رائے ونڈ (نیااخبار رپورٹ)رائیونڈ میں قائد اعظم ؒ کے رشتہ دار پارسیوں کی کروڑوں روپے جائیداد کا فیصلہ ہوگیا۔سپریم کورٹ نے خبریں کی خبروں پر نوٹس لیتے ہوئے 36سال سے زیر سماعت اہم کیس کو نمٹاتے ہوئے پارسی خاندان کو اس کا حقدار قرار دیدیا ۔مذکورہ کیس طویل مدت سے سول کورٹ ،سیشن کورٹ اور ہائی کورٹ سے ہوتا ہوا سپریم کورٹ میں زیر سماعت تھا ،اور اس وقت گزشتہ کئی ماہ سے شہریوں کیلئے معمہ بنا ہوا تھا ۔اور گزشتہ ایک سال سے ایک ارب روپے کے لگ بھگ اس زمین کی ملکیت کے کئی دعویدار بنے ہوئے تھے ۔اورمختلف افراد زمین کے مختلف حصوں پر قبضہ کئے بیٹھے تھے۔پارسیوں کے منیجر جاوید ابوبکر نے سپریم کورٹ کے فیصلے کا حوالہ دیتے ہوئے بتایا کہ جب ہائی کورٹ نے مخالف فریق کا مو¿قف رد کرتے ہوئے زمین مالکان پیرن جولین ڈنشا اور نیلی بائی کے حق میں فیصلہ کردیا تو اس اراضی کے دعویداروں نے اس کیس کو متنازع بناکر گمراہ کن معلومات پھیلا دیں ،جس کے بعد انتظامی افسران نے ادھر کا رخ کرلیا ،لیکن خبریں کے توسط سے سپریم کورٹ کو صحیح صورت حال کا پتہ چلنے پر مخالفین کی تمام چالیں ناکام ہوگئیں ،اس وقت یہ جگہ زمین کی اصل مالکان نے فروخت کردی ہے ،اور موجودہ قابضین جائز بیٹھے ہیںاور اس طرح ہر قسم کا تنازع ختم ہوگیا ہے ،یادرہے کہ مذکورہ 80کنال اراضی کراچی کی ایک شپنگ کمپنی کے مالک سیٹھ ایڈل کی ملکیت تھی ۔

سرگودھا (خصوصی رپورٹ) معمولی بات پر جھگڑے کے دوران بھائی نے طیش میں آکر سگی بہن کو فائرنگ کر کے موت کے گھاٹ اتار دیا۔ بتایا جاتا ہے کہ 102 شمالی کی رہائشی 19 سالہ عاصمہ بی بی کو اس کے بھائی مہران نے اپنے کپڑے استری کرنے کو کہا جس سے انکار پر دونوں جھگڑنے لگے.

اس دوران مہران طیش میں آگیا اور پشٹل سے فائر کر کے موقع پر بہن کو ڈھیر کر دیا۔ اطلاع پر پولیس موقع پر پہنچ گئی اور پوسٹمارٹم کے بعد مقتولہ کی میت ورثا کے حوالے کر دی جبکہ ملزم کو حراست میں لے لیا۔

اسلام آباد (این این آئی) وزیر مملکت برائے اطلاعات مریم اورنگزیب نے کہا ہے کہ دہشت گردی اور انتہائی پسندی کا خاتمہ تعلیم و تربیت سے ہی ممکن ہے، بچوں میں مثبت رجحانات پروان چڑھانے کیلئے ان کیابتدائی عمر سے تعلیم و تربیت وقت کی اہم ضرورت ہے، دہشتگردی کے خاتمے، نسل نو کی ذہنیت کو تبدیل کرنے کی حکمت عملی کے تناظر میں تربیت، استعداد کار میں اضافہ کے کورسز کا انعقاد انتہائی اہم ہے، موجودہ حکومت نے انسداد دہشتگردی کے بیانیے کی تیاری کیلئے ثقافت، ورثہ اور فلمی صنعت کی بحالی کا منصوبہ شروع کیا ہے، اس اجتماعی ذمہ داری میں معاشرے کے تمام طبقات کو اس میں حصہ ڈالنا چاہئے۔ وزیر مملکت نے یہ بات جمعرات کو سٹریٹجک کمیونیکیشن اینڈ میڈیا انگیجمنٹ ٹریننگ کورس کی اختتامی تقریب سے خطاب کرتے ہوئے کہی۔ انہوں نے کہا کہ پاکستان گزشتہ 30 سال سے دہشتگردی کے خلاف جنگ لڑ رہا ہے، موجودہ حکومت نے انسداد دہشتگردی کے بیانیے کی تیاری کیلئے ثقافت، ورثہ اور فلمی صنعت کی بحالی کا منصوبہ شروع کیا ہے۔

