لاہور( ویب ڈیسک)بھارت میں سکھوں کے پیشوا اور ہریانہ میں قائم ڈیرا سچا سودا آرگنائزیشن کے سربراہ گرمیت رام رحیم سنگھ کی جنسی زیادتی کے مقدمے میںفردجرم عائد ہونے اور گرفتاری کے خلاف ہنگاموں کاسلسلہ بدستورجاری ، ہلاکتوں کی تعداد35ہوگئی ،400کے قریب افرادزخمی، سرسا، پٹیالہ، فاضلکا، فیروز پور، مانسا، فرید کوٹ اور بھٹنڈا میں بدستور کرفیو نافذ ،مختلف علا قوں میں موبائل اور انٹر نیٹ سروس بند، ڈیرہ سچا سودا تنظیم کےخلاف کریک ڈاون شروع ،سینکڑوں گرفتار،گرمیت کے دوآشرم سیل ، گرمیت رام کو سزا(کل)پیرکو سنائی جائے گی، حالات مزیدبگڑنے کاخدشہ ، کشیدہ صورتحال کے باعث پاک بھارت دوستی بس سروس بھی بدستورمعطل ،مسافرپریشان ۔میڈیارپورٹ کے مطابق سی بی آئی عدالت کی طرف سے مذہبی رہنما اور ڈیرا سچا سودا آرگنائزیشن کے سربراہ گرومیت رام رحیم کے خلاف دوخواتین عقیدت مندوں کے ریپ کے مقدمے میں فرد جرم عائد اورانہیں گرفتارکئے جانے کے بعد شروع ہونے والوں کاہنگاموں کاسلسلہ جاری ہے ،گرمیت کے حامیوں نے گاڑیوں پر پتھراو کیا، اسٹیشن،ٹیلی فون ایکسچینج،پیٹرول پمپوں اور گاڑیوں کو آگ لگا دی ،ہنگاموں کے نتیجے میں مزیددوافرادہلاک ہوگئے جس کے بعدپرتشددواقعات میں ہلاکتوں کی تعدادبڑھ کر32ہوگئی جبکہ زخمیوں کی تعداد400کے قریب ہے ۔ سرسا، پٹیالہ، فاضلکا، فیروز پور، مانسا، فرید کوٹ اور بھٹنڈا میں بدستور کرفیو نافذ ہے ، نئی دلی کے13پولیس ڈسٹرکٹس میں بھی کرفیونافذ کردیا گیا ،10سال میں یہ پہلا موقع ہے کہ نئی دلی کے80فیصدعلاقوں میں کرفیو نافذ کیا گیا جبکہ گڑگاوں میں ہائی الرٹ کردیا گیا ۔ ادھر سیکورٹی فورسز نے ڈیرہ سچا سودا تنظیم کےخلاف کریک ڈاون شروع کردیا اور گرو گرمیت رام کے دو آشرم سیل کردیے جبکہ ہنگاموں کوروکنے کےلئے سینکڑوں افراد کوگرفتاربھی کیاگیاہے۔ گرومیت رام رحیم پر ان کی ایک عقیدت مند خاتون نے ریاست ہریانہ کے قصبے سِرسا میں واقع ہیڈکوارٹرز میں ریپ کا الزام عائد کیا تھا اور گزشتہ 10 سال سے جاری اس کیس کی 200 سماعتوں اور ہائی کورٹ کی جانب سے متعدد حکم امتناع جاری ہونے کے بعد گورمیت رام رحیم پر فرد جرم عائد کی گئی جس کے بعد ہریانہ پولیس نے گرومیت رام رحیم کو حراست میں لے لیا۔ بھارت کی ایک عدالت نے وفاقی حکومت اور ریاستی حکام کو ہریانہ کی شمالی ریاستوں اور پنجاب میں ہونے والے تشدد سے نمٹنے میں ناکامی پر تنقید کا نشانہ بنایا ہے۔ غیر ملکی میڈیا کے مطابق ہریانہ اور پنجاب کی ہائی کورٹ نے ایک بیان میں کہا ہے کہ وفاقی اور ریاستی حکومتوں کا ردعمل ‘سیاسی سرینڈر’ کے علاوہ کچھ نہیں تھا۔واضح رہے کہ انڈیا کے قصبے پنچکلا میں ایک خصوصی عدالت کی جانب سے ڈیرہ سچا سودا نامی تنظیم سے تعلق رکھنے والے گرو گرمیت رام رحیم کو جنسی زیادتی کے معاملے میں مجرم قرار دینے کے بعد کشیدگی پائی جاتی ہے۔علاقے میں مزید تشدد کو روکنے لیے کچھ علاقوں میں فوج کو بھی تعینات کر دیا گیا ہے۔ بھارت میں جمعے کو ایک عدالت نے گرو گرمیت رام رحیم کو جنسی زیادتی کے ایک معاملے میں مجرم قرار دیا تھا جس کے بعد سے پرتشدد ہنگاموں میں اب تک کم از کم 31 افراد ہلاک ہو چکے ہیں۔گرو گرمیت رام رحیم پر 15 برس پہلے دو خواتین کے ساتھ ریپ کا الزام تھا۔ ان کی سزا کا اعلان پیر کو کیا جائے گا۔وزارت داخلہ کے دفتر سے جاری ہونے والے ایک بیان میں کہا گیا ہے کہ ان واقعات میں اب تک تقریبا 31 افراد کے ہلاک ہونے کی اطلاع ہے جبکہ مقامی اخبارات نے یہ تعداد اس سے زیادہ بتائی ہے۔بیان کے مطابق سکیورٹی فورسز سمیت 250 سے زیادہ افراد زخمی ہوئے ہیں جن کا مختلف ہسپتالوں میں علاج چل رہا ہے۔بی بی سی کے رابن سنگھ کے مطابق فیصلہ آنے کے بعد گرمیت رام رحیم کے حامیوں نے گاڑیوں کے شیشے توڑ ڈالے اور سرکاری عمارتوں اور میڈیا کی گاڑیوں کو آگ لگا دی۔پنجاب اور ہریانہ دونوں ریاستوں کے وزرائے اعلی نے گرو گرمیت کے حامیوں سے امن اور امان برقرار رکھنے کی اپیل کی ہے۔کیپٹن امریندر سنگھ نے کہا ہے کہ ‘ہم کسی کو ریاست میں ماحول خراب کرنے کی اجازت نہیں دیں گے۔نامہ نگار کے مطابق سکیورٹی اہلکاروں نے مشتعل افراد پر قابو پانے کے لیے آنسو گیس اور آبی توپ استعمال کی ہے۔ادھر ڈیرہ سچا سودا کے ترجمان ڈاکٹر دلاور انشا نے ایک بیان میں کہا ہے کہ ‘ہمارے ساتھ انصاف نہیں ہوا اور ہم اپیل کریں گے۔ ہمارے ساتھ ماضی میں بھی ایسا ہی ہوتا آیا ہے۔

لاہور( ویب ڈیسک)وفاقی وزیر ریلویز خواجہ سعد رفیق نے کہا ہے کہ عمران خان غیر ذمہ دار اور بیوقوف آدمی ہے ،مہرے کے طو رپر کام کرنے والے اس شخص کی کوئی اہمیت نہیں ، آصف علی زرداری اور ان کے صاحبزادے جتنی مرضی (ن) لیگ کی مخالفت کریں اس کا ہمیں نقصان نہیں فائدہ ہی ہوگا ، نواز شریف نے اپنی اہلیہ کی تیمار داری کےلئے لندن جانا ہے لیکن ابھی اس کی حتمی تاریخ طے نہیں ہوئی ،جب ہم سازش کی بات کرتے ہیں تو ہمارا اشارہ کسی ریاستی ادارے کی طرف نہیں ہوتابلکہ بعض کرداراور ان کا رویہ ٹھیک نہیں تھا۔ ان خیالات کا اظہار انہوںنے جاتی امراءرائے ونڈ میں میڈیا سے گفتگو کرتے ہوئے کیا ۔ خواجہ سعد رفیق نے کہا کہ قیادت اور رہنماﺅں کے درمیان ہونے والی مشاورت میں سیاسی اور قانونی معاملات پر گفتگو ہوئی ہے اور یہ پراسس چلتا رہے گا ۔اسپیکر قومی اسمبلی نے وزیر اعظم نواز شریف سے الگ ملاقات کی ہے ۔ وزیر خارجہ خواجہ محمد آصف سابق وزیر اعظم نواز شریف سے رہنمائی لینے کے لئے تشریف لائے تھے۔ نواز شریف کو بین الاقوامی معاملات کا تجربہ ہے بلکہ وہ پاک امریکہ تعلقات اور خطے میں رونما ہونے والی تبدیلیوں پر گہری نظر رکھتے ہیں اور خواجہ آصف کی نواز شریف سے اس موضوع پر زیادہ گفتگو ہوئی ہے۔ انہوں نے کہا کہ حافظ نعمان نے جو کہا ہے وہ ٹھیک ہے ۔ مریم نواز شریف نے حلقہ این اے 120کی انتخابی مہم شروع کر دی ہے اور اس سلسلہ میں انہوںنے پی پی 139اورپی پی 140 کے رہنماﺅں اور کارکنوں سے ملاقاتیں شروع کر دی ہیںجبکہ آئندہ دو روز تک فیلڈ میں بھی جائیں گی۔انہوں نے کہا کہ خیبر پختوانخواہ کا نیرو صرف بانسری بجاتا رہے گا ، وہاں پر ڈینگی اور آدم خور چوہے اپنا کام کر رہے ہیں لیکن یہ وہاں کا رخ نہیں کرتا اور یہ ذمہ داری بھی پنجاب حکومت کو نبھانا پڑتی ہے۔ عمران خان غیر ذمہ دار اور بیوقوف آدمی ہے ، مہرے کے طور پر کام کرنے والے اس شخص کی کوئی اہمیت نہیں ۔ انہوں نے کہا کہ چند روز قبل لاہور کے ایک وکیل نے ایک خاتون کی وساطت سے عدالت عالیہ میں (ن) لیگ کے 16افراد کے خلاف درخواست دائر کی تھی جس کے بعد تمام میڈیا میں یہ خبر آئی کہ 16رہنماﺅں پر عدلیہ مخالف بیانات پر پابندی عائد کر دی گئی ہے اور میں نے نجی ٹی وی پر شکوے کے طور پر کہا کہ اس فیصلے سے قبل ہمیں سنا جانا چاہیے تھا ۔مجھے رات گئے ایڈیشنل اٹارنی جنرل نے بتایا کہ ایسا کوئی حکم جاری نہیں کیا گیا ۔ میں میڈیا سے استدعا کرتا ہوں کہ اس طرح کے حساس معاملے پر احتیاط سے رپورٹنگ کرنی چاہیے اس سے غلط فہمی پیدا ہو سکتی تھی۔انہوں نے ایک سوال کے جواب میں کہا کہ ہم نے بارہا کہا ہے کہ جب ہم سازش کی بات کرتے ہیں تو اس میں پاکستان کے کسی ریاستی ادارے کی طرف اشارہ نہیں ہوتا البتہ بعض کردار او ران کا رویہ ٹھیک نہیں تھا ۔ عدالتی فیصلہ اب پبلک پراپرٹی ہے اور ہم عدالت یا معزز ججز صاحبان نہیں بلکہ فیصلے پر بات کر رہے ہیں ۔ فاضل ججز صاحبان ہمارے لئے نہایت محترم اور قابل احترام ہیں ، ہمیں فیصلے سے اختلاف ہے تو ہم نے نظر ثانی کی اپیل دائر کی ہے اور فیصلے میں جہاں بھی کمزور پہلو ہیں ان پر قانون کے دائرے میں بات ہوتی ہے اور آئندہ بھی ہو گی اور اس سے روکا نہیں جا سکتا ۔ انہوں نے کہا کہ آج کل نیا کھلاڑی سیاستدان بننے کی کوشش کر رہا ہے ، اس نے عدلیہ کے بارے میں براہ راست الفاظ استعمال کئے لیکن اسے کسی نے پوچھا تک نہیں ۔ ہم نے عدالت کی توہین کرنی ہے او رنہ مقابلہ کرنا ہے ۔ پاکستان کے اوپر سیاہ بادل چھائے ہوئے ہیں اور موجودہ حالات میں پاکستان ٹکراﺅ اور محاذ آرائی کا متحمل نہیں ہو سکتا ۔ ہمیں بھی لوگ مشورے دیتے ہیں ، غصہ آتا ہے لیکن ہم نے سیکھا ہے ۔سیاسی جماعتوں اور ریاستی اداروں کو مل کر آگے بڑھنا ہے ۔ ڈونلڈ ٹرمپ بھلے مدہوش ہو لیکن وہ امریکی صدر ہے اس کے بیان کو غیر سنجیدگی سے نہیں لیا جا سکتا ۔ انہوں نے کہا کہ ہماری استدعا ہے کہ ہمارے ساتھ جو ناانصافی ہوئی انصاف کرنے والوں کو سوچنا چاہیے۔