پیٹ کمنز کا عمران خان کی صحت اور اہلِ خانہ سے ملاقات پر اظہارِ تشویش

آسٹریلیا کے موجودہ ٹیسٹ کپتان پیٹ کمنز نے سابق پاکستانی وزیراعظم اور کرکٹ لیجنڈ عمران خان کے ساتھ اظہارِ حمایت کرتے ہوئے کہا ہے کہ انہیں وہ عزت اور وقار ملنا چاہیے جس کے ہر انسان حقدار ہے۔
کمنز کا بیان سابق آسٹریلوی کپتان گریگ چیپل سمیت سابق عالمی کرکٹ کپتانوں کی جانب سے عمران خان کے علاج اور حالات کے حوالے سے آواز اٹھانے کے بعد سامنے آیا۔ گریگ چیپل نے عمران خان کی صحت اور تنہائی پر تشویش ظاہر کرتے ہوئے کہا کہ ان کی موجودہ صورتحال پریشان کن ہے۔
اس معاملے پر 22 سابق بین الاقوامی کرکٹ کپتانوں نے وزیراعظم شہباز شریف کو خط بھی لکھا، جس میں عمران خان کو مناسب طبی سہولیات فراہم کرنے، آزادانہ طبی معائنہ کرانے اور عدالتی ہدایات پر عمل درآمد کا مطالبہ کیا گیا۔ خط میں سابق بھارتی کپتان سنیل گواسکر اور کپل دیو سمیت آسٹریلیا کے گریگ اور ایان چیپل بھی شامل ہیں۔
کرکٹ کے ان سابق عظیم کھلاڑیوں کا کہنا ہے کہ ان کی اپیل سیاسی حمایت نہیں بلکہ عمران خان کے بنیادی انسانی حقوق، طبی نگہداشت اور مناسب سلوک کو یقینی بنانے سے متعلق ہے۔
دوسری جانب پاکستانی حکومت عمران خان کے ساتھ بدسلوکی کے الزامات کی تردید کرتی ہے اور اس کا مؤقف ہے کہ انہیں طبی سہولیات اور اہلِ خانہ سے ملاقات سمیت مناسب سہولیات فراہم کی جا رہی ہیں۔