لاہور (آئی این پی) سپاٹ فکسنگ کیس میں ملوث شرجیل خان کے کیس کی آئندہ سماعت 13جولائی کو نیشنل کرکٹ اکیڈمی لاہور میں ہوگی۔جسٹس (ر) اصغر حیدر کی سربراہی میں بننے والے پی سی بی اینٹی کرپشن ٹربیونل کے روبرو برطانوی کرائم ایجنسی کے منیجر آپریشنز بھی ذاتی طور پر پیش ہوں گے۔ یا پھر سکائپ پر اپنی ماہرانہ رائے دیں گے۔اینٹی کرپشن ٹربیونل کو برطانوی کرائم ایجنسی کے منیجر آپریشنزکے بیان سے راہنمائی ملے گی۔ پاکستان کرکٹ بورڈ کی جانب سے ساتھی کھلاڑی خالد لطیف کی آڈیو ویڈیو ریکارڈنگز کو کیس میں شامل کرنے کی ٹربیونل کو دی جانے والی درخواست کی شرجیل خان کے وکیل نے مخالفت کی ہے شرجیل خان کیس میں خالد لطیف کی ریکارڈنگ سے متعلق درخواست پر فیصلہ 13 جولائی کو ہو گا ،واضح رہے کہ رواں سال فروری میں کھیلی گئی پاکستان سپر لیگ کے دوسرے سیزن میں اسلام آباد یونائیٹڈ کے کھلاڑی شرجیل خان اور خالد لطیف پر اسپاٹ فکسنگ کا الزام ہونے کی وجہ سے انہیں معطل کردیا گیا تھا جس کے سبب وہ ٹورنامنٹ میں مزید شرکت نہیں کر سکے تھے۔
