اسلام آباد(ناصر کاظمی)سپریم کورٹ میں حدیبیہ پیپرملز کیس کی بحالی کے لیے نیب کے بعد پاکستان تحریک انصاف نے بھی آئندہ ہفتے نظرثانی اپیل دائر کرنے کا فیصلہ کرلیا ،بدھ کو پاکستان تحریک انصاف کے ترجمان فواد چوہدری ایڈووکیٹ نے خبریں کو بتایا کہ پاکستان تحریک انصاف کے چیئرمین عمران خان حدیبیہ پیپرملز کیس کی بحالی کے لیے نیب کی درخواست پر تین رکنی بنچ کے فیصلے کے خلاف آئندہ پیر یا منگل کو نظر ثانی درخواست دائر کریں گے جس میں مﺅقف اختیا رکیا جائے گا کہ پانامہ لیکس کیس میں 5 رکنی لارجر بنچ کی جانب سے حدیبیہ پیپر ملز کیس سے متعلق آبزرویشن کو تین رکنی بنچ نظر انداز نہیں کرسکتا ،جس میں کہا گیا تھا کہ حدیبیہ ملز کیس میں نیب کو اپیل دائر کرنی چاہیئے تھی ،کیونکہ پانامہ جے آئی ٹی کے تحقیقاتی رپورٹ میں حدیبیہ کیس سے متعلق مزید حقائق بھی سامنے آئے ہیں ،پی ٹی آئی کا مﺅقف ہے کہ حدیبیہ پیپر ملز پورے شریف خاندان کی کرپشن کا کیس ہے جسے نظر انداز نہیں کیا جاسکتا،اس کیس میں ملک سے اربوں روپے کی منی لانڈرنگ کی گئی،ہائی کورٹ نے تکنیکی بنیاد پر فیصلہ دیا ،ہمارا خیال ہے کہ عدالت عظمیٰ کا لارجر بنچ تین رکنی بنچ کے فیصلے پر نظر ثانی کرتے ہوئے کیس کی بحالی کا حکم جاری کردے گا۔

لاہور (اے این این، مانیٹرنگ ڈیسک) قومی احتساب بیورو کے چیئرمین جسٹس جاوید اقبال نے کہا ہے کہ بدعنوانی کے خاتمہ کےلئے مقدمات دیکھیں گے صو بہ نہیں ملک میں بدعنوانی ایک کینسر کی طرح سرایت کررہی ہے۔ ملک ایک ہے مگر لٹیرے بہت ہیں جنہوں نے جی بھر کے ملک کو لوٹا۔ ملک اس وقت 84 ارب ڈالرز کا مقروض ہے۔ 84 ارب ڈالرز کہاں اور کیسے خرچ ہوئے کہیں نظر نہیں آتے مگر جواب ملتا ہے کہ ہمارے خلاف سازشیں ہو رہی ہیں۔ نیب کا کسی سیاسی جماعت سے تعلق نہیں اور نہ ہی نیب کیس سے امتیازی سلوک پر یقین رکھتا ہے۔ قومی احتساب بیورو کے چیئرمین جسٹس ریٹائرڈ جاوید اقبال نے پنجاب کے بعض اداروں کی جانب سے عدم تعاون پر تنبیہہ کرتے ہوئے کہا ہے کہ یہ روش مناسب نہیں، اسے آئندہ برداشت نہیں کیا جائے گا، اب تک مسکرا کر برداشت کیا، لیکن آئندہ عدم تعاون ہرگز برداشت نہیں کیا جائے گا۔ آئندہ شکایت ہوئی تو حکومت پنجاب کے تمام افسران کے لیے بڑی مشکل ہوجائے گی۔ شاہ سے زیادہ شاہ کے وفاداروں کا مکمل احتساب ہوگا جب کہ جمہوریت کے خلاف نیب کوئی سازش نہیں کر رہا۔گزشتہ روز نیب آفس لاہور میں ایک تقریب سے خطاب کرتے ہوئے چیئرمین نیب نے کہا کہ جمہوریت کے خلاف کوئی سازش نہیں ہو رہی، یہ ضروری ہے کہ شاہ سے زیادہ شاہ کے وفادار ہونے کے بجائے ملک و قوم کا وفادار اور خدمت گزار بنا جائے۔ جسٹس(ر)جاوید اقبال کا مزید کہنا تھا کہ نیب کے گواہوں کو ہرحال میں مکمل تحفظ فراہم کیا جائے گا اور دباﺅ ڈالنے کی کوئی کوشش برداشت نہیں کی جائے گی۔