نئی دہلی (نیااخبار رپورٹ) بھارتی دارالحکومت دہلی میں مغل دورکی تاریخی جامع مسجد میں دراڑیں پڑنے کا انکشاف ہوا ہے۔ جمعرات کو بھارتی ذرائع ابلاغ کے مطابق 361 سال قدیم جامع مسجد کو فوری طور پر مرمت کی ضرورت ہے، پانی کے رساﺅ کے باعث جامع مسجد کے ڈھانچے کو شدید نقصان پہنچ رہا ہے۔ تاریخی جامع مسجد کے شاہی امام سید احمد بخاری نے کہا ہے کہ انہوں نے گزشتہ سال بھارتی وزیراعظم نریندرا مودی کو ایک خط ارسال کیا تھا جس میں ان کی توجہ مسجد کی خستہ حالی اور اس کی مرمت کی جانب مبذول کرائی گئی تھی۔ انہوں نے کہا کہ اس سلسلے میں بھارت کے آثار قدیمہ کے محکمہ سے بھی کئی اپیلیں کی گئی ہیں جن میں کہا گیا ہے کہ صورتحال تیزی سے سنگینی کی طرف بڑھ رہی ہے۔ سید احمد بخاری نے کہا کہ جامع مسجد کے مرکزی ہال اور 3 گنبندوں کی فوری مرمت کی ضرورت ہے۔ جامع مسجد دہلی کا شمار بھارت کی بڑی مساجد میں ہوتا ہے اور اسے مغل بادشاہ شاہ جہاں نے تعمیر کرایا تھا۔ دہلی کی تاریخی جامع مسجد کی تعمیر کا آغاز 1648ءمیں ہوا تھا اور اس کی تعمیر 10 لاکھ روپے میں 6 برس میں مکمل ہوئی تھی۔
