اسلام آباد (نامہ نگار خصوصی)قومی اسمبلی میں اپوزیشن لیڈر خورشید شاہ نے کہا ہے کہ ایسے لگ رہا ہے پہلے وزیر اعظم نواز شریف نا اہل ہوں گے اور پھر عمران خان ہوں گے دونوں دعا گو ہیں کہ کسی نہ کسی طرح وہ بچ جائیں لیکن ایسا دکھائی نہیں دے رہا۔اتوار کے روز میڈیا سے گفتگو کرتے ہوئے اپوزیشن لیڈر خورشید شاہ نے کہا ہے کہ نواز شریف اور عمران خان ایک سکے کے دو رخ ہیں دونوں کا تعلق جسم اور روح کی طرح ہے ،انہوں نے کہا کہ میں نہیں سمجھتا کہ عمران خان وزیر اعظم نواز شریف کے بغیر نا اہل ہوں گے حالات بتا رہے ہیں کہ پہلے نواز شریف نااہل ہوں گے اور پھر عمران خان پر نا اہلی کا دھبہ لگے گا،یہ بھی ہوسکتا ہے کہ دونوں ایک ساتھ ہی نا اہل ہو جائیں ۔واضح رہے کہ پاناما کیس میں جے آئی ٹی وزیر اعظم کیخلاف تحقیقات کررہی ہے جبکہ چیئرمین تحریک انصاف عمران خان کی نااہل کیس سپریم کورٹ میں زیر سماعت ہے ۔پاکستان پیپلز پارٹی وسطی پنجاب کے صدر قمر زمان کائرہ نے کہا ہے کہ وفاقی وزراءجتنا مرضی واویلا کر لیں پانامہ لیکس (ن) لیگ کے گلے کا طوق بن چکا ہے ،پیپلز پارٹی کی قیادت کے سیاسی طور پر متحرک ہونے سے حکمرانوںکی صفوںمیں ہلچل مچی ہوئی ہے ،آئندہ عام انتخابات میں بھرپور تیاری کے ساتھ میدان میں اتریں گے۔ ایک انٹر ویو میں انہوں نے کہا کہ حکمران خاندان کی طرف سے جے آئی ٹی کے ممبران پر اعتراض نے سب کچھ واضح کر دہا ہے ۔ اگر حکمرانوں کے ہاتھ صاف ہوتے تو انہیں عدم اعتماد کا حربہ استعمال کرنے کی ضرورت پیش نہ آتی ۔ انہوںنے کہا کہ موجودہ حکمران پیپلزپارٹی کے دور میں اور آج کے دور میں مہنگائی کا موازنہ کر لیں انہیں فرق معلوم ہو جائے گا۔سیینیٹ میںپیپلزپارٹی کے پارلیمانی لیڈر سینیٹر تاج حیدر نے وزیراعظم کے خاندان کی جانب سے پاناما لیکس کےس میں سپریم کورٹ کی قائم کردہ جے آئی ٹی پر سوالات اٹھانے پر مایوسی کا اظہار کرتے ہوئے ایک بیان میں کہا ہے کہ یہ جے آئی ٹی وزیراعظم اور ان کے خاندان کے خلاف تحقیقات کے لئے سپریم کورٹ نے قائم کی تھی اور اب یہ عدالت نے اب فیصلہ کرنا ہے کہ ملزمان قصوروار ہیں یا نہیں۔ انہوں نے کہا کہ سپریم کورٹ کے دو قابل احترام ججوں نے نواز شریف اور ان کے خاندان کو قصور وار قرار دیا ہے اور بقیہ تین ججوں نے بھی انہیں بے قصور نہیں کہا اور مزید تحقیقات کا حکم دیا
