کراچی (خصوصی رپورٹ) پاکستان اور سعودی عرب سمیت دنیا کے بیشتر حصوں میں رمضان المبارک بیک وقت شروع ہونے کے باعث دنیا کے مختلف خطوں میں عیدالفطر رویت ہلال کے سبب علیحدہ علیحدہ ہو جائے گی۔ جامعہ کراچی کے شعبہ اسپیس اینڈ پلانیٹری فزکس کے سابق سربراہ اور معروف سائنسدان پروفیسر ڈاکٹر شاہد قریشی کے مطابق سعودی عرب میں رویت ہلال کا اعلان وہاں کے کیلنڈر ”ام القرائ“ کے مطابق 14جون کو ہی ہو گا تاہم ہلال عیدالفطر 14جون کو پاکستان کے کسی بھی حصے میں نظر آنے کے قطعی امکانات نہیں ہیں۔ پروفیسر ڈاکٹر شاہد قریشی کے مطابق 14جون کو ہلال عید وسطی اور مشرقی افریقہ جبکہ یو ایس اے (وسطی اور جنوبی امریکہ) میں باآسانی دیکھا جا سکے گا۔ یاد رہے پاکستان اور سعودی عرب سمیت دنیا کے بیشتر حصوں میں رمضان المبارک کے چاند کی رویت ایک ساتھ ہوئی تھی اورر مضان کا آغاز 17مئی سے ہوا تھا۔