انہوں نے کہا کہ اگر یہ محسوس کیا گیا کہ بااثر ملزمان گواہوں پر دباﺅ ڈالنے کی کوشش کررہے ہیں تو ان کی ضمانت مسترد کرنے سمیت تمام اقدامات کیے جائیں گے۔ انہوں نے کہا کہ بیورو کریسی خاص کر پنجاب کے بعض اداروں سے عدم تعاون کی شکایت ہے، اب تک مسکرا کر برداشت کیا لیکن آئندہ عدم تعاون ہرگز برداشت نہیں کیا جائے گا۔ انہوں نے کہا کہ’عدم تعاون کی روش مناسب نہیں، اسے ختم کریں، آئندہ شکایت ہوئی تو حکومت پنجاب کے تمام افسران کے لیے بڑی مشکل ہوجائے گی۔ چیئرمین نیب جسٹس (ر) جاوید اقبال کا کہنا تھا کہ نجی ہاو¿سنگ سوسائٹی کسی کی بھی ہو کوئی رعایت نہیں کی جائے گی، ہاو¿سنگ اسکینڈل میں ریگیولیٹرز کا کردار انتہائی ضروری ہے، جب اخبار میں اشتہار دیا جاتا ہے اس پر ریگیولیٹر کیوں خاموش رہتے ہیں۔ ان کا کہنا تھا کہ بیوروکریسی کسی شخص کے اشاروں پر نہیں ناچ سکتی جبکہ شاہ سے زیادہ شاہ کے وفاداروں، غلط احکامات دینے والے اور ان پر کام کرنے والوں کا مکمل احتساب ہوگا۔ چیئرمین نیب کا کہنا تھا کہ نیب کسی کے ساتھ امتیازی سلوک نہیں کرتا، میری توجہ پورے ملک پر مرکوز ہے، میں صرف کیس کو دیکھوں گا، کسی صوبے کو نہیں، نیب کو سیاسی رنگوں میں نہ رنگیں، نیب کی اپنی کوئی عدالت نہیں، نیب صرف عوامی ادارہ ہے جبکہ جمہوریت کے خلاف نیب کوئی سازش نہیں کر رہا۔ جسٹس (ر) جاوید اقبال کا یہ بیان ایک ایسے وقت میں سامنے آیا ہے جب گذشتہ ماہ وزیراعلیٰ پنجاب شہباز شریف نے آشیانہ ہاﺅسنگ اسکیم میں مبینہ کرپشن کے معاملے پر نیب کی جانب سے بلائے جانے کو ‘بدنیتی’ قرار دیا تھا۔ وزیراعلیٰ پنجاب کا کہنا تھا کہ ‘جن لوگوں نے اربوں روپے کے قرض معاف کروائے، وہ سب ٹھیک ہے لیکن ہم نے آشیانہ، میٹرو اور دیگر منصوبوں میں قوم کے اربوں روپے بچائے اس کے باوجود ہمیں بلایا جا رہا ہے’۔شہباز شریف نے کہا تھا کہ ‘چیئرمین نیب جسٹس ریٹائرڈ جاوید اقبال سے کہوں گا کہ اپنے عملے سے کہیں تحریک انصاف اور پیپلز پارٹی کے کاسہ لیس نہ بنیں، مجھے کڑا احتساب منظور ہے لیکن احتساب کے نام پر سیاست اور انتقام منظور نہیں ہے۔

شکرگڑھ (نمائندہ خبریں) اوباش نوجوان کی چھ سالہ بچی سے زیادتی،لوگوں کو پہنچنے پر ملزم موقع سے فرار،پولیس نے چھاپہ مار کر ملزم کو گرفتار کر لیا، مقدمہ درج،تھانہ شاہ غریب کے گاﺅں سود گجراں کے رہائشی محمد رشیدکی چھ سالہ بیٹی گلی میں کھیل رہی تھی کہ ملزم نواز اسے ورغلاکر قریبی حویلی میں لے گیا اور زیادتی کا نشانہ بنانے لگا،ورثا بچی کی تلاش کرتے ہوئے اسکی کی آواز سن کر موقع پر پہنچے تو ملزم بچی کو چھوڑ کرفرار ہو گیا، پولیس نے بچی کے والد محمد رشید کی درخواست پر مقدمہ درج کرتے ہوئے چھاپہ مار کر ملزم نواز کو گرفتار کر لیا ہے۔

