لاہور (مانیٹرنگ ڈیسک) سرکاری زمین ہو یا غیر سرکاری قبضہ مافیا بااثر افراد کے ساتھ ملکر کارروائیاں کرتا رہتا ہے۔ قبضہ مافیا کیلئے پٹواری کے ساتھ ملکر زمینوں پر قبضہ کرنا بہت معمولی بات ہے۔ چینل۵کے پروگرام ”ہاٹ لنچ“ میں اس حوالے سے ایک رپورٹ تیار کی گئی؟ قبضہ مافیا سیاستدانوں‘ پٹوار خانہ اور علاقہ ایس ایچ او کے ساتھ ملکر وارداتیں کرتا ہے۔ یہاں تک کہ سکول کی زمین پر بھی علاقے کے چودھری قبضہ کرلیتے ہیں اور اپنے مویشی باندھ لیتے ہیں۔
نمائندہ کراچی صباخان نے بتایا کہ شہر قائد میں بھی قبضہ مافیا سرگرم ہے اور ایک پلاٹ کی دس دس فائلیں بنا دی جاتی ہیں۔ غیرقانونی تجاوزات بھی عام ہیں لیکن حکومت ایکشن نہیں لیتی۔
نمائندہ فیصل آباد نعیم بیگ نے بتایا کہ ریلوے کی اراضی پر بارہا قبضہ ہوچکا ہے۔ ضلعی انتظامیہ بے بس نظر آتی ہے۔ قبضہ مافیا نے ناجائز کار سٹینڈ بنائے ہیں۔
نمائندہ کوئٹہ غلام جیلانی نے بتایا سرکاری سطح پر بنائے گئے واش رومز پر قبضہ مافیا نے قبضہ جما لیا ہے۔ مکانات اور شاپنگ پلازے تعمیر کرلئے گئے ہیں۔ شہری بے حد پریشان ہیں۔
نمائندہ سکھر ندیم سرکی نے بتایا کہ محکمہ آبپاشی‘ ریلوے اور ہسپتالوں کی زمین پر قبضہ کرلیا گیا ہے جس کا دل چاہتا ہے قبضہ کرلیتا ہے کوئی والی وارث نہیں۔
نمائندہ حیدرآباد حشام شیخ نے بتایا لینڈ مافیا بلڈرز کی ملی بھگت سے اراضی پر قبضہ کرتے ہیں۔ لطیف آباد ایئرپورٹ تک غیرقانونی طور پر قبضہ گروپ سرگرم ہے۔ ریونیو کا عملہ بھی قبضے میں ملوث ہے۔ محکمہ اوقاف کی اراضی پر غیرقانونی پلازے تعمیر ہورہے ہیں۔
