اسلام آباد (آئی این پی) نگران کابینہ کی تشکیل کے لیے نگراں وزیراعظم جسٹس (ر) ناصر الملک نے مختلف شخصیات سے رابطے شروع کر دیئے۔ تفصیلات کے مطابق نگراں کابینہ کی تشکیل کے لیے سرگرمیوں کا آغاز ہوگیا ہے، نگراں وزیر اعظم نے مختلف شخصیات سے رابطہ کیا ہے، اس ضمن میں سابق بیوروکریٹس، سابق فوجی افسر، سابق جج، بزنس مین کے ناموں پرغور جارہا ہے،ذرائع کے مطابق نگراں وزیر اعظم کی جانب سے کابینہ میں سیاسی وابستگیاں رکھنے والے افراد کو شامل نہ کرنے کا فیصلہ کیا گیا ہے۔اس ضمن میں سابق بیوروکریٹس، سابق فوجی افسر، سابق جج، بزنس مین کے ناموں پرغور جارہا ہے ۔ذرائع نے دعوی کیا ہے کہ نگراں کابینہ کا حجم مختصر رکھا جائے گا۔اس ضمن میں نگراں وزیراعظم نے سابق رجسٹرار سپریم کورٹ طاہر شمشاد سے بھی مشاورت کی ہے، نگراں کابینہ آئندہ ہفتے تک حلف اٹھائے گی۔توقع ظاہر کی جارہی ہے کہ نگراں کابینہ میں اچھی شہرت رکھنے والے بیوروکریٹس کو شامل کیا جائے گا۔یاد رہے کہ آج نگراں وزیراعظم جسٹس(ر) ناصر الملک کی جانب لاہور ہائیکورٹ کے فیصلے کے خلاف فوری اپیل دائر کرنے کی ہدایت کی گئی ہے، جس کا مقصد انتخابات کے التوا کر روکنا ہے۔