لاہور (پ ر) وزےراعلیٰ پنجاب محمد شہبازشرےف سے ملاقات کے دوران ایشین ڈویلپمنٹ بینک کی کنٹری ڈائریکٹر برائے پاکستان ژی ہونگ یانگ نے پنجاب کے ترقیاتی منصوبوں اور وزیراعلی کی عوامی خدمات کو خراج تحسین پیش کیا۔ ژی ہونگ یانگ نے کہا کہ پنجاب سپیڈ کی شہرت پاکستان سے نکل کر دنیا بھر میں پھیل چکی ہے۔ محمد شہبازشریف کا ترقیاتی ویژن دوسروں کےلئے مثال بن چکاہے۔ ژی ہونگ یانگ نے کہاکہ پنجاب سیف سٹی پراجیکٹ کی تکمیل سے لا ہور اب سیاحت اور سرمایہ کاری کے لئے محفوظ شہر سمجھا جاتا ہے۔ وزیراعلی محمد شہبازشریف نے اس موقع پر گفتگو کرتے ہوئے کہا کہ لاہور میں میٹروبس سروس، اورنج لائن میٹروٹرین جیسے ماس ٹرانزٹ منصوبے، تعلیم، صحت اور دیگر شعبوں میں پایہ تکمیل کو پہنچنے والے پراجیکٹ پاکستان بھر کے دیگر شہریوں کے لئے باعث کشش ہےں لیکن ہم صوبہ بھر کی یکساں ترقی کے ویژن پر یقین رکھتے ہیں اور پنجاب کے ہر شہر کو لاہور کے ہم پلہ لانے کے لئے کوشاں ہیں۔ کنٹری ڈائریکٹر ژی ہونگ یانگ نے اورنج لائن میٹروٹرین کے منصوبے میں گہری دلچسپی کا اظہار کیا۔ انہوں نے اسے بہترین ماس ٹرانزٹ پراجیکٹ قرار دیا۔ پنجاب ماس ٹرانزٹ اتھارٹی کے منیجنگ ڈائریکٹر سبطین فضل حلیم نے اس موقع پر اورنج لائن میٹروٹرین کے بارے میں ترقیاتی پیشرفت سے آ گاہ کیا۔ ژی ہونگ یانگ نے اورنج لائن میٹروٹرین کو قابل قد ر اور عمدہ منصوبہ قرار دیا۔

لاہور (خصوصی رپورٹ) عسکری تجزیہ نگاروں کا کہنا ہے کہ پاکستان نے افغانستان کو جومطلوب افراد دئیے ہیں، ضروری نہیں ہے کہ ان کا تعلق حقانی گروپ سے ہو، مختلف جرائم میں ملوث افراد ہوسکتے ہیں۔ دفتر خارجہ کے ترجمان کو اس کی وضاحت کرنا ہوگی کہ انہوں نے ایسی بات کیوںکہی، جو پاکستان کے اس دیرینہ موقف کے خلاف ہے کہ پاکستان سے حقانی نیٹ ورک کا صفایا کیا جا چکا ہے اور ملک میں اس گروپ کا کوئی شخص موجود نہیں aہے۔ انہوں نے حقانی گروپ یا طالبان کا روپ دھار رکھا تھا۔ دفتر خارجہ کے ترجمان کا یہ بیان تقریباً دو ماہ بعد آیا ہے،جس پر افغان سفیر نے بھی حیرت کا اظہار کیا ہے۔ واضح رہے کہ گزشتہ روز دفتر خارجہ کے ترجمان ڈاکٹر فیصل نے میڈیا سے گفتگو میں کہا تھا کہ گزشتہ سال نومبر میں 27شدت پسندوں کو افغانستان کے حوالے کیاگیا۔ ان کا مزید کہنا تھا کہ پاکستان افغانستان اور حقانی نیٹ ورک پر دباﺅ رکھے ہوئے ہے، تاکہ پاکستانی سرزمین کو افغانستان میں کسی دہشت گردی کیلئے استعمال کو روکا جاسکے۔ لیکن انہوں نے یہ وضاحت نہیں کی کہ جن شدت پسندوں کو افغان حکومت کے حوالے کیاگیا تھا، ان کا تعلق واقعی حقانی گروپ سے تھا یا نہیں۔ کیونکہ پاکستان کایہ موقف ہے کہ پاکستان کے قبائلی علاقوں سے حقانی گروپ افغانستان منتقل ہوچکا ہے۔ جن لوگوں کو افغان حکومت کے حوالے کیاگیا ہے وہ یقینا حقانی گروپ کے لوگ نہیں تھے۔ وہ مشتبہ افغان باشندے تھے، جو دہشت گردی میں ملوث ہوسکتے تھے۔ ان کے پاس دستاویزات بھی نہیں تھیں۔ دراصل افغان حکومت اور بھارت ، افغان مہاجرین کی آڑ میں اپنے دہشت گرد پاکستان میں داخل کررہے ہیں۔ اسی لیے پاکستان کا مطالبہ ہے کہ افغان مہاجرین کو واپس بلایا جائے۔ لیکن امریکہ ہو یا بھارت ، دونوں کیلئے پاکستان میں دہشت گردی کرانے کیلئے افغان مہاجرین کی آڑ میں دہشت گرد بھیجنا نہایت آسان ہے۔ اس معاملے پر حیرت ہے کہ دفتر خارجہ کے ترجمان نے ایسا بیان کیوں دیا جس سے یہ معلوم ہوتا ہے کہ پاکستان امریکہ کے دباﺅ میں ہے۔

اسلام آباد (خصوصی رپورٹ)پاکستان میں چلائلڈ پورنوگرافی کرنےوالے گروہ سرگرم ہیں،ڈائریکٹر سائبر کرائمز وفاقی تحقیقات ادارے (ایف آئی اے) کیپٹن (ر) محمد شعیب نے کہا ہے کہ پاکستان میں چائلڈ پورنوگرافی کے چار کیسز رجسٹرڈ ہیں جن میں ملوث ملزمان کو گرفتار کرلیاگیاہے۔ نجی ٹی وی سے گفتگو کرتے ہوئے انہوں نے کہا کہ ملک میں اس حوالے سے ملوث گروہ موجود ہیں جبکہ ملزمان کے خلاف شکایات بیرون ملک سے آئیں۔ انہوں نے بتایا کہ چار کیسز کے علاوہ چار دیگر انکوائریاں بھی جاری ہیں۔ کیپٹن (ر) محمد شعیب نے کہا کہ پاکستان میں چائلڈ پورنوگرافی کے بین الاقوامی گروہوں کے ممبر ہیں جو پڑھے لکھے اور انگریزی زبان میں گفتگو کرنا جانتے ہیں۔ ان کا مزید کہنا تھا کہ پاکسان میں ایسے گروہوں میں مڈل اور اپر مڈل کلاس کے لوگ شامل ہیں، ان کا مزید کہنا تھا کہ ایسے گروہوں سے منسلک افراد کے بینک اکاﺅنٹس کی تحقیقات جاری ہے۔ یادرہے کہ دو روز قبل ایف آئی اے نے بچوں سے زیادتی اور بچوں کی فحش ویڈیوز کی تحقیقات کا دائرہ وسیع کرتے ہوئے دو رکنی تفتیشی ٹیم بناکر ملک بھر کے دفاتر کو خط لکھاتھا۔ اس سے قبل بچوں کی ممنوعہ فلمیں انٹرنیٹ پر دوسرے ممالک اپ لوڈ کرنے والے الیکٹریکل انجینئر کو ایف آئی اے نے جھنگ سے گرفتار کیاتھا

لاہور(خصوصی رپورٹ)صوبائی دارالحکومت لاہور میں پانچ ارب روپے کی لاگت سے ڈویلپمنٹ پیکیج کے تحت واٹر سپلائی اور سیوریج لائنوں کی تبدیلی کا کام بڑی تیزی سے جاری ہے، اب تک 85 فیصد کام مکمل کر لیا گیا ہے جبکہ 15 مارچ تک تمام کام مکمل کر لیا جائے گا۔ واٹر اینڈ سینی ٹیشن (واسا)کے ترجمان نے بتایا کہ لاہور ڈویلپمنٹ پیکیج کے تحت جاری کاموں کے معیار اور رفتار کا جائزہ لینے کیلئے تمام افسران نگرانی رکھے ہوئے ہیں۔ لاہور میں بوسیدہ لائنوں ، سیوریج اور واٹر سپلائی کی بوسیدہ لائنوں کو تیزی سے تبدیل کیا جا رہا ہے۔ انہوں نے کہا کہ مذکورہ منصوبے کی شفافیت ، معیار اور رفتار کی بنیاد پر نگرانی کی جا رہی ہے ،اس سلسلے میں تمام ڈائریکٹرز کو ہدایت کی گئی ہے کہ کام کوبروقت مکمل کرنے کیلئے اپنی پیشہ ورانہ صلاحیتوں کو بروئے کار لائیں۔ انہوں نے کہا کہ لاہور ڈویلپمنٹ پیکیج کے تحت ہونیوالے کام کے مکمل ہونے سے عوام کو پینے کا صاف پانی میسر آئے گا اور نکاسی آب کے مسائل بھی کافی حد تک حل ہو جائیں گے۔ انہوں نے کہا کہ شہر میں ٹریفک کی بھر مار کے ساتھ دوسرے محکموں کے انفراسٹرکچر گلیوں اور سڑکوں پر بلند عمارتوں کی وجہ سے کام کرنے میں دشواری ہے مگر ان تمام تر مشکلات کے باوجود بقیہ کام 15 مارچ تک مکمل کر لیا جائے گا۔