لاہور(آئی این پی، این این آئی )سابق صوبائی وزیرعبدالغفور میو نے کہا ہے کہ تین مرتبہ کا وزیراعظم اداروں کو کمزور کرے تو یہ برداشت نہیں ہے،انہوں نے ہر ادارے کو تباہ کردیا ہے ،چوہدری نثار کو کھلا میدان نہیں ملے گا ، (ن) لیگ نے چوہدری نثار کے مقابلے پر ٹکٹ جاری کردیے ہیں ۔ اتوار کو پریس کانفرنس کرتے ہوئے عبدالغفور میو نے کہا کہ (ن) لیگ نے 28سال کی رفاقت میں آج اہم موڑ آگیا ہے ، حکومت نے عجیب عجیب باتیں کیں ، آج پاکستان نہایت نازک موڑ سے گزر رہا ہے ، پہلی ترجیح اسلام اور پا کستان ہے ، میرے دوست میرے ساتھ کھڑے ہین ، میں نے ہر مشکل وقت میں پارٹی کا ساتھ دیا، یہ کون سے جمہوریت ہے جس میں اداروں کو تباہ کرنے کی بات کی جائے ، کب تک برداشت کرتا،انہوں نے ہر ادارے کو تباہ کیا ہے ، میں کنٹرولڈ ڈیموکریسی کے خلاف ہوں ، تین مرتبہ کا وزیراعظم اداروں کو کمزور کرے یہ برداشت نہیں ہے ۔ انہوں نے کہا کہ میو برادری میرے ساتھ کھڑی ہے ، چوہدری نثار کو کھلا میدان نہیں ملے گا، (ن) لیگ نے چوہدری نثار کے مقابلے میں ٹکٹ جاری کر دیے ہیں ، میں نے دبے الفاظ میں شہبازشریف سے کہا تھا کہ جمہوریت کو فروغ دیں ۔ نجی ٹی وی سے گفتگو کرتے ہوئے چوہدری عبد الغفور نے کہا کہ مشرف کے ساتھیوں کو پارٹی میں لا کر نوازا گیا ، اب کوئی نظریہ نہیں رہا بلکہ پارٹیاں نظریہ ضرورت کے تحت چل رہی ہیں ۔ انہوں نے کہا کہ میرے خون کے اندر وفاہی وفا ہے ، پارٹی میں جس طرح کے لوگ لئے ہیں اللہ انہیں مبارک کرے اور اس سے پاکستان میں تبدیلی نہیں لائی جا سکتی ۔ انہوں نے کہا کہ میرا پارٹی سے بہت سالوں تعلق بلکہ یکطرفہ تعلق رہا، بادشاہوں کے سینے میں دل ہوتا ہے اور نہ ہی ان کا کسی سے کوئی تعلق ہوتا ہے ۔ مجھے غلط فہمی تھی اس لئے جن دوسرے لوگوں کو بھی غلط فہمی ہے وہ اسے اپنے دل سے نکال دیں ۔ میں نے 28سال وفا ہی وفا کی ہے جبکہ اس کے بدلے میں میرے ساتھ28ہزار مرتبہ بے وفائی کی گئی ۔ انہوں نے کہا کہ میں نے جو فیصلہ کر لیا ہے اس پر پر مہر ثبت ہو گئی ہے اور اب کسی میں جرات نہیں کہ وہ مجھے کہے کہ پارٹی میں واپس آجائیں ۔ میں فیصلہ کرنے کے پچھانے والوں میں سے نہیں ہوں۔
