اسلام آباد (نیا اخبار رپورٹ)ایف آئی اے نے پاکستانی شہریوں کے اے ٹی ایم اور کریڈٹ کارڈز کا ڈیٹا چوری کر کے بینک اکاﺅنٹس سے کروڑوں روپے ہتھیانے والے بین الاقوامی گروہ کا سراغ لگالیا،اس گروہ کے گرفتار ملزم ثاقب نے انکشاف کیا ہے کہ پاکستانی شہریوں کے بینک اکاﺅنٹس کا ڈیٹا انڈین ہیکرز کو فراہم کیا جاتا تھااور انڈین ہیکرز بینکوں کی اے ٹی ایم مشینوں سے رقوم نکالنے کےلئے چین سے سکیمر اور دیگر آلات تیار کروا کر پاکستان بھیجتے تھے، ملزم خواتین کی فحش ویڈیو بنا کر انہیں بلیک میل کرنے میں بھی ملوث رہا ہے،ملزم کا عدالت سے 11روزہ جسمانی ریمانڈ حاصل کر کے تفتیش کی جا رہی ہے۔جمعہ کو ڈائریکٹر ایف آئی اے اسلام آباد شکیل درانی نے اپنے دفتر میں پریس کانفرنس کرتے ہوئے بتایا کہ وزیرداخلہ کی ہدایت تھی کہ لوگوں کومختلف قسم کے فراڈ سے بچنے کے لئے آگاہ کیا جائے ،سائبر کرائم ونگ نے اپنے طور پر فراڈ کرنے والے ملزمان کا پیچھا کرتے ہوئے ایک ثاقب نامی ملزم کو گرفتار کیا جو جعلی اے ٹی ایم کارڈز کے ذریعے فراڈ کرتا تھا ،ملزم کے قبضے سے سکیمر ایم ایس آر، لیپ ٹاپ، بلینک پی وی سی کارڈ، ایک موبائل فون اور چوری شدہ کریڈٹ کارڈز بھی برآمد کئے گئے ہیں۔ ڈائریکٹر ایف آئی اے نے بتایا کہ ملزم کی بھارتی ہیکر سمیت دیگر غیر ملکی ہیکر سے رابطے ہیں۔ ملزم سارونامی انڈین ہیکرسے رابطے میں تھا جبکہ کینیڈین ، نائیجیرین، امریکن اور اٹلی کے ہیکرز بھی اس کے رابطے میں ہیں۔ انہوںنے بتایا کہ ملزم بڑی چالاکی کے ساتھ سکیمر مشینوں کے ذریعے پاکستانی بینک اکاﺅنٹس کی تفصیلات حاصل کرتا تھا جبکہ کریڈٹ کارڈز اور اے ٹی ایم کارڈز کی تفصیلات بھی مختلف آلات کے ذریعے اس نے حاصل کی تھیں اور یہ تمام بینک اکاﺅنٹس کی تفصیلات انڈیا بھجواتا تھا جہاں سے انڈین ہیکرز چین سے ان اکاﺅنٹس کےلئے کریڈٹ کارڈز اور دیگر سامان بنوا کر اسے پاکستان بھیجتے تھے اور یہ شہریوں کے اکاﺅنٹس سے رقوم نکال کر چوری کرتا تھا۔ انہوں نے بتایا کہ رشیدہ بیگم اور نور کمال نامی شہریوں کے کریڈٹ کارڈز اس کے قبضے سے برآمد ہوئے ہیں،گرفتار ملزم خواتین کو بھی سوشل میڈیا کے ذریعے بلیک میل کرنے میں ملوث ہے،یہ خواتین کی مرضی کے بغیر ان کی فحش ویڈیو بناتا تھا اور بعد میں انہیں بلیک میل کر تا تھا، ملزم کا مجاز عدالت سے گیارہ روزہ جسمانی ریمانڈ حاصل کرلیا گیا ہے۔ انہوں نے شہریوں کو ہدایت کی کہ وہ مارکیٹوں اور ہوٹلوں میں کریڈٹ کارڈ سے اپنے سامنے ادائیگی کریں کیونکہ ان ملزمان کے ساتھ بعض اوقات ہوٹلوں اور شاپنگ مال کا عملہ بھی ہیکرز کے ساتھ ملا ہوتا ہے۔

کوئٹہ (ویب ڈیسک)کالعدم تنظیموں کے 313 فراری ہتھیار ڈال کر قومی دھارے میں شامل ہو گئے،ہتھیارڈالنے والے فرایوں میں 17 کمانڈرزبھی شامل ہیں۔
میڈیا رپورٹس کے مطابق کالعدم تنظیموں کے 313 فراریوں کے قومی دھارے میں شامل ہونے کے حوالے سے تقریب ہوئی جس میں وزیراعلیٰ بلوچستان ثنا اللہ زہری، کمانڈر سدرن کمانڈ ودیگر سول اور عسکری حکام نے شرکت کی،وزیراعلیٰ بلوچستان کی قومی دھارے میں شامل ہونے پرہتھیار ڈالنے والوں کو مبارکباددی،ہتھیار ڈالنے والے فراریوں کا تعلق سوئی ڈیرہ بگٹی اور کوہلو سے ہے اور ان کا تعلق بی آراے،بی ایل ایف اوربی ایل اے سے تھا۔

وزیراعلیٰ پنجاب شہبازشریف کی ترقیاتی کاموں کی رفتار کی وجہ سے چینی اورترک حکام سے ان کی تعریف کی خبریں توآپ نے سنی ہوں گی لیکن اب کی بار جرمن سفیر بھی اپنے جذبات پر قابو نہ رکھ سکے اور شہبازشریف کوخراج تحسین پیش کرنے کے لیے میدان میں آگئے ۔ جھنگ میں 1263میگاواٹ کے پنجاب پاورپلانٹ کی افتتاحی تقریب کے موقع پر خطاب کرتے ہوئے جرمن سفارتکار نے ملک کے پاورسیکٹر کو بدحالی سے نکالنے کے لیے شہبازشریف کے وژن، عزم اور کاوشوں کو سراہتے ہوئے کہاکہ اس پر آپ کا شکریہ ۔ انہوں نے کہاکہ وہ توانائی کے شعبے کے ماہر نہیں ہیں لیکن کاوشوں پر شہبازشریف کے شکرگزار ہیں۔ جرمن سفارتکار کے اس بیان کے بعد یقینا شہبازشریف کے لیے بھی اپنے جذبات پر قابو پانا مشکل ہوگیا ہوگا جنہوں نے ملک کی ترقی میں اپوزیشن جماعتوں بالخصوص تحریک انصاف کو رکاوٹ قراردیااور ایک مرتبہ پھر اپنا عزم دہرایا۔