چئیرمین آئی سی سی ششناک منوہر کا دورہ پاکستان منسوخ

لاہور/دبئی(آئی این پی) انٹرنیشنل کرکٹ کونسل(آئی سی سی ) کے چیئرمین ششانک منوہر کے مجوزہ دورہ پاکستان کے امکانات ختم ہو گئے ہیں ۔پی سی بی کے چیئرمین شہریار خان نے گزشتہ ماہ آئی سی سی کے اجلاس کے موقع پر چیئرمین آئی سی سی ششانک منوہر کو دورہ پاکستان کی دعوت دی تھی ۔ششانک منوہر کے رضامندی ظاہر کرنے کے بعد پی سی بی نے باضابطہ طور پر آئی سی سی کو دعوت نامہ بھی بھجوا دیا اور آئی سی سی نے دورے کو ممکن بنانے کے لیے منصوبہ بندی شروع کر دی ۔ذرائع کے مطابق ششانک منوہر نے سبکدوش ہونے والے چیرمین پی سی بی شہریار خان کے اعزاز میں ہونے والی الوداعی تقریب میں بھی شرکت کرنا تھی تاہم کرکٹ بورڈ کے اعلیٰ حکام میں اس حوالے سے عدم اتفاق کے باعث دورہ کھٹائی کا شکار ہوتا نظر آ رہا ہے، آئی سی سی کو آگاہ کر دیا گیا ہے کہ موجودہ صورتحال میں دورہ مناسب نہیں ہو گا ۔ششانک منوہر کے مجوزہ دورے کے لیے شہریار خان کے چیئرمین کی حیثیت سے سبکدوشی سے قبل جولائی کا آخری ہفتہ رکھا گیا تھا ۔ آئی سی سی کا کہنا ہے کہ پاکستان کی موجودہ صورتحال میں ششانک منوہر کا دورہ مناسب نہیں، دورے کیلئے باہمی رضا مندی سے آئندہ نئی تاریخ طے کی جائے گی۔پی سی بی کے چیئرمین شہریار خان نے گزشتہ ماہ آئی سی سی کے اجلاس کے موقع پر چیئرمین آئی سی سی ششانک منوہر کو دورہ پاکستان کی دعوت دی تھی۔ ان کی جانب سے رضامندی کے اظہار کے بعد پی سی بی نے باضابطہ طور پر آئی سی سی کو دعوت نامہ بھجوایا تھا اور آئی سی سی نے دورے کے حوالے سے منصوبہ بندی بھی شروع کر دی تھی۔ آئی سی سی چیف کے دورہ کے دوران ستمبر میں ورلڈ الیون کے دورہ پاکستان کے حوالے سے حتمی فیصلہ بھی متوقع تھا۔کرکٹ بورڈ کے دو بڑوں کے درمیان ششانک منوہر کے دورے کے حوالے سے ہم آہنگی نہ ہونے کی وجہ سے یہ دورہ کٹھائی میں پڑ گیا اور آئی سی سی کو بتایا گیا ہے کہ موجودہ صورت حال میں دورہ مناسب نہیں ہے۔