لاہور(خصوصی رپورٹ) پنجاب حکومت نے شاہی قلعہ لاہور کی مرمت کا فیصلہ کیا ہے اس سلسلے میں شاہی قلعہ کے مرمتی کاموں کا پی سی ون تیار کرلیا گیا ہے جس کے تحت اس منصوبے پر96کروڑ 40لاکھ روپے کے اخراجات آئیں گے۔ اس رقم سے شاہی قلعہ کا عالمگیری گیٹ، موتی مسجد، اکبری دروازہ، شاہی کچن، لیڈی ماسک، دیوان قاضی اور شاہی محل کی مرمت طور تزئین وآرائش کی جائے گی۔ محکمہ آثار قدیمہ نے پی سی ون حتمی منظوری کے لئے پلاننگ اینڈ ڈویلپمنٹ کو بھیج دیا ہے۔ یہ بھی بتایا گیا ہے کہ محکمہ خزانہ پنجاب رواں مالی سال میں اس منصوبے کے لئے5کروڑ روپے جاری کرے گا جس سے شاہی قلعہ لاہور کے شاہی کچن اور اکبری دروازہ کی مرمت کرکے اسے بحال کیا جائے گا۔

واں بھچراں(خصوصی رپورٹ) ماں بیٹی ایک ساتھ ہی پانچویں کلاس کا امتحان دے رہی ہیں۔ گورنمنٹ ہائی سکول واں بھچراں میں غلام فاطمہ زوجہ محمد اکرم کھنجیرہ رول نمبر 114 اور بیٹی مقدس فاطمہ رول نمبر 142 ایک ہی سکول میں امتحان دے رہی ہیں۔ گفتگو کرتے ہوئے پکہ کھنجیرہ کی رہائشی غلام فاطمہ نے کہا کہ شادی کی وجہ سے میں اپنی تعلیم کی خواہش پوری نہیں کر سکی ، میرا ایک بیٹا اور دو بیٹیاں ہیں، میں نے محسوس کیا کہ تعلیم کی کمی کی وجہ سے خواتین کو بہت سارے مسائل پیش آتے ہیں، اپنی اس خواہش کو پورا کرنے کیلئے شادی کے بعد تعلیم حاصل کرنے کا سوچا۔ اپنی خواہش کا اظہار شوہر سے کیا تو انہوں نے بخوشی اجازت دیدی۔ پانچوین کلاس کا امتحان دیتے ہوئے مجھے شرمندگی کی بجائے خوشی ہو رہی ہے کہ میں اپنی ہی بیٹی کی کلاس فیلو بھی ہوں۔ انہوں نے کہا کہ اسلام میں بھی تعلیم کی اہمیت خصوصاً ماں کی تعلیم حاصل کرنے پر بھی اسی لئے زور دیا گیا معاشرے میں مثبت تبدیلی کیلئے ماﺅں کا پڑھا لکھا ہو ازحد ضروری ہے۔ انہوں نے کہا کہ میں اسی طرح اعلی تعلیم حاصل کرکے معاشرے میں اس مثبت تبدیلی کے رجحان کو فروغ دوں گی۔

بنوں (مانٹیرنگ ڈیسک)بنوں میں تھانہ منڈان کے باہر دھماکہ 2اہلکار زخمی ہوگئے۔ حملہ آور نے باردو سے بھری گاڑی تھانہ کے مین گیٹ کیساتھ ٹکرائی ، دھماکہ سے تھانہ کی عمارت کو نقصان پہنچا۔ پولیس کے مطابق حملہ آور ایک ہی تھا جو فائرنگ سے مارا گیا ، حملہ آور کی عمر 20سال بتائی جاتی ہے۔دھماکے بعد پولیس نے علاقے کو گھیرے میں لیکر سرچ آپریشن شروع کردیا۔ زخمی اہلکاروں کو طبی امداد کیلئے ہسپتال منتقل کردیاگیا۔

لاہور (خصوصی رپورٹ) پاکستان میں ٹیکس نیٹ بڑھانے کے لئے مختلف طریقے اپنائے گئے لیکن ٹیکس نیٹ نہ بڑھ سکا، 2013ءمیں ٹیکس گوشواروں کی جو تعداد تھی اس میں گزشتہ مالی سال میں 200 فیصد کمی واقع ہو گئی۔ اس کمی کو پورا کرنے کیلئے بنکوں کے لین دین پر 0.6 فیصد تک ٹیکس عائد کردیا گیا۔ اس میں نان فائلر کے لیے 0.6 فیصد جب کہ فائلر کے لیے 0.3 فیصد ٹیکس عائد ہے۔ 0.3 فیصد ٹیکس شوکت عزیز کے دور حکومت سے شروع ہوا تھا جس کو بڑھا کر موجودہ حکومت نے 0.6 فیصد کردیا۔ بنکوں کے لین دین پر ٹیکس بڑھانے کی وجہ سے سرمایہ داروں نے بنکوں کے لین دین پر ٹیکس دینے کی بجائے اپنا سرمایہ دبئی میں لگانا شروع کردیا۔ ایک محتاط اندازے کے مطابق 2014ءسے 2015ءتک دو سال میں 444 ارب روپے کی سرمایہ کاری ہوچکی ہے۔ یہ سلسلہ جاری ہے اور 2016 میں بھی اس سرمایہ کاری میں اضافہ ہوا۔ 2014 میں پاکستان کے 5079 افراد اور کمپنیوں کی جانب سے 7.59 ارب درہم کی سرمایہ کاری ہوئی۔ اسی طرح 2015ءمیں 6106 افراد اور کمپنیوں نے 8 ارب درہم کی سرمایہ کاری کی گئی۔ بھارت اس ضمن میں پہلے نمبر پر رہا۔2014ءمیں اس کے 7353 افراد اور کمپنیوں کی جانب سے 18.1 درہم کی سرمایہ کاری کی گئی۔ برطانیہ دوسرے نمبر پر رہا اس کے 9.32 ارب درہم کی سرمایہ کاری کی گئی۔ سب سے زیادہ سرمایہ کاری پراپرٹی کے کاروبار میں کی گئی۔

کراچی (این این آئی) آصف زرداری کے بہنوئی میرمنور تالپور کیخلاف نیب انکوائری بند کر دی گئی۔ نیب تفتیشی افسر نے میر منور تالپور کے خلاف انکوائری بند کرنے کی رپورٹ عدالت میں جمع کرا دی۔ نیب میر منور تالپور کے خلاف غیرقانونی اثاثے بنانے اور اختیارات کے ناجائز استعمال کی تحقیقات کر رہا ہے۔