لاہور (خصوصی رپورٹ) وزیر اعلیٰ پنجاب شہباز شریف کا تھانہ کلچر تبدیل کر نیکا دعویٰ بدلا نہ ہی پولیس کا رویہ بدل سکا روایتی طریقہ تفتیش کو بدلنے کیلئے تیار نہیں،سی آئی اے ونگ ٹارچر سیل بن گیا، سی آئی اے نو انکوٹ میں چوری کے الزام میں گرفتار ملزم کی الٹا لٹکا کر چھترول اور ڈنڈوں سے تشدت، حالت نازک، تشدد کی تصویر مل گئی خبر چلنے پر دو تفتیشی افسروں کو معطل کر کے تحقیقات کا آغاز کر دیا اور رپورٹ طلب کر لی۔ تفصیلات کے مطابق سی آئی اے صدر ڈویژن کے تفتیشی افسر میاں ظفر اقبال اور سب انسپکٹر سکندر حیات نے ساتھی اہلکاروں کیساتھ ملکر چوری کے الزام میں گرفتار ملزم 45 سال کے اشفاق کو رسیوں سے باندھ کر الٹا لٹکا کر چھترول اور ڈنڈوں سے تشدد کیا جس سے ملزم کی حالت غیر ہو گئی۔ خبر چلنے پر ڈی آئی جی انویسٹی گیشن سلطان احمد نے نوٹس لیتے ہوئے ملوث سب انسپکٹر سکندر حیات اور اے ایس آئی ظفر اقبال کو معطل کر کے ایس پی سی آر او کو انکوائری کا حکم دے دیا۔ پنجاب پولیس کو ملنے والا اربوں کا بجٹ کسی کام کا نہ آیا، شہریوں کا کہنا ہے کہ دنیا چاند پر پہنچ گئی لیکن پولیس کی تفتیش کا روایتی طریقہ نہ بدل سکا ہے، سابق پولیس افسران کا کہنا ہے کہ نئے آ نیوالے اعلیٰ افسران نے پولیس اہلکاروں کی وردی بدل دی، انوسٹی گیشن کے لئے اربوں روپے مختص کر دیئے، مگر تھانہ کلچر میں تبدیلی ممکن نہ ہو سکی۔

پشاور (وقائع نگار) پاکستان مسلم لیگ (ن) کے صدر سابق وزیراعظم نواز شریف نے کہا ہے کہ ہم گھبرانے والے نہیں اور عدل قائم کرنے کے لیے کشتیاں جلاکر میدان میں نکلے ہیں، میری نااہلی کے عدالتی فیصلے سے ملک کی ترقی کی رفتار کم ہوگئی، لاڈلے دیکھ لو پشاور والوں نے نئی تاریخ رقم کردی، نواز شریف کے خلاف فیصلہ نامنظور کردیا، عمران خان تم نے کیا کیا، تمہارے ساڑھے تین سو ڈیم بنانے کے دعوے کہاں گئے؟، پی ٹی آئی کی حکومت نے ایک میگاواٹ بجلی نہیں بنائی، ہیلی کاپٹر میں بھی صادق اور امین نے چوری کی، درختوں کے نام پر اربوں روپے خزانے سے نکالے گئے۔ اتوار کو پشاور میں جلسہ سے خطاب کرتے ہوئے سابق وزیراعظم نوازشریف نے کہا کہ پشاور والوں نے بتا دیا کہ نوازشریف کے خلاف فیصلہ نامنظور، آج لاڈلے دیکھ لو پاکستان میں نہیں بلکہ پوری دنیا میں پشاور پشاور ہورہا ہے، نوازشریف دن رات ترقی کےلئے کام کررہا ہے، نوازشریف نے لوڈشیڈنگ کا خاتمہ کیا۔ انہوں نے کہا کہ عمران خان تم نے پشاور اور کے پی کے کےلئے کیا کام کیا، کہاں گئے 350 ڈیم کے وعدے، کیا ایک میگاواٹ بجلی بھی بنائی گئی، پشاور میٹرو بس چار سال میں کیوں مکمل نہیں ہوئی، تم کیو پشاور کے لوگوں کو بےوقوف بنا رہے ہو، نوازشریف جو وعدہ کرتا ہے پورا کرتا ہے ، اللہ تعالیٰ کے فضل وکرم سے مسلم لیگ دوبارہ آرہی ہے ، نوازشریف نے کہا کہ ہم نے لوڈشیڈنگ کے خاتمہ کا وعدہ کیا تھا اور ہم نے اپنا وعدہ پورا کیا ، سوات میں شہادت کا رتبہ پانے والے فوجی جوانوں کو سلام پیش کرتے ہیں ، یہ قوم کے ہیرو ہیں ، اللہ تعالیٰ ان کو جوار رحمت میں جگہ دیں ۔انہوں نے کہا کہ نوازشریف کے خلاف فیصلے سے ترقی کی رفتار سست پڑچکی ہے ، نوجوان ڈگریاں ہاتھ میں لئے پھر رہے ہیں ، ہم کشتیاں جلا کر نکلے ہیں ، کیا آپ ہمارا ساتھ دیں ، امیر مقام نے دن رات کام کر کے کے پی کے کو بدل دیا ہے ، میں نے ایسا جوش وخروش پشاور میں کبھی نہیں دیکھا ، پاکستان کی تقدیر بدلنے والی ہے ، ہر غریب ، مسکین اور مظلوم کو انصاف ملے گا ، انصاف کو عوام کی دہلیز تک پہچانے کےلئے کیا آپ ہمارا ساتھ دو گے ۔انہوں نے کہا کہ غریب کو چھت فراہم کرنے میں کیا میرا ساتھ دوگے، کیا آپ سڑکوں ، گلیوں ، محلوں میں میرا ساتھ دوگے ، ہم پاکستانی عوام کو گھر اور انصاف دیں گے ، 70سال میں ہونے والے ظلم کا خاتمہ ہوگا ، آپ کے بچوں کے سرپرچھت ہوگی ، آج آپ کا حکمران جھوٹ ، الزام تراشی اور بہتان تراشی کا ماہر ہے اور صادق اور امین بن گئے ہیں۔صدر مسلم لیگ (ن) نے کہا کہ میں ان لوگوں سلام پیش کرتا ہوں جنہوں نے اس کو صادق اور امین قراردیا ، آج عمران خان ہیلی کاپٹر بھی چوری کرگیا ہے ، کہاں ہیں وہ 2ارب درخت جن پر اربوں روپے لگے ، ان پیسوں کا پتہ لگانا چاہیے ، ترقیاتی کام نوازشریف کروا رہا ہے ،آج ہیلتھ کارڈ پورے پاکستان میں جاری ہورہے ہیں ، سوائے کے پی کے کے ، ہم آپ کو ہیلتھ کارڈ دیں گے ، لوگوں کی بچوں کے علاج کے لئے جائیدادیں بک جاتی ہیں ، ہم عوام کو مفت علاج فراہم کریں گے ، آج صوبائی حکومت کو عوام کا خیال نہیں ، کہاں گیا نیا پاکستان ۔انہوں نے کہا کہ اگر یہاں فرانزک لیبارٹری ہوتی تو عاصمہ قتل کیس حل ہوجاتا، وعدہ کرو کہ آپ نوازشریف کا ساتھ دوگے، آپ منتؓ کرتے ہیں اور آپ ووٹ کو پیروں تلے رونداجاتا ہے ، نوازشریف کا کیا قصور تھا ، اس کو کیوں نکالا گیا ، نوازشریف کو اپنے بیٹے سے تنخواہ نہ لینے پر نکالا گیا ، سابق وزیراعظم نے کہا کہ کہا ں گیا آپ کے ووٹ کا تقدس اور احترام ،5لوگوں نے عوام کے خلاف فیصلہ دے دیا ، کیا آئین کو تبدیل کرنا ہے کہ نہیں ، یہ کھیل ملک میں 70سال سے جاری ہے ، میرے ساتھیوں کو بھی توہین عدالت کیس میں طلب کر لیا گیا ہے ، مجھے کرپشن کے بغیر نکالا گیا ، اب مجھے تاحیات نااہل کرنے کا سوچا جارہا ہے ، آپ نے 2018کے الیکشن میں بھرپور ووٹ دینا ہے تا کہ پارلیمنٹ میں آپ کی طاقت سے یہ فیصلہ ختم ہو جائے ۔ نوازشریف نے کہا کہ آپ کی جنگ لڑ رہا ہوں ، کیا آپ میرے قدم سے قدم ملا کر چلو گے ، ہم فاٹا والوں کو قومی دھارے میں لائیں گے ۔ خطاب کے آخر میں نوازشریف نے پاکستان زندہ بادکا نعرہ بھی لگایا ۔

نئی دہلی (خصوصی رپورٹ) بھارت کے خلاف جنگ چھیڑنے کے الزام میں متحدہ جہاد کونسل سربراہ سید صلاح الدین اور جماعت الدعوة کے سربراہ حافظ سعید اور حریت کانفرنس کے 7 رہنماﺅں کے خلاف بھارتی عدالت میں چارج شیٹ کی کارروائی مکمل ہو گئی ہے۔8مارچ کو مقدمے کی سماعت ہو گی جبکہ عدالت نے حکم دیا ہے چارج شیٹ میں شامل افراد کو چارج شیٹ کی کاپیاں فراہم کی جائیں۔ بھارتی تحقیقاتی ایجنسی این آئی اے نے جج ترن شراوت کی عدالت میں چند دن قبل چارج شیٹ داخل کی تھی۔ عدالت نے چارج شیٹ قبول کرتے ہوئے سماعت کی تاریخ مقرر کر دی ہے۔
چارج شیٹ

کراچی (خصوصی رپورٹ) پی ایس او کی پالیسی کے خلاف آئل ٹینکرز ایسوسی ایشن ڈٹ گئی۔ ملک بھر میں تیل کی سپلائی معطل ہو گئی۔ مظاہرین کی ریڈ زون کی طرف پیش قدمی کی کوشش کو پولیس نے لاٹھی چارج کرکے ناکام بنا دیا۔ شیریں جناح کالونی میں دھرنا مطالبات کی منظوری تک جاری رکھنے کا اعلان کر دیا۔تفصیلات کے مطابق کراچی میں پی ایس او پالیسیوں کے خلاف احتجاج پر بیٹھے آئل ٹینکرز ایسوسی ایشن کے اراکین نے ریڈ زون کی طرف پیش قدمی کی کوشش کی تو پولیس نے آڑھے ہاتھوں لیا، لاٹھی چارج کیا اور 7 مظاہرین کو حراست میں لے کر منتشر ہونے پر مجبور کردیا۔احتجاج کے باعث ملک بھر میں تیل کی ترسیل بند کردی گئی ہے اور آئل ٹینکر ایسوسی ایشن کے مظاہرین شیریں جناح کالونی میں قائم مرکزی کیمپ پر دھرنا دیئے بیٹھے ہیں، مظاہرین نے کہاکہ مطالبات کی منظوری تک احتجاج جاری رہے گا۔آئل ٹینکرزایسوسی ایشن کے نمائندوں نے کہا کہ ہمارے ساتھ جاری نارواسلوک بند کیاجائے،کیو سسٹم اور این ایل سی کے حوالے سے لگائے جانے والے الزامات پر پی ایس او کی پرسرار خاموشی بہت سے سوالوں کو جنم دے رہی ہے۔
تیل سپلائی بند