ممبئی(ویب ڈیسک) بالی ووڈ فلموں پر اپنے بے لاگ تبصروں اور سپر اسٹارز کو برا بھلا کہنے والے کمال راشد خان ٹوئٹر پر دوبارہ فعال ہوگئے ہیں اور آتے ہی انہوں نے شاہ رخ، سلمان اور عامر خان کو کھلا چیلنج بھی دے ڈالا ہے۔سوشل میڈیا پر بالی ووڈ فلموں پر تبصرے اور سپر اسٹارز پر نامناسب الفاظ میں تنقید کرنے والے بھارتی اداکار کمال راشد خان کا ٹوئٹر اکاؤنٹ بند کردیا گیا تھا اور اس پر انہوں نے خودکشی کی بھی دھمکی دے ڈالی تھی تاہم اب کمال راشد خان ایک مرتبہ پھر مائیکرو بلاگنگ ویب سائٹ پر متحرک ہوگئے ہیں اور آتے ہی انہوں نے شاہ رخ، سلمان اورعامر خان کو نشانہ بنایا ہے۔کمال راشد خان کے نئے ٹوئٹر اکاؤنٹ کو آفیشل تو قرار نہیں دیا گیا لیکن اس کے باوجود ان کے فالوورز کی تعداد ہزاروں میں پہنچ گئی ہے۔ اپنی ٹوئٹ میں ان کا کہنا تھا کہ شاہ رخ، سلمان اورعامر خان نے ٹوئٹر انتظامیہ کو میرا اکاؤنٹ معطل کرنے پر مجبور کیا لیکن وہ ایسا کرکے مجھے ان کی فلموں پر تبصرہ کرنے سے نہیں روک سکتے۔ میں تبصرہ کرکے لوگوں کو ان کی بے کار فلمیں دیکھنے سے بچاتا ہوں، مجھے روکنے کے بجائے انہیں اچھی فلمیں بنانی چاہئیں۔