انہوں نے کہا کہ یہ اجتماعی ذمہ داری ہے اور معاشرے کے تمام طبقات کو اس میں حصہ ڈالنا چاہیے۔ دہشتگردی اور انتہائی پسندی کا خاتمہ تعلیم و تربیت سے ہی ممکن ہے۔ انہوں نے کہا کہ وزارت اطلاعات و نشریات کے افسران کیلئے اس قسم کے تربیتی کورسز کا انعقاد ایک اچھا آغاز ہے، صحافیوں کو بھی اسی طرح کی تربیت فراہم کی جائے گی۔ انہوں نے کہا کہ وزارت اطلاعات و نشریات کا دہشتگردی اور انتہاءپسندی کے خلاف بیانیہ میں اہم کردار ہے، اگر وزارت اطلاعات و نشریات کے افسران کو انسداد دہشتگردی کی تربیت دی جائے تو اس کے معاشرے پر کثیر جہتی اثرات مرتب ہوں گے۔ انہوں نے کہا کہ انفارمیشن سروسز اکیڈمی میں پڑھانے جانے والے نصاب کو ازسر نو مرتب کیا جا رہا ہے جس میں دہشتگردی کے خلاف مضامین کو بھی شامل کیا جائے گا۔ انہوں نے کہا کہ بیرون ملک پاکستانیوں کو بعض ایسی خیراتی تنظیموں کے بارے میں آگاہ کرنے کی ضرورت ہے جو ان کے عطیات کو ملک میں دہشتگردی کی مالی معاونت کے لئے استعمال کر سکتی ہیں۔ انہوں نے کہا کہ پاکستانیوں میں عطیات سے متعلق آگہی کیلئے سوشل میڈیا کا استعمال اہم اور موثر طریقہ ہے۔ انہوں نے کہا کہ انفرادی رویوں میں مثبت تبدیلی سے بہتر معاشرتی نتائج سامنے آسکتے ہیں۔

رفاہی ادارے کسی بھی معاشرے کےلئے بہت اہم ہوتے ہیں۔ رفاعی اداروں کو یقین دلانا ہو گا کہ ان کے عطیات درست طور پر استعمال ہو رہے ہیں۔ انہوں نے کہا کہ دنیا تیزی سے بدل رہی ہے اور روزانہ نئی ٹیکنالوجی سامنے آ رہی ہے اور انفارمیشن آفیسرز کو نئی ایجادات سے اپنے آپ کو ہم آہنگ کرنا ہو گا۔ مریم اورنگزیب نے کہا کہ میڈیا میں برداشت کے کلچر اور خوداحتسابی کے فروغ کیلئے صحافیوں کیلئے بھی ایسے تربیتی کورسز ضروری ہیں۔ آخر میں انہوں نے تربیتی کورس کے شرکاءمیں سرٹیفکیٹس بھی تقسیم کئے۔ اس موقع پر ایڈیشنل سیکرٹری وزارت اطلاعات و نشریات شفقت جلیل، چیف ایگزیکٹو آفیسر پاکستان پیس کولیکٹو شبیر انور بھی موجود تھے۔ دو روزہ تربیتی کورس کے دوران انفارمیشن افسران کے استعداد کار میں اضافہ کےلئے مختلف سیشن کا انعقاد کیا گیا۔