کانگو: (ویب ڈیسک) افریقی ملک کانگو میں یوگنڈا کی سرحد کے قریب اقوام متحدہ کے فوجی کیمپ پر حملے میں ہلاک ہونے والے فوجیوں کی تعداد 20 ہو گئی ہے جبکہ 500 سے زائد زخمی ہیں۔ غیر ملکی خبر رساں ادارے کے مطابق افریقی ملک یوگنڈا کی سرحد سے متصل کانگو کے علاقے شمالی کیوو میں مسلح جتھے نے اقوام متحدہ کے فوجی اڈے پر حملہ کر دیا۔ اقوام متحدہ کے سیکرٹری جنرل نے حملے کی مذمت کی ہے۔ انہوں نے اسے اہلکاروں پر اب تک کا بد ترین حملہ قرار دیا ہے۔

بیجنگ: (ویب ڈیسک) چین کے صدر شی جن پنگ نے عالمی برادری پر زور دیا ہے کہ وہ ترقی پذیر ممالک میں انسانی حقوق کے حوالے سے لوگوں کی خواہشات کا احترام کرے۔ انسانی حقوق کا تحفظ ضرور کیا جانا چاہئے لیکن یہ خصوصی قومی روایات اور عوام کی ضروریات کی روشنی میں کیا جانا چاہئے۔ ان خیالات کا اظہار انہوں نے انسانی حقوق فورم کے اجلاس کے نام اپنے ایک پیغام میں کیا۔ اجلاس گزشتہ روز بیجنگ میں شروع ہوا۔ صدر شی نے اپنے مبارکباد کے پیغام میں کہا ہے کہ انہیں خوشی ہوئی ہے کہ فورم اپنے اجلاس میں انسانی حقوق پر تبادلہ خیال کر رہا ہے اور وہ ترقی پذیر ممالک اور دنیا کے دیگر ممالک میں انسانی حقوق کے فروغ کو بھی زیر بحث لا رہا ہے۔