نیا سمارٹ فون متعارف، فزیکل سوئچ سے کیمرہ اور مائیکروفون بند کرنیکی سہولت

کراچی (این این آئی) ٹیکنالوجی کی دنیا میں ذاتی معلومات کے تحفظ کو ترجیح دینے والے صارفین کے لیے ایک نیا سمارٹ فون بریکس ونک (Brax Wink) متعارف کرانے کی تیاری کی جارہی ہے، جسے خاص طور پر صارفین کی پرائیویسی اور ڈیجیٹل سکیورٹی کو مدنظر رکھتے ہوئے تیار کیا گیا ہے۔ اس فون کی نمایاں خصوصیت ایک فزیکل سوئچ ہے جس کی مدد سے موبائل نیٹ ورک، مائیکروفون، کیمرہ، لوکیشن اور دیگر سینسرز کو بند کیا جا سکتا ہے۔ بلیک بیری سے مشابہت رکھنے والے اس سمارٹ فون میں چار انچ کی اولیڈ ٹچ اسکرین کے ساتھ مکمل فزیکل کی بورڈ دیا گیا ہے، جس کے ذریعے صارفین پیغامات اور دیگر تحریری مواد آسانی سے ٹائپ کر سکیں گے۔ فون کو ماڈیولر ڈیزائن کے تحت تیار کیا گیا ہے، جس سے بعض حصوں کو تبدیل کرنے اور اضافی بیٹری ماڈیول استعمال کرنے کی سہولت بھی فراہم کی جاسکے گی۔ بریکس ونک میں بریکس او ایس (BraxOS) استعمال کیا جائے گا، جو اینڈرائیڈ پر مبنی ہے، تاہم اسے گوگل کی سروسز سے الگ رکھا گیا ہے۔ اس طرح صارفین کو فون استعمال کرنے کے لیے گوگل اکاؤنٹ بنانے کی ضرورت نہیں ہوگی۔ کمپنی کے مطابق آپریٹنگ سسٹم کا مقصد صارفین کی سرگرمیوں کی نگرانی اور اشتہارات کے لیے ذاتی ڈیٹا جمع کرنے کے عمل کو محدود کرنا ہے۔ فون کا سافٹ ویئر اوپن سورس ہوگا جس سے ماہرین اس کے کوڈ کا جائزہ لے سکیں گے۔ اس میں محفوظ رابطوں کے لیے اینڈ ٹو اینڈ انکرپٹڈ کالز اور پیغامات کی سہولت بھی شامل ہوگی جبکہ ڈیٹا اونلی موڈ کے ذریعے روایتی موبائل کالز اور ایس ایم ایس بند کرکے انٹرنیٹ پر مبنی کالنگ اور میسجنگ استعمال کی جا سکے گی۔