کراچی (مانیٹرنگ ڈیسک) آئی ایس اونے گزشتہ روز صدر ٹرمپ کے بیان کے خلاف زبردست احتجاج کیا اور امریکہ مردہ باد ریلی نکالی ریلی کے شرکاءکو امریکی قونصلیٹ کی طرف سے جانے سے روک دیا گیا۔ آئی ایس او کی امریکہ کے خلاف ریلی کے شرکاءپر پولیس نے شیلنگ اور لاٹھی چارج کردیا۔ جبکہ کارروائی کرتے ہوئے ریلی کے 10شرکا کو بھی حراست میں لے لیا تھا۔ تاہم پولیس اور امامیہ سٹوڈنٹس آرگنائزیشن کے درمیان کامیاب مذاکرات کی وجہ سے نماز مغربین کے بعد پرامن طور پر منتشر ہونے کا اعلان کردیا۔ وزیر اطلاعات سندھ ناصر شاہ نے کہا ہے کہ ملک میں قائم سفارت خانوں اور سفارتکاروں کی حفاظت حکومت کی اولین ذمہ داری ہے کسی فرد یا پارٹی کو امریکی قونصلیٹ جانے کی اجازت نہیں دیں گے۔ کراچی میں امریکی قونصلیٹ کی جانب امامیہ سٹوڈنٹس آرگنائزیشن کے مظاہرین کے مارچ اور اس کے بعد پیدا ہونے والی سنگین صورت حال پر حکومت سندھ کا موقف بتاتے ہوئے وزیراطلاعات سندھ کا کہنا تھا کہ مظاہرین نے امریکی سفارتخانے کی جانب مارچ کے دوران پر تشدد رویہ اختیار کیا حالانکہ ایک وفد کو اپنی یادداشت قونصلیٹ تک پہنچانے کا کہا گیا تھا مگر اس کے باوجود ایسا نہیں کیا گیا۔
