اسلام آباد (مانیٹرنگ ڈیسک) ایوان بالا میں قائد حزب اختلاف اعتزاز احسن نے کہا ہے کہ پانامہ کیس کا فیصلہ قانون اور آئین کے مطابق ہو گا۔ قانون و آئین کے مطابق فیصلہ آنے کی صورت میں شریف فیملی نہیں بچ سکتی۔ نجی ٹی وی سے گفتگو کرتے ہوئے انہوں نے کہا کہ پانامہ فیصلہ کیلئے پورے بنچ کا بیٹھنا مناسب ہے، کیس کے دو فائنل فیصلے نہیں آ سکتے، شریف فیملی کی جانب سے جعلسازی سب سے زیادہ خطرنام معاملہ ہے، اگر یہ درست ہے کہ کیلبری فونٹ کے ذریعے جعلسازی کی گئی تو سنگین جرم ہے۔ اس طرح کی جعلسازی عدالت عظمیٰ میں پہلے کبھی نہیں پیش کی گئی تحریک انصاف کے رہنما معروف قانونی ماہر بابر اعوان نے کہا کہ پانامہ کیس پاکستان کا نوازشریف کیخلاف ہے، 45 فیصد فیصلہ تو پہلے ہی آ چکا ہے ایک بھی جج نے شریف فیملی کے خلاف فیصلہ دیا تو کرپشن کا باب ختم ہو جائے گا شریف فیملی کو عدالت نے بہت وقت دیا لیکن کوئی منی ٹریل پیش نہ کر سکے۔ جی آئی ٹی کے سوال کے جواب دینے کی بجائے گالیاں اور دھمکیاں دیتے رہے۔ جسٹس (ر) ناصرہ جاوید اقبال نے کہا کہ پانامہ کیس سننے والے ججز صاحبان کا فیصلہ پاکستان کیلئے بہترین ہو گا، پوری قوم کی نظریں سپریم کورٹ پر ہیں۔ پانچ دانا ججز مل کر فیصلہ دیں گے تو انہیں خوب معلوم ہو گا کہ سچ کیا ہے۔ پانامہ کیس کا فیصلہ 5 ججز نے ہی کرنا ہے، پہلے دن سے یہی کہتی رہی ہوں۔
