلیب شوبن اور ڈاکٹر زاہد مجید نے روسی زبان کا کورس کامیابی سے مکمل کرنے والے شرکا میں اسناد تقسیم کیں۔