دبئی(سپورٹس ڈیسک) انٹرنیشنل کرکٹ کونسل (آئی سی سی) نے بھارتی کرکٹر رویندر جدیجا کو قوانین کی خلاف ورزی کرنے پر ایک ٹیسٹ معطل کر دیا ہے۔ جدیجا اب سری لنکا کیخلاف تیسرا ٹیسٹ نہیں کھیل پائیں گے۔ خیال رہے کہ رویندر جدیجا نے سری لنکا کیخلاف دوسرے ٹیسٹ میں تباہ کن باو¿لنگ کر کے اپنی ٹیم کی جیت میں اہم کردار ادا کیا تھا۔ میچ کے چوتھے روز انہوں نے پانچ سری لنکن کھلاڑیوں کی وکٹیں حاصل کی تھیں۔تاہم میچ کے 58 اوور میں انہوں نے آئی سی سی کے قوانین کی خلاف ورزی کی جس کی وجہ سے ان پر ایک ٹیسٹ کی پابندی عائد کر دی گئی ہے۔ دراصل اپنے اس اوور میں جدیجا نے فیلڈنگ کرتے ہوئے سری لنکن کھلاڑی مالنڈا پشپاکمارا کی جانب گیند پھینکی جس سے وہ بال بال بچے تھے۔ اس کے علاوہ رویندر جدیجا کیخلاف میچ فیس کا 50 فیصد جرمانہ بھی عائد کر دیا گیا ہے۔
