پی ایس ایل طرز پرہاکی لیگ منعقد کرنے پر غور

اسلام آباد (اے پی پی) پاکستان ہاکی فیڈریشن (پی ایچ ایف) کے صدر خالد سجاد کھوکھر نے ملک میں ہاکی کھیل کے فروغ اور کھویا ہوا مقام دوبارہ حاصل کرنے کی ضرورت پر زور دیتے ہوئے کہا کہ میرٹ کا خاص خیال رکھنا اور کوچنگ کے طریقہ کار کو بہتر بنایا جائے گا، فیڈریشن نے اپنے اجلاس میں پاکستان سپر لیگ طرز کی ہاکی لیگ منعقد کروانے پر بھی غور کیا، اس کے علاوہ الیکشن رولزاور ویمن ہاکی کو 20 فیصد نمائندگی دینے کی بھی منظوری دی گئی۔ جمعرات کو پی ایچ ایف ایگزیکٹو بورڈ کااجلاس اسلام آباد میں منعقد ہوا،اجلاس کی صدارت فیڈریشن کے صدر خالد سجاد کھوکھر نے کی، اجلاس میں نائب صدور نوابزادہ لشکری رئیسانی ،سید محمد طارق ،سیکرٹری شہباز احمد سینئر،خزانچی اخلاق عثمانی ،چیف سیلکٹرحسن سردار ، ٹیکنو کریٹس اصلاح الدین صدیقی ، نوید عالم ، مصدق حسین ،وومن ونگ کی چیئر پرسن خوش بخت شجاعت کے علاوہ تین صوبوں کی ہاکی کی ایسوسی ایشنز کے سیکرٹریز کرنل آصف کھوکھر(پنجاب)،رمضان جمالی(سندھ ) اور امجد ستی (بلوچستان)کے علاوہ آرمی اور واپڈا کے نمائندوں نے بھی شرکت کی۔ جبکہ کے پی کے میں ہاکی ایسوسی ایشنز دھڑے بندی کا شکار ہیں جس کی وجہ سے اجلاس میں اس صوبے کی نمائندگی نہیں ہو سکی۔ نوید عالم نے بتایا کہ اجلاس میں صدر خالد سجاد کھوکھر نے ہاکی کھیل کے فروغ اور کھویا ہوا مقام دوبارہ حاصل کرنے کی ضرورت پر زور دیتے ہوئے کہا کہ میرٹ کا خاص خیال رکھنا اور کوچنگ کے طریقہ کار کو بہتر بنایا جائے گا،اجلاس میں سیکرٹری جنرل شہباز احمد سینئر نے آمدن اور اخراجات کی تفصیل اجلاس میں پیش کی اور چیک اینڈ بیلنس کی ضرورت انہوں نے زور دیا۔اجلاس میں سب سے پہلے سابقہ اجلاس کی کارروائی کی منظوری دی گئی جبکہ الیکشن رولزاور وومن ہاکی کو 20فیصد نمائندگی دینے کی بھی منظوری دی گئی۔اجلاس میں وومن ہاکی کے فروغ اور 2017-18کے الیکشن اور سکروٹنی پر بھی غور کیا گیا۔اجلاس میں کمپٹیشن کمیٹی،امپائرنگ کمیٹی،ڈسپلن کمیٹی،فنانس کمیٹی ،آئنی کمیٹی اور کوچنگ کمیٹی بنانے کی بھی منظوری دی گئی تاکہ تمام شعبے اپنا اپنا کام شروع کر سکیں۔اجلاس میں نئی منیجمنٹ اور نئی سلیکشن کمیٹی کے قیام کی بھی منظوری دی گئی۔اجلاس میں تھنک ٹینک کے قیام اور پی ایس ایل کی طرز پر ہاکی لیگ کروانے پر بھی غور کیا گیا۔