لاہور(خصوصی رپورٹ)پنجاب پولیس کو غیر سیاسی کرنے کے دعوے دھرے کے دھرے ہی رہ گئے لیکن وردی کو تبدیلی کرنے کے لیے ایک مرتبہ پھر اقدامات شروع کر دئیے گئے ۔افسروں کی آپسی چپقلش یا سیاسی مداخلت، وجہ جو بھی ہو آئی جی آفس میں ہلکے سبز رنگ کی نئی وردی کو چھوڑنے کے لیے اجلاس منعقد ہونا شروع ہو گئے ۔تفصیل کے مطابق رواں سال یکم اپریل کو اس وقت کے آئی جی مشتاق احمد سکھیرا نے پنجاب پولیس کا یونیفارم تبدیل کر دیا اور شروعات لاہور سے کیں ، جس کے بعدمرحلہ وار تمام صوبے میں وردی تبدیل ہونا تھی ۔ یونیفارم تبدیلی کے فیصلے میں یہ بھی کہا گیا تھا کہ وردی تبدیل ہونے کے چھ ماہ میں اس بارے میں بہتری کے لیے نظر ثانی بھی کی جا سکتی ہے ۔مشتاق سکھیرا کے ریٹائر ہوتے ہی پنجاب پولیس نے یونیفارم تبدیل کرنے کے بارے میں اقدامات شروع کر دئیے ہیں ،اس ضمن میں آئی جی آفس میں متعدد اجلاس منعقد ہوئے جن میں نئے یونیفارم کے بارے میں افسروں کی رائے لی گئی۔ ذرائع کے مطابق بیشتر پولیس افسروں کی رائے ہے کہ موجودہ ہلکے سبز رنگ کی یونیفارم میں ہی تبدیلی کر لی جائے اور اس کو مزید بہتر بنا لیا جائے جبکہ بعض کا ماننا ہے کہ اس یونیفارم سے پولیس کا رعب جرائم پیشہ افراد پر ختم ہو گیا ہے لہذا پرانی کالی یونیفارم کو ہی دوبارہ استعمال کرنے کی اجازت دی جانی چاہیے ۔ دوسری جانب حکومتی اراکین کو پنجاب پولیس کی وردی میں خاصی دلچسپی ہے ، ذرائع کے مطابق متعدد ایم پی ایز اور ایم این ایز نے وزیر اعلی کو یونیفارم کو مکمل تبدیل کرنے کی درخواست کی ہے جس پر وزیر اعلی محمد شہباز شریف نے بھی پولیس وردی کی تبدیلی کی منظوری دے دی ہے لیکن تاحال آئی جی پنجاب اور پولیس افسراس بارے میں کوئی فیصلہ نہیں کر سکے ۔ سنٹرل پولیس آفس کے ذرائع نے بتایا کہ سی سی پی او لاہور امین وینس بھی اس بارے میں لاہور پولیس سے رائے لے چکے ہیں کہ یونیفارم کیسا ہے اور کیا اسے تبدیل کیا جانا چاہیے یا نہیں ؟۔ ذرائع کے مطابق آئندہ ایک دو ہفتوں میں اس بات کا فیصلہ کرکے وزیر اعلی کو رپورٹ ارسال کردی جائے گی۔
